ନୂଆଦିଲ୍ଲୀ: ହ୍ବାଟ୍ସଆପ୍ର ନୂଆ ପ୍ରିଭେସି ପଲିସି ପରିବର୍ତ୍ତନକୁ ନେଇ ଗତ କିଛିଦିନ ହେବ ୟୁଜରଙ୍କ ମଧ୍ୟରେ ଦ୍ୱନ୍ଦ୍ୱ ଲାଗି ରହିଥିବା ବେଳେ ମଙ୍ଗଳବାର ଏହି ଘଟଣାରେ ଏକ ନୂଆ ମୋଡ଼ ଦେଖିବାକୁ ମିଳିଛି। ବିବାଦୀୟ ପ୍ରିଭେସି ଅପ୍ଡେଟ୍ ପ୍ରତ୍ୟାହାର କରିବା ଲାଗି ଭାରତ ସରକାର ହ୍ବାଟ୍ସଆପ୍କୁ ନିର୍ଦ୍ଦେଶ ଦେଇଛନ୍ତି। ହ୍ବାଟ୍ସଆପ୍ ଲାଗି ଏହା ଏକ ବଡ଼ ଝଟକା ବୋଲି କୁହାଯାଉଛି। କମ୍ପାନୀ ଘରୋଇ ବଜାର ଲାଗି ଏହି ଅପ୍ଡେଟ୍ ଘୋଷଣା କରିବା ପରେ ଏହାକୁ ନେଇ ଅନେକ ବିବାଦ ଲାଗି ରହିଛି। ଭାରତୀୟ ବ୍ୟବହାରକାରୀଙ୍କ ସୂଚନାର ଗୋପନୀୟତା ତଥା ଡାଟା ନିରାପତ୍ତାକୁ କମ୍ପାନୀ ସମ୍ମାନ ଦେଉ ବୋଲି ସରକାର ନିର୍ଦ୍ଦେଶରେ କହିଛନ୍ତି।
କେନ୍ଦ୍ର ସରକାର ହ୍ବାଟ୍ସଆପ୍କୁ ପ୍ରଶ୍ନର ଏକ ଲମ୍ବା ତାଲିକା ପଠାଇଛନ୍ତି। ସରକାର କହିଛନ୍ତି, କମ୍ପାନୀ ୟୁରୋପ ବଜାର ଲାଗି କୋହଳ ନୀତି ଆପଣାଇଛି। ହେଲେ ଭାରତ ବଜାରରେ କାହିଁକି କଠୋର ପଲିସି ଗ୍ରହଣ କରାଯାଇଛି। ଏଭଳି କରିବା ଦ୍ୱାରା ଭାରତୀୟ ୟୁଜରଙ୍କ ଲାଗି ପକ୍ଷପାତିତା ହୋଇଛି। ଏହି ପ୍ରସଙ୍ଗକୁ ନେଇ ସରକାର ଅସନ୍ତୋଷ ପ୍ରକାଶ କରିଥିବା ଜଣେ ବରିଷ୍ଟ ଅଧିକାରୀ ନାମ ଗୋପନ ରଖି ଏକ ଜାତୀୟ ଗଣମାଧ୍ୟମକୁ କହିଛନ୍ତି। ଏହି ପ୍ରସଙ୍ଗରେ ତୁରନ୍ତ ଏକ ତ୍ୱରିତ ପଦକ୍ଷେପ ନେବାକୁ ଫେସ୍ବୁକ୍ ଅଧିକୃତ ଉକ୍ତ କମ୍ପାନୀକୁ ନିର୍ଦ୍ଦେଶ ଦିଆଯାଇଛି। ପ୍ରସ୍ତାବିତ ସେବା ସଂକ୍ରାନ୍ତ ନୂଆ ସର୍ତ୍ତାବଳୀ ଏବଂ ପ୍ରିଭେସି ନୀତିକୁ ନେଇ ସରକାର ଉଦ୍ବେଗ ପ୍ରକାଶ କରିବା ସହ ହ୍ବାଟ୍ସଆପ୍ ସିଇଓଙ୍କୁ ଚିଠି ଲେଖାଯାଇଛି।
ଫେସ୍ବୁକ୍ ସହ ହ୍ବାଟ୍ସଆପ୍ ଡାଟା ଶେୟାର ହେଲେ ଭାରତୀୟ ୟୁଜରଙ୍କ ନିରାପତ୍ତା ବିପନ୍ନ ହେବ ବୋଲି ସରକାର ଚିଠିରେ ଉଲ୍ଲେଖ କରିଥିବା ଅଧିକାରୀ ଜଣକ କହିଛନ୍ତି। ଏହା ଅତ୍ୟନ୍ତ ଚିନ୍ତାର ବିଷୟ। ଅନାୟାସରେ ବିଭିନ୍ନ ସୂଚନା ଏହା ଦ୍ୱାରା ଶେୟାର ହୋଇପାରିବ। ସୂଚନାଯୋଗ୍ୟ, ହ୍ବାଟ୍ସଆପ୍ର ନୂଆ ଅପ୍ଡେଟ ଗ୍ରହଣ କଲେ ଗ୍ରାହକ ସମ୍ପୂର୍ଣ୍ଣ ସେବା ଲାଭ କରିପାରିବେ। ନଚେତ୍ ତୁରନ୍ତ ପ୍ଲାଟଫର୍ମ ଛାଡିବାକୁ ପଡିବ ବୋଲି ହ୍ବାଟ୍ସଆପ୍ ପକ୍ଷରୁ କୁହାଯାଇଛି। କମ୍ପାନୀର ଏଭଳି ପ୍ରସ୍ତାବକୁ ମଧ୍ୟ ସରକାର ନାପସନ୍ଦ କରିଛନ୍ତି। ଏଭଳି ଏକ ଅପ୍ଡେଟ ଭାରତୀୟ ଗ୍ରାହକଙ୍କଠାରୁ ପସନ୍ଦ କରିବା ବିକଳ୍ପକୁ ଛଡ଼ାଇ ନେଉଥିବା ସରକାରଙ୍କ ପକ୍ଷରୁ କୁହାଯାଇଛି। କମ୍ପାନୀ ୟୁରୋପ ଏବଂ ଭାରତ ବଜାର ଲାଗି ଭିନ୍ନ ନୀତି ଆପଣାଇଛି। ଏହାଦ୍ୱାରା ଭାରତୀୟ ନାଗରିକଙ୍କ ଅଧିକାର ଏବଂ ସ୍ବାର୍ଥକୁ କମ୍ପାନୀ ସମ୍ମାନ ଜଣାଉ ନ ଥିବାରୁ ସରକାର ଚିନ୍ତା ପ୍ରକଟ କରୁଥିବା ଅଧିକାରୀ ଜଣକ କହିଛନ୍ତି।
