ନୂଆଦିଲ୍ଲୀ, ୨୬।୫: ଇରାନ ଏବଂ ଆମେରିକା ମଧ୍ୟରେ ଦୀର୍ଘ ଦିନ ଧରି ଚାଲିଥିବା ଉତ୍ତେଜନାର ଅନ୍ତ ଘଟାଇବା ପାଇଁ ଆଶା କରାଯାଉଥିବା ଶାନ୍ତି ଚୁକ୍ତିନାମା ଏବେ ଝୁଲି ରହିଥିବା ପରି ମନେ ହେଉଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ଲଗାଯାଇଥିବା କିଛି ନୂତନ ଏବଂ ଅତ୍ୟନ୍ତ କଠୋର ସର୍ତ୍ତ ଯୋଗୁ ଏହି ଐତିହାସିକ ଚୁକ୍ତିନାମା ସ୍ବାକ୍ଷରିତ ହେବାରୁ ଅଟକି ଯାଇଛି। ଏହି ସର୍ତ୍ତଗୁଡ଼ିକର ଆର୍ବିଭାବ ଏବେ ଚୁକ୍ତିନାମାର ସମୟସୀମା ଉପରେ ଅନିଶ୍ଚିତତାର ଛାୟା ପକାଇଛି।
ଶାନ୍ତି ଚୁକ୍ତିନାମାର ପ୍ରଥମ ଏବଂ ସବୁଠାରୁ ଗୁରୁତ୍ୱପୂର୍ଣ୍ଣ ପ୍ରତିବନ୍ଧକ ହେଉଛି ଡୋନାଲ୍ଡ ଟ୍ରମ୍ପଙ୍କ ଯୁଦ୍ଧବିରତିର ପରିସରକୁ ବିସ୍ତାର କରିବା ପାଇଁ ଦାବି। ଟ୍ରମ୍ପ କହିଛନ୍ତି ଯେ ଏହି ଶାନ୍ତି ଚୁକ୍ତିନାମା ଏବଂ ଯୁଦ୍ଧବିରତି ପ୍ରଭାବଶାଳୀ ହେବା ପାଇଁ, ସାଉଦି ଆରବ, କାତାର, ପାକିସ୍ତାନ, ତୁର୍କୀ, ମିଶର ଏବଂ ଜୋର୍ଡାନ ଭଳି ପ୍ରମୁଖ ମୁସଲିମ ଦେଶଗୁଡ଼ିକୁ ଆବ୍ରାହାମ ଚୁକ୍ତିନାମାରେ ସ୍ବାକ୍ଷର କରିବାକୁ ପଡିବ। ତଥାପି, ସମସ୍ୟା ହେଉଛି ଯେ ଏହି ମୁସଲିମ ଦେଶଗୁଡ଼ିକ ବର୍ତ୍ତମାନ ଇସ୍ରାଏଲ ସହିତ କୌଣସି କୂଟନୈତିକ କିମ୍ବା ଆନୁଷ୍ଠାନିକ ସମ୍ପର୍କ ସ୍ଥାପନ କରିବାକୁ ଇଚ୍ଛୁକ ନୁହଁନ୍ତି। ଏହି ସର୍ତ୍ତ ଆଲୋଚନାକୁ ସମ୍ପୂର୍ଣ୍ଣ ଜଟିଳ କରିଛି।
ଇରାନର ପରମାଣୁ କାର୍ଯ୍ୟକ୍ରମ ଏବଂ ସମୃଦ୍ଧ ୟୁରାନିୟମକୁ ନେଇ ଦ୍ୱିତୀୟ ବଡ଼ ବିବାଦ ସୃଷ୍ଟି ହୋଇଛି। ପ୍ରାରମ୍ଭରେ, ଏହି ସମ୍ବେଦନଶୀଳ ପ୍ରସଙ୍ଗର ସମାଧାନ ପାଇଁ ଉଭୟ ପକ୍ଷଙ୍କ ପାଇଁ ୩୦-୬୦ ଦିନର ସମୟସୀମା ଧାର୍ଯ୍ୟ କରାଯାଇଥିଲା। ତଥାପି, ଟ୍ରମ୍ପ ଏବେ ଇରାନ ଉପରେ ତୁରନ୍ତ ଏକ ଚୂଡ଼ାନ୍ତ ନିଷ୍ପତ୍ତି ନେବା ପାଇଁ ଚାପ ପକାଇବା ଆରମ୍ଭ କରିଛନ୍ତି, ଯାହା ଇରାନକୁ ଅସ୍ଥିର କରିଛି।
ଟ୍ରମ୍ପ ଏହି ପ୍ରସଙ୍ଗ ସମ୍ପର୍କରେ ସୋସିଆଲ ମିଡିଆରେ ଏକ ପୋଷ୍ଟ ମଧ୍ୟ ଶେୟାର କରିଛନ୍ତି। ତାଙ୍କ ପୋଷ୍ଟରେ, ସେ ଏକ ଅତ୍ୟନ୍ତ କଠୋର ଆଭିମୁଖ୍ୟ ଗ୍ରହଣ କରି ଲେଖିଛନ୍ତି ଯେ ଇରାନ ତୁରନ୍ତ ତାର ସମସ୍ତ ସମୃଦ୍ଧ ୟୁରାନିୟମକୁ ଆମେରିକାକୁ ହସ୍ତାନ୍ତର କରିବା ଉଚିତ କିମ୍ବା ଆମେରିକା ସହିତ ସମନୱୟ ରଖି ଏହାକୁ ସମ୍ପୂର୍ଣ୍ଣ ନଷ୍ଟ କରିଦେବା ଉଚିତ୍।
Odisha’s No.1 Odia Daily