ରାଜନଗର,୨୧ା୧(ଡି.ଏନ.ଏ.): ଗାଁ ଗହଳିରେ ମୁଣ୍ଡ ଗୁଞ୍ଜିବା ପାଇଁ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ମିଳିବ ା ଏଥିପାଇଁ ଗତ ସାଢେ ୩ ବର୍ଷ ହେବ ଲୋକେ ସରକାରଙ୍କ ଆବାସ ତାଲିକାକୁ ଚାହିଁ ରହିଥିଲେ। ସରକାର ଘର ଦେବେ, ମାଟି ଘର ଭାଙ୍ଗିବୁ, କୋଠାଘର ଖଣ୍ଡେ ନିର୍ମାଣ କରିବୁ , ଏମିତି କେତେ ସ୍ବପ୍ନ ଓ ଆଶା ବାନ୍ଧିଥିଲେ ଗାଁର ଗରିବ ଗୁରୁବା ଲୋକେ। ରାଜ୍ୟ ଏବଂ କେନ୍ଦ୍ର ସରକାରଙ୍କ ମଧ୍ୟରେ ଆବାସ ଯୋଜନାକୁ ନେଇ ଟଣା ଓଟରା ଚାଲିଥିବାରୁ ଏଥିପାଇଁ ବହୁ ବିଳମ୍ବ ଘଟିଥିଲା ା ହେଲେ ଗତ ୧୬ ତାରିଖରେ ରାଜ୍ୟର ପ୍ରତି ପଞ୍ଚାୟତ ଏବଂ ବ୍ଲକ କାନ୍ଥରେ ପ୍ରଧାନମନ୍ତ୍ରୀ ଆବାସ ବଣ୍ଟନ କରିବା ପାଇଁ ହିତାଧିକାରୀଙ୍କ ତାଲିକା ପ୍ରକାଶ ପାଇଛି। ହେଲେ ସେଥିରେ ବହୁ ହିତାଧିକାରୀ ବାଦ୍ ପଡିଥିବାରୁ ଅସନ୍ତୋଷ ପ୍ରକାଶ ପାଇଛି। ଏହାକୁ ନେଇ ଶୁକ୍ରବାର ବେଲପାଳ ପଞ୍ଚାୟତର ହିତାଧିକାରୀ ରାଜନଗର ବ୍ଲକ ସମ୍ମୁଖରେ ଆମରଣ ଅନଶନରେ ବସିବା ଘଟଣା ଏଠାରେ ଚର୍ଚ୍ଚାର ବିଷୟ ହୋଇଛି ା
ସୂଚନା ଅନୁଯାୟୀ, ରାଜନଗର ବ୍ଲକରେ ୪୦୫୦ ଜଣ ହିତାଧିକାରୀଙ୍କ ତାଲିକା ପ୍ରସ୍ତୁତ ହୋଇଥିଲା। ସ୍କୁଟିନ ପରେ ୩୮୪୦ ହିତାଧିକାରୀଙ୍କୁ ପ୍ରଧାନମନ୍ତ୍ରୀ ଆବାସ ଯୋଗାଇ ଦେବା ପାଇଁ ପ୍ରଶାସନ ନିଷ୍ପତ୍ତି ନେଇଛି। ଫନୀ ବାତ୍ୟାରେ କ୍ଷତିଗ୍ରସ୍ତ ହିତାଧିକାରୀଙ୍କ ବାଦ୍ ଏହି ପ୍ରଧାନମନ୍ତ୍ରୀ ଆବାସ ବଣ୍ଟନ କରାଯିବ। ପ୍ରଥମ ଦଫାରେ ରାଜନଗର ବ୍ଲକରେ ୩୮୪୦ ହିତାଧିକାରୀଙ୍କ ମଧ୍ୟରୁ ମାତ୍ର ୧୭୨୮ଜଣଙ୍କ ନାଁ ପ୍ରକାଶ ପାଇଛି। ଏହି ୧୭୨୮ଜଣଙ୍କ ମଧ୍ୟରେ କିଏ ଅଯୋଗ୍ୟ, ସେ ନେଇ ଅଭିଯୋଗ ଦେବା ପାଇଁ ସମୟସୀମା ଧାର୍ଯ୍ୟ ହୋଇଛି। ଅବଶିଷ୍ଟ ହିତାଧିକାରୀଙ୍କ ନାଁ ପ୍ରକାଶ ପାଇନାହିଁ। ଦୀର୍ଘ ସାଢେ ୩ ବର୍ଷ ପରେ ପ୍ରଧାନମନ୍ତ୍ରୀ ଆବାସ ମିଳୁଥିବା ବେଳେ ପ୍ରଥମ ଦଫା ତାଲିକାରେ ନାଁ ନ ଥିବାରୁ ବିଭିନ୍ନ ପଞ୍ଚାୟତରେ ଏ ନେଇ ପ୍ରତିକ୍ରିୟା ପ୍ରକାଶ ପାଇଛି। ସେହିପରି ବେଲପାଳ ପଞ୍ଚାୟତରେ ୨୧୩ ହିତାଧିକାରୀଙ୍କ ତାଲିକା ପୂର୍ବରୁ ପ୍ରସ୍ତୁତ ହୋଇଥିଲା। ସେମାନଙ୍କ ମଧ୍ୟରୁ ମାତ୍ର ୭୫ ଜଣଙ୍କ ନାଁ ପ୍ରଥମ ଦଫାରେ ପ୍ରକାଶ ପାଇଛି। ଆମେମାନେ ଗରିବ ଲୋକ, ଆମର କୋଠାଘର ନାହିଁ। ଆମେ ପୂର୍ବରୁ କେବେ ସରକାରୀ ବାସଗୃହ ପାଇନାହୁଁ। ଆମ ନାଁ କିପରି ବାଦ୍ ପଡିଲା ବୋଲି ଅଭିଯୋଗକରି ଆଜି ବେଲପାଳ ପଞ୍ଚାୟତର ହିତାଧିକାରୀ ରାଜନଗର ବ୍ଲକ ସମ୍ମୁଖରେ ଆମରଣ ଅନଶନରେ ବସିଥିଲେ ା ସୁଲୋଚନା ବିଶ୍ୱାଳ, ମଞ୍ଜୁଲତା ସାହୁ, ଜାନକୀ ପରିଡା, ଜ୍ୟୋତ୍ସ୍ନାରାଣୀ ପଣ୍ଡା, ଉଷାରାଣୀ ପରିଡା, ଦିଲ୍ଲୀପ ଦାସ, ବିଚିତ୍ର ମହାନ୍ତି ପ୍ରମୁଖ ହିତାଧିକାରୀ ଆମରଣ ଅନଶନରେ ବସିଥିଲେ। ସମସ୍ତଙ୍କ ନାଁ ଅଛି, ଯାହାର ନାଁ କଟିଛି ବୋଲି କହୁଛ, ସମସ୍ତେ ବ୍ୟକ୍ତିଗତ ଭାବେ ଆବେଦନ କରନ୍ତୁ। କୌଣସି ଯୋଗ୍ୟ ବ୍ୟକ୍ତିଙ୍କୁ କଟାଯିବ ନାହିଁ। ୭ଦିନ ଭିତରେ ଏହାର ତଦନ୍ତ କରାଯିବ ବୋଲି ବିଡିଓ ରବିନ୍ଦ୍ର କୁମାର ପ୍ରଧାନ ପ୍ରତିଶ୍ରୁତି ଦେବା ପରେ ହିତାଧିକାରୀମାନେ ଅନଶନରୁ ଉଠିଥିଲେ ା
