ତେହେରାନ,୨୧।୬: ଇରାନ ଏବଂ ଇସ୍ରାଏଲ ମଧ୍ୟରେ ଚାଲିଥିବା ଉତ୍ତେଜନା ମଧ୍ୟରେ, ଇରାନ ପରୋକ୍ଷରେ ପାକିସ୍ତାନକୁ ଚେତାବନୀ ଦେଇଛି। ନୂଆଦିଲ୍ଲୀରେ ଥିବା ଇରାନ ଦୂତାବାସର ଡେପୁଟି ମିଶନ ମୁଖ୍ୟ ଜାଭେଦ ହୁସେନି କହିଛନ୍ତି, ଯଦି କୌଣସି ତୃତୀୟ ପକ୍ଷ ଏହି ସଂଘର୍ଷରେ ସାମିଲ ହୁଏ, ତେବେ ତାକୁ ଗମ୍ଭୀର ପରିଣାମ ଭୋଗିବାକୁ ପଡିବ। ଆଶା କରାଯାଉଛି ଯେ ପାକିସ୍ତାନ ଆମ ସହିତ ଛିଡା ହେବ। ପାକିସ୍ତାନକୁ ବୁଝିବାକୁ ପଡିବ ଯେ, ଯଦି ଆଜି ଇସ୍ରାଏଲକୁ ରୋକାଯାଏ ନାହିଁ, ତେବେ ଭବିଷ୍ୟତରେ ଆହୁରି ଅନେକ ଦେଶ ଆକ୍ରମଣର ସମ୍ମୁଖୀନ ହେବେ।
ଜାଭେଦ ହୁସେନି କହିଛନ୍ତି,ଏହା ଇସ୍ରାଏଲ ଏବଂ ଇରାନ ମଧ୍ୟରେ ଏକ ସଂଘର୍ଷ। ଏଥିରେ କୌଣସି ତୃତୀୟ ପକ୍ଷର ପ୍ରବେଶ ଜଟିଳତାକୁ ବୃଦ୍ଧି କରିବ। ଆମର କିଛି ଅଘୋଷିତ ଶକ୍ତି ଅଛି, ଯାହାକୁ ଆମେ ଭବିଷ୍ୟତ ପାଇଁ ସୁରକ୍ଷିତ ରଖିଛୁ। ହ୍ବାଇଟ ହାଉସରେ ଡୋନାଲ୍ଡ ଟ୍ରମ୍ପଙ୍କ ସହିତ ପାକିସ୍ତାନ ସେନା ମୁଖ୍ୟ ଜେନେରାଲ ଅସୀମ ମୁନୀରଙ୍କ ସାକ୍ଷାତ ବିଷୟରେ ତାଙ୍କୁ ପଚରାଯିବାରୁ ଏହି ବିବୃତ୍ତି ସାମ୍ନାକୁ ଆସିଥିଲା। ଆମେ ଚେତାବନୀ ଦେଉଛୁ ଯେ ଯଦି କୌଣସି ତୃତୀୟ ପକ୍ଷ ଏହି ଯୁଦ୍ଧରେ ସାମିଲ ହୁଏ, ତେବେ ଏହାର ଗମ୍ଭୀର ପରିଣାମ ହେବ।
ଇରାନୀ ଅଧିକାରୀମାନେ ସ୍ପଷ୍ଟ କରିଛନ୍ତି, ସେମାନେ ଅସୀମ ମୁନିରଙ୍କ ସାମ୍ପ୍ରତିକ ଆମେରିକା ଗସ୍ତକୁ ଲକ୍ଷ୍ୟ କରିଛନ୍ତି। କିଛି ସପ୍ତାହ ପୂର୍ବରୁ ସେ ଇରାନ ଗସ୍ତ କରିଥିଲେ ଏବଂ ସର୍ବୋଚ୍ଚ ନେତା ଆୟାତୋଲ୍ଲା ଖାମେନେଇଙ୍କୁ ଭେଟିଥିଲେ ଏବଂ ଏବେ ସେ ଡୋନାଲ୍ଡ ଟ୍ରମ୍ପଙ୍କୁ ମଧ୍ୟ ଭେଟିଛନ୍ତି। ସୋସିଆଲ ମିଡିଆରେ ପ୍ରଶ୍ନ ଉଠାଯାଉଛି ଯେ ଇରାନର ପଡ଼ୋଶୀ ପାକିସ୍ତାନ ପ୍ରକୃତରେ କହା ସପକ୍ଷରେ ଠିଆ ହୋଇଛି – ତେହେରାନ ନା ୱାଶିଂଟନ?
ହୁସେନି ଭାରତ ପ୍ରତି କୌଣସି ଅସନ୍ତୋଷକୁ ଅସ୍ବୀକାର କରି କହିଛନ୍ତି, ତେହେରାନ ଭବିଷ୍ୟତରେ ଭାରତଠାରୁ ଉତ୍ତମ ବୁଝାମଣା ଏବଂ ସହଯୋଗ ଆଶା କରନ୍ତି।
ଇରାନ ମଧ୍ୟ ଭାରତ ଦ୍ୱାରା ଆରମ୍ଭ ହୋଇଥିବା ଅପରେଶନ ସିନ୍ଦୂରକୁ ପୂର୍ଣ୍ଣ ସମର୍ଥନ ଦୋହରାଇଛି। ଏହି ଅପରେଶନ ଅଧୀନରେ, ଇରାନ-ଇସ୍ରାଏଲ ବିବାଦରେ ଫସି ରହିଥିବା ଭାରତୀୟ ଛାତ୍ରମାନଙ୍କୁ ସୁରକ୍ଷିତ ଭାବରେ ବାହାର କରିବା ପାଇଁ ପ୍ରୟାସ କରାଯାଉଛି।
