ମୁମ୍ବାଇ: ମଙ୍ଗଳବାର ଭାରତୀୟ ପୁଞ୍ଜିବଜାରରେ କାରବାର ବେଶ୍ ଉତ୍ସାହଜନକ ରହିଛି। ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ)ର ସେନ୍ସେକ୍ସ ୮୦୦ରୁ ଊର୍ଦ୍ଧ୍ୱ ପଏଣ୍ଟ ବଢିଥିବା ନଜରକୁ ଆସିଛି। ଫଳରେ ନିବେଶକଙ୍କ ସମ୍ପତ୍ତି ୩.୪୧ ଲକ୍ଷ କୋଟି ଟଙ୍କା ବଢ଼ିଛି। ରିୟଲ ଇଷ୍ଟେଟ, ମେଟାଲ ଏବଂ ଫାଇନାନ୍ସିଆଲ ଷ୍ଟକ୍ କାରବାର ଉନ୍ନତ ହେବାରୁ ପୁଞ୍ଜିବଜାରର ସ୍ଥିତି ବେଶ୍ ଭଲ ରହିଥିବା ଜଣାପଡିଛି। ୩୦ ଶେୟାର ବିଶିଷ୍ଟ ବମ୍ବେ ଷ୍ଟକ୍ ଏକ୍ସଚେଞ୍ଜର ସେନ୍ସେକ୍ସ ୮୩୪ ପଏଣ୍ଟ (୧.୭୨%) ବଢ଼ିବା ଯୋଗୁ ଏହା ୪୯,୩୯୮ ପଏଣ୍ଟ ସ୍ତରରେ ବନ୍ଦ ହୋଇଛି। ସେହିଭଳି ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜ(ଏନ୍ଏସ୍ଇ) ନିଫ୍ଟି ୨୪୦ ପଏଣ୍ଟ(୧.୬୮%) ଊର୍ଦ୍ଧ୍ୱରେ ରହିବା ଯୋଗୁ ରେକର୍ଡ ସ୍ତର ୧୪,୫୨୧ ପଏଣ୍ଟ ଛୁଇଁଛି।
ସେନ୍ସେକ୍ସରେ ଭଲ କାରବାର କରିଥିବା କମ୍ପାନୀଗୁଡିକ ମଧ୍ୟରେ ବଜାଜ ଫିନ୍ସର୍ଭ, ବଜାଜ ଫାଇନାନ୍ସ, ସନ୍ଫାର୍ମା, ଏଚ୍ଡିଏଫ୍ସି, ଆଇସିଆଇସିଆଇ ବ୍ୟାଙ୍କ ଏବଂ ଏଲ୍ଆଣ୍ଡଟି ରହିଛି। ଏହି କମ୍ପାନୀଗୁଡିକର ଶେୟାର ୬.୭୭% ବଢିଛି। ଏନ୍ଏସ୍ଇ ପ୍ଲାଟ୍ଫର୍ମରେ ନିଫ୍ଟି ରିୟଲିଟି, ମେଟାଲ ଏବଂ ପିଏସ୍ୟୁ ବ୍ୟାଙ୍କ କାରବାର ପ୍ରାୟ ୪.୧୯% ବଢ଼ିଛି। ଆମେରିକାର ନିର୍ବାଚିତ ରାଷ୍ଟ୍ରପତି ଜୋ ବାଇଡେନ୍ ଏବଂ ବିଶ୍ୱ ବଜାରକୁ ନଜରରେ ରଖି ନିବେଶକ ନିବେଶ ବଢ଼ାଇବାରୁ ବଜାରରେ ଏଭଳି ସ୍ଥିତି ଦେଖିବାକୁ ମିଳିଥିବା ଶେୟାର ବଜାର ବିଶେଷଜ୍ଞ କହିଛନ୍ତି। ବାଇଡେନ କେତେକ ଭଲ ପଦକ୍ଷେପ ଘୋଷଣା କରିବେ ବୋଲି ନିବେଶକ ଆଶାବାଦୀ ରହିଛନ୍ତି। ଆମେରିକା ପୁଣି ଥରେ ଏକ ପ୍ରୋତ୍ସାହନ ପ୍ୟାକେଜ ଘୋଷଣା କରିପାରେ ବୋଲି କୁହାଯାଉଛି। ସୋମବାର ବିଦେଶୀ ପୋର୍ଟଫୋଲିଓ ନିବେଶକମାନେ ପୁଞ୍ଜିବଜାରରେ ୫୬୦ କୋଟି ଟଙ୍କା ନିବେଶ କରିଛନ୍ତି।
