କାବୁଲ,୨୭।୮: ଆଫଗାନିସ୍ତାନର କାବୁଲରେ ଗୁରୁବାର ଦୁଇଟି ବୋମା ବିସ୍ଫୋରଣ ହୋଇଥିଲା। କାବୁଲ ବିମାନବନ୍ଦର ବାହାରେ ଦୁଇଟି ଆତ୍ମଘାତୀ ଆକ୍ରମଣରେ ୭୨ ଜଣଙ୍କର ମୃତ୍ୟୁ ଘଟିଥିବା ବେଳେ ୧୪୩ ଜଣ ଆହତ ହୋଇଛନ୍ତି। ଏହି ଆତଙ୍କବାଦୀ ଆକ୍ରମଣରେ ୧୩ ଜଣ ଆମେରିକୀୟ ସୈନଙ୍କର ମୃତ୍ୟୁ ହୋଇଥିବା ବେଳେ ୧୮ ଜଣ ଆହତ ହୋଇଥିବା ପେଣ୍ଟାଗନ ସୁରକ୍ଷା ଅଧିକାରୀ ସୂଚନା ଦେଇଛନ୍ତି। କାବୁଲ ବିସ୍ଫୋରଣରେ ଆମେରିକାର ରାଷ୍ଟ୍ରପତି ଜୋ ବାଇଡେନ କହିଛନ୍ତି ଯେ, ଯିଏ ଏହା କରିଛି, ଆମେ ଏହାକୁ କ୍ଷମା କରିବୁ ନାହିଁ କିମ୍ବା ଭୁଲି ପାରିବୁ ନାହିଁ। ବିସ୍ଫୋରଣ ପଛରେ ଆତଙ୍କବାଦୀ ସଂଗଠନ ଆଇଏସ (ଇସଲାମିକ ଷ୍ଟେଟ)ର ହାତ ଥିବା ସାମ୍ନାକୁ ଆସୁଥିଲା ଏବଂ ବିଳମ୍ବିତ ରାତିରେ ସେ ଏହା ସ୍ବୀକାର ମଧ୍ୟ କରିଛି।
ସୂଚନାଯୋଗ୍ୟ ଯେ, ଆମେରିକା, ଅଷ୍ଟ୍ରେଲିଆ ଏବଂ ବ୍ରିଟେନ କାବୁଲ ବିମାନବନ୍ଦରରେ ଆତଙ୍କବାଦୀ ଆକ୍ରମଣ ହେବାର ସମ୍ଭାବନା ପ୍ରକାଶ କରିଥିଲେ। ଏଥିସହ ଏହାର ନାଗରିକମାନଙ୍କୁ କାବୁଲ ବିମାନବନ୍ଦରଠାରୁ ଦୂରରେ ରହିବାକୁ ଚେତାବନୀ ଦେଇଥିଲେ। ଏହି ସମୟରେ ବ୍ରିଟେନ ଏହି ଘଟଣା ସମ୍ପର୍କରେ ଏକ ଜରୁରୀ ବୈଠକ ଡାକିଥିଲା।
