ମୁମ୍ବାଇ,୨୮।୧: ଆଦାନୀ ଗ୍ରୁପ୍ ଅଧୀନ କମ୍ପାନୀଗୁଡ଼ିକର ଶେୟାର ମୂଲ୍ୟରେ ହ୍ରାସ ଯୋଗୁ ଅନ୍ୟ କମ୍ପାନୀଗୁଡ଼ିକ ମଧ୍ୟ ପ୍ରଭାବିତ ହୋଇଛନ୍ତି। ଏଥିଯୋଗୁ ପୁଞ୍ଜିବଜାର ଲଗାତର ଦ୍ୱିତୀୟ ଦିନ ଧରି ନିମ୍ନଗାମୀ ହୋଇଛି। ଶୁକ୍ରବାର ସେନ୍ସେକ୍ସ ୮୭୪ ପଏଣ୍ଟ ହ୍ରାସ ପାଇ ୫୯,୩୩୧ରେ ରହିଛି। ସେହିପରି ନିଫ୍ଟି ୨୮୮ ପଏଣ୍ଟ ତଳକୁ ଖସି ୧୭,୬୦୪ରେ ସୀମିତ ରହିଛି। ବ୍ୟାଙ୍କ ନିଫ୍ଟିରେ ମଧ୍ୟ ୧୩୦୨ ପଏଣ୍ଟ ହ୍ରାସ ଦେଖିବାକୁ ମିଳିଛି। ବ୍ୟାଙ୍କ ନିଫ୍ଟି ସର୍ବାଧିକ ଚାପଗ୍ରସ୍ତ ହୋଇ ୪୦,୩୪୫ରେ କାରବାର ବନ୍ଦ ହୋଇଛି। ଆଦାନୀ ଏଣ୍ଟରପ୍ରାଇଜେସ୍ରେ ୧୮.୫୨% ଅର୍ଥାତ୍ ୬୨୭.୫୦ ପଏଣ୍ଟ ହ୍ରାସ ଦେଖିବାକୁ ମିଳିଛି। ଏହି କମ୍ପାନୀର ଶେୟାର ମୂଲ୍ୟ ବର୍ତ୍ତମାନ ୨୭୬୧ ଟଙ୍କା ରହିଛି। ଆଗକୁ ଏହି ଧାରା ବଜାୟ ରହିପାରେ ବୋଲି ବିଶ୍ଳେଷକମାନେ ମତ ଦେଇଛନ୍ତି। ଦଲାଲ ଷ୍ଟ୍ରିଟ୍ ଇନ୍ଭେଷ୍ଟରମାନେ ଶୁକ୍ରବାର ପ୍ରାୟ ୭ ଲକ୍ଷ କୋଟି ଟଙ୍କା ହରାଇ ଚିନ୍ତାରେ ପଡ଼ିଯାଇଛନ୍ତି। ବୁଧବାର ଟ୍ରେଡିଂ ସେସନ୍କୁ ମିଶାଇଲେ ଏହି କ୍ଷତିର ପରିମାଣ ୧୦.୭୩ ଲକ୍ଷ କୋଟିରୁ ଊର୍ଦ୍ଧ୍ୱ ଟଙ୍କା ହେବ ବୋଲି ପ୍ରାଥମିକ ଭାବେ ଆକଳନ କରାଯାଇଛି। ଆଦାନୀ ଏଣ୍ଟରପ୍ରାଇଜେସ୍ର ବହୁପ୍ରତୀକ୍ଷିତ (୨୦,୦୦୦ କୋଟି ଟଙ୍କାର) ଫଲୋ-ଅନ୍ ପବ୍ଲିକ ଅଫର୍ (ଏଫ୍ପିଓ)କୁ ମାତ୍ର ୧% ସବ୍ସ୍କ୍ରାଇବ୍ କରାଯାଇଛି।
ଲଗାମ କଷିଲା ସେବି
ଭାରତର ମାର୍କେଟ ରେଗୁଲେଟର ସେବି ଆଦାନୀ ଗ୍ରୁପ୍ର ଡିଲ୍ସ ଉପରେ ଲଗାମ କଷିବା ଆରମ୍ଭ କରିଛି। ସେବି ଅଦାନୀ ଗ୍ରୁପ୍ର ଫରେନ୍ ପୋର୍ଟଫୋଲିଓ ଇନ୍ଭେଷ୍ଟର୍ସଙ୍କୁ ନେଇ ଗତ ଜୁଲାଇରୁ ଚଳାଇଥିବା ତଦନ୍ତରେ ଆମେରିକୀୟ ଶର୍ଟ-ସେଲର୍ ହିଣ୍ଡେନ୍ବର୍ଗ ରିସର୍ଚ୍ଚ ପକ୍ଷରୁ ପ୍ରକାଶିତ ରିପୋର୍ଟକୁ ସାମିଲ କରିବାକୁ ନିଷ୍ପତ୍ତି ନେଇଛି। ଅଦାନୀ ସମୂହ କେଉଁ ସମୟରେ କାହା ସହ କିପରି ଡିଲ୍ କରିଛି ସେସବୁର ପୁଙ୍ଖାନୁପୁଙ୍ଖ ତଦନ୍ତ ପାଇଁ ସେବି ଅଣ୍ଟା ଭିଡ଼ିଥିବା ସୂତ୍ରରୁ ଜଣାପଡ଼ିଛି। ଏହା ପୂର୍ବରୁ ଆଦାନୀ ଗ୍ରୁପ୍ ଉକ୍ତ ରିପୋର୍ଟକୁ ଭିତ୍ତିହୀନ ଦର୍ଶାଇ ନ୍ୟୁୟର୍କଭିତ୍ତିକ ହିଣ୍ଡେନ୍ବର୍ଗ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନେବାକୁ ଚେତାବନୀ ଦେଇଥିଲା।
ନାଟେ ଆଣ୍ଡର୍ସନ
ଆମେରିକୀୟ ନାଟେ ଆଣ୍ଡର୍ସନଙ୍କ ଦ୍ୱାରା ପ୍ରତିଷ୍ଠିତ ହିଣ୍ଡେନ୍ବର୍ଗ ହେଉଛି ଏକ ଆକ୍ଟିଭିଷ୍ଟ ଫଣ୍ଡ୍। ୧୯୭୩ରେ ଏକ ହାଇଡ୍ରୋଜେନ୍ ଚାଳିତ ଜର୍ମାନ ବିମାନ ନ୍ୟୁଜର୍ସି ଅଭିମୁଖେ ଯାତ୍ରା କରୁଥିବାବେଳେ ସେଥିରେ ନିଅଁା ଲାଗିଯାଇଥିଲା। ଫଳରେ ଉକ୍ତ ଏୟାରଶିପ୍ ଦୁର୍ଘଟଣାଗ୍ରସ୍ତ ହୋଇଥିଲା। ସେଥିରେ ଥିବା ୩୫ ଯାତ୍ରୀଙ୍କ ମୃତ୍ୟୁ ଘଟିଥିଲା। ସେହି ବିମାନର ନାମ ଥିଲା ହିଣ୍ଡେନ୍ବର୍ଗ। ଏହାର ନାମାନୁସାରେ ଆଣ୍ଡର୍ସନ ନିଜ ସଂସ୍ଥାର ନାମକରଣ କରିଥିଲେ।
କ’ଣ କହୁଛି ହିଣ୍ଡେନ୍ବର୍ଗ
ଇନ୍ଭେଷ୍ଟର ହିଣ୍ଡେନ୍ବର୍ଗ ରିସର୍ଚ୍ଚ ପକ୍ଷରୁ ଶୁକ୍ରବାର ଏକ ବିବୃତି ଜାରି କରାଯାଇଛି। ଏଥିରେ କୁହାଯାଇଛି ଯେ, ଆଦାନୀ ଗ୍ରୁପ୍ ବିରୋଧରେ ଆସିଥିବା ଷ୍ଟକ୍ସ ମାନିପୁଲେଶନ୍ ଏବଂ ଆକାଉଣ୍ଟିଂ ଫ୍ରଡ୍ ସ୍କିମ୍ ସମ୍ପର୍କିତ ଅଭିଯୋଗଗୁଡ଼ିକ ମଧ୍ୟରୁ କୌଣସି ଗୋଟିଏର ମଧ୍ୟ ଏହି କମ୍ପାନୀ ଉତ୍ତର ଦେଇନାହିଁ। ଓଲଟା ଆଦାନୀ ଗ୍ରୁପ୍ର ଲିଗାଲ ହେଡ୍ ଜତିନ୍ ଜାଲୁନ୍ଧଓ୍ବାଲା ଆଇନଗତ କାର୍ଯ୍ୟାନୁଷ୍ଠାନର ଧମକ ଦେଇଛନ୍ତି। ଆଇନଗତ ଲଢ଼େଇ ପାଇଁ ଆମ ପାଖରେ ଦସ୍ତାବିଜ ଆକାରରେ ପର୍ଯ୍ୟାପ୍ତ ପ୍ରମାଣ ରହିଛି ବୋଲି ହିଣ୍ଡେନ୍ବର୍ଗ ଟୁଇଟ୍ କରିଛି।