ତେହରାନ୍,୨।୩: ଆମେରିକା ଏବଂ ଇରାନ ମଧ୍ୟରେ ବଢ଼ୁଥିବା ସାମରିକ ଉତ୍ତେଜନା ଏବେ ଫିଫା ବିଶ୍ୱକପ୍ 2026 ଉପରେ ମଧ୍ୟ ପ୍ରଭାବ ପକାଇବା ପରି ମନେ ହେଉଛି। ସ୍ଥିତି ଏତେ ଗମ୍ଭୀର ହୋଇଛି ଯେ, ଆମେରିକା ମାଟିରେ ସମସ୍ତ ଗ୍ରୁପ ମ୍ୟାଚ୍ ଖେଳୁଥିବା ଇରାନ ଦଳ ଟୁର୍ନାମେଣ୍ଟ ବର୍ଜନ କରିବାକୁ ଚିନ୍ତା କରୁଛି। ଏପରିକ ଆକ୍ରମଣରେ ଇରାନର ସର୍ୱୋଚ୍ଚ ନେତା ଆୟାତୋଲ୍ଲା ଅଲୀ ଖାମେନେଇଙ୍କ ମୃତ୍ୟୁକୁ ନେଇ ଏବେ ଇରାନରେ ଉତ୍ତେଜନାପୂର୍ଣ୍ଣ ପରିବେଶ ସୃଷ୍ଟି କରିଛି।
ଇରାନ ଲଗାତାର ଚତୁର୍ଥ ଥର ପାଇଁ ଫିଫା ବିଶ୍ୱକପ ପାଇଁ ଯୋଗ୍ୟତା ଅର୍ଜନ କରିଛି। ଏପରିକି ଇରାନର ସମସ୍ତ ଗ୍ରୁପ ପର୍ଯ୍ୟାୟ ମ୍ୟାଚ୍ ଆମେରିକାରେ ଅନୁଷ୍ଠିତ ହେବାର କାର୍ଯ୍ୟକ୍ରମ ରହିଛି। ଦଳ ଜୁନ ୧୫ ତାରିଖରେ ଲସ୍ ଆଞ୍ଜେଲସ୍ରେ ନ୍ୟୁଜିଲାଣ୍ଡ ବିପକ୍ଷରେ ପ୍ରଥମ ମ୍ୟାଚ ଖେଳିବାର କାର୍ଯ୍ୟକ୍ରମ ରହିଛି। ଜୁନ ୨୧ ତାରିଖରେ ବେଲଜିୟମ ଏବଂ ଜୁନ ୨୬ରେ ସିଆଟଲରେ ମିଶର ବିପକ୍ଷରେ ମ୍ୟାଚ୍ ଅନୁଷ୍ଠିତ ହେବ।
ବର୍ତ୍ତମାନର ପରିସ୍ଥିତିକୁ ଦୃଷ୍ଟିରେ ରଖି, ଇରାନ ଫୁଟବଲ ଫେଡେରେଶନର ସଭାପତି ମେହଦି ତାଜ ସୂଚିତ କରିଛନ୍ତି ଯେ, ଆମେରିକାରେ ମ୍ୟାଚ୍ ଖେଳିବା କଷ୍ଟକର ହୋଇପାରେ। ସେ କହିଛନ୍ତି ଯେ, ଗତ ଦୁଇ ଦିନ ମଧ୍ୟରେ ଯାହା କିଛି ଘଟିଛି ତାହା ବିଶ୍ୱକପ ଅଂଶଗ୍ରହଣ ଉପରେ ନିଷ୍ପତ୍ତି ନେବା ସହଜ ହେବ ନାହିଁ। ଏପରିକି ଇରାନର ଘରୋଇ ଫୁଟବଲ ଲିଗକୁ ମଧ୍ୟ ପରବର୍ତ୍ତୀ ସୂଚନା ପର୍ଯ୍ୟନ୍ତ ସ୍ଥଗିତ ରଖାଯାଇଛି। ଏହି ସମୟରେ, ଅନ୍ତର୍ଜାତୀୟ ଫୁଟବଲ ସଂସ୍ଥା ଫିଫା କହିଛି ଯେ, ପରିସ୍ଥିତି ଉପରେ ନଜର ରଖାଯାଇଛି।
ଫିଫା ମହାସଚିବ ମାଟିୟାସ ଗ୍ରାଫଷ୍ଟ୍ରୋମ କହିଛନ୍ତି, ଅନ୍ତର୍ଜାତୀୟ ଫୁଟବଲ ଆସୋସିଏଶନ ବୋର୍ଡ (IFAB) ୱେଲ୍ସରେ ବୈଠକ କରିଛି। ଯେଉଁଠାରେ ପରିସ୍ଥିତି ଉପରେ ଆଲୋଚନା ହୋଇଛି। ଗ୍ରାଫଷ୍ଟ୍ରୋମ ଗଣମାଧ୍ୟମକୁ କହିଛନ୍ତି, ମୁଁ ଇରାନ ବିଷୟରେ ଅବଗତ ଅଛି। ଆଜି ଆମର ଏକ ବୈଠକ ଥିଲା, କିନ୍ତୁ ଏହା ଉପରେ ବିସ୍ତୃତ ମନ୍ତବ୍ୟ ଦେବା ଟିକ୍ ହେବ ନାହିଁ। ଆମେ ବିଶ୍ୱର ସମସ୍ତ ଘଟଣା ଉପରେ ନଜର ରଖୁଛୁ ବୋଲି ସେ କହିଛନ୍ତି।
ସେ ଆହୁରି କହିଛନ୍ତି ଯେ, ବିଶ୍ୱକପ ଡ୍ର ୱାଶିଂଟନରେ ପୂର୍ୱରୁ ଅନୁଷ୍ଠିତ ହୋଇସାରିଛି। ଏଥିରେ ସମସ୍ତ ଦଳ ସାମିଲ ଥିଲେ। ଫିଫାର ପ୍ରାଥମିକ ଲକ୍ଷ୍ୟ ହେଉଛି ବିଶ୍ୱକପ ଏକ ସୁରକ୍ଷିତ ପରିବେଶରେ ଅନୁଷ୍ଠିତ ହେବା। ଏଥିରେ ଯୋଗ୍ୟ ସମସ୍ତ ଦଳ ଅଂଶଗ୍ରହଣ କରବେ। ସେ ଏହା ମଧ୍ୟ କହିଛନ୍ତି ଯେ, ଫିଫା ୩ଟି ଆୟୋଜକ ଦେଶର ସରକାରଙ୍କ ସହିତ ନିରନ୍ତର ଯୋଗାଯୋଗରେ ଅଛି ଏବଂ ସମସ୍ତଙ୍କ ସୁରକ୍ଷା ସୁନିଶ୍ଚିତ କରାଯିବ।
