ଓ୍ବାଶିଂଟନ,୧୬।୭: ଆମେରିକା ଏବଂ ଇରାନ ମଧ୍ୟରେ ବୃଦ୍ଧି ପାଉଥିବା ସାମରିକ ଉତ୍ତେଜନା ମଧ୍ୟରେ ତେହରାନ ହର୍ମୁଜ ପ୍ରଣାଳୀ ସମ୍ପର୍କରେ ଏକ ଦୃଢ଼ ମନୋଭାବ ଗ୍ରହଣ କରିଛି। ଇରାନର ଖାତମ ଅଲ-ଆନବିୟା କେନ୍ଦ୍ରୀୟ ମୁଖ୍ୟାଳୟର ଜଣେ ମୁଖପାତ୍ର ସ୍ପଷ୍ଟ ଭାବରେ କହିଛନ୍ତି, ହର୍ମୁଜ ପ୍ରଣାଳୀରେ ବାହ୍ୟ ଶକ୍ତି ବିଶେଷକରି ଆମେରିକା ଦ୍ୱାରା ଯେକୌଣସି ହସ୍ତକ୍ଷେପକୁ ଯେକୌଣସି ମୂଲ୍ୟରେ ବରଦାସ୍ତ କରାଯିବ ନାହିଁ। ଇରାନର ଏହି ‘ଲାଲ ରେଖା’ ବୋଲି ଅଭିହିତ କରି ସେ ଚେତାବନୀ ଦେଇଛନ୍ତି, ଯଦି ଆମେରିକା ରାଷ୍ଟ୍ରପତିଙ୍କ ଇରାନୀ ଭିତ୍ତିଭୂମି ଉପରେ ଆକ୍ରମଣ କରିବାର ଧମକ କାର୍ଯ୍ୟକାରୀ ହୁଏ, ତେବେ ଇରାନୀ ସାମରିକ ବାହିନୀ ସମଗ୍ର ଅଞ୍ଚଳରେ ଭିତ୍ତିଭୂମିକୁ ଟାର୍ଗେଟ କରିବ, ଯାହା ଏପର୍ଯ୍ୟନ୍ତ ସୁରକ୍ଷିତ ରହିଛି।
ପ୍ରବକ୍ତା କହିଛନ୍ତି ଯେ, ଇରାନର ସଶସ୍ତ୍ର ବାହିନୀ ପୂର୍ବରୁ ପ୍ରତିଶୋଧମୂଳକ ପଦକ୍ଷେପ ନେଉଛି, ଏବଂ ଯଦି ପରିସ୍ଥିତି ଆହୁରି ଖରାପ ହୁଏ, ତେବେ ପ୍ରତିକ୍ରିୟା ପୂର୍ବ ଅପେକ୍ଷା ବହୁତ କଠୋର, ବ୍ୟାପକ ଏବଂ ବିନାଶକାରୀ ହେବ। ଆମେରିକାକୁ ବୁଝିବାକୁ ପଡିବ ଯେ ଇରାନ ଏହାର ସୁରକ୍ଷା ଏବଂ ସାର୍ବଭୌମତ୍ୱ ସହିତ ସାଲିସ କରିବ ନାହିଁ।
ଇରାନୀ ସଂସଦର ବାଚସ୍ପତି ଏବଂ ଆଲୋଚନା ଦଳର ମୁଖ୍ୟ ମହମ୍ମଦ ବାଘେର ଗାଲିବାଫ କହିଛନ୍ତି ଯେ, ହର୍ମୁଜ ପ୍ରଣାଳୀ ଉପରେ ଇରାନର ଭୂମିକା ଏବଂ ନିୟନ୍ତ୍ରଣ ସିଧାସଳଖ ଦେଶର ଜାତୀୟ ସୁରକ୍ଷା ସହିତ ଜଡିତ। ଇରାନ କୌଣସି ଶତ୍ରୁକୁ ରାଷ୍ଟ୍ର ଉପରେ ନିଜର ଇଚ୍ଛା ଥୋପିବାକୁ ଦେବ ନାହିଁ। ତାଙ୍କ ମତରେ, ଯଦିଓ ଇରାନ ଯୁଦ୍ଧ ଚାହୁଁନାହିଁ, ତଥାପି ଏହାର ଜାତୀୟ ସ୍ବାର୍ଥ ଏବଂ ସୁରକ୍ଷା ରକ୍ଷା ପାଇଁ ଯେକୌଣସି ପରିସ୍ଥିତିର ସମ୍ମୁଖୀନ ହେବାକୁ ପ୍ରସ୍ତୁତ।