ନୂଆଦିଲ୍ଲୀ, ୨୯।୪(ପି.ଟି.): ଭାରତୀୟ ଅଲିମ୍ପିକ ଆସୋସିଏଶନ (ଆଇଓସି) ଉପସଭାପତି ଜନାର୍ଦ୍ଦନ ସିଂ ଗେହଲଟ ବୁଧବାର ଜୟପୁରରେ ପ୍ରାଣ ହରାଇଛନ୍ତି। ଦୀର୍ଘଦିନ ଧରି ଅସୁସ୍ଥ ରହିବା ପରେ ଜନାର୍ଦ୍ଦନ ୭୦ ବର୍ଷ ବୟସରେ ପରଲୋକ ଗମନ କରିଛନ୍ତି ବୋଲି କୁହାଯାଇଛି।
ପୂର୍ବତନ ରାଜସ୍ଥାନ ମନ୍ତ୍ରୀ ଭାବେ କାର୍ଯ୍ୟ କରିଥିବା ଏହି କ୍ରୀଡ଼ା ପ୍ରଶାସକ ଜଣକ ଅନ୍ତର୍ଜାତୀୟ କବାଡି ଫେଡେରେଶନର ପ୍ରତିଷ୍ଠାତା ଅଧ୍ୟକ୍ଷ ଥିଲେ। ୨୦୧୩ ପର୍ଯ୍ୟନ୍ତ ସେ ୨୮ ବର୍ଷ ଧରି ଆମେଚର କବାଡ଼ି ଫେଡେରେଶନ ଅଫ୍ ଇଣ୍ଡିଆ ମୁଖ୍ୟ ରହିଥିଲେ। ମୃତ୍ୟୁ ବେଳକୁ ସେ ମଧ୍ୟ ରାଜସ୍ଥାନ ଅଲିମ୍ପିକ ଆସୋସିଏଶନର ଅଧ୍ୟକ୍ଷ ରହିଥିଲେ। ତାଙ୍କ ଦେହାନ୍ତରେ ଆଇଓସି ଅଧ୍ୟକ୍ଷ ନରିନ୍ଦର ବାତ୍ରା ଶୋକପ୍ରକାଶ କରିଛନ୍ତି। ୨୦୧୭ ନିର୍ବାଚନରେ ସେ ଅନ୍ୟ ୯ ଜଣଙ୍କ ସମେତ ଆଇଓସି ଉପସଭାପତି ଭାବେ ନିର୍ବାଚିତ ହୋଇଥିଲେ। ରାଜସ୍ଥାନ ରାଜ୍ୟପାଳ କଲରାଜ ମିଶ୍ରା ଓ ମୁଖ୍ୟମନ୍ତ୍ରୀ ଅଶୋକ ଗେହଲଟ ମଧ୍ୟ ଶୋକ ପ୍ରକାଶ କରିଛନ୍ତି। ରାଜନୀତି ଓ କ୍ରୀଡ଼ା ପ୍ରତି ଜନାର୍ଦ୍ଦନଙ୍କ ବିଶେଷ ଯୋଗଦାନ ଥିଲା ବୋଲି ଗେହଲଟ କହିଛନ୍ତି।
