ଭୁବନେଶ୍ୱର,୨ା୯(ସୂର୍ଯ୍ୟକାନ୍ତ ବେହେରା): ପୋଲିସ ଇନ୍ସପେକ୍ଟର ପରିଚୟ ଦେଇ ଯୁବତୀମାନଙ୍କୁ ପ୍ରେମ ଜାଲରେ ଫସାଇ ବିବାହ କରୁଥିଲେ। ଶାରୀରିକ ସମ୍ପର୍କ ରଖିବା ସହ ସେମାନଙ୍କଠାରୁ ଟଙ୍କା ଠକି ନେଉଥିଲେ। ଏଭଳି ଜଣେ ନକଲି ଇନ୍ସପେକ୍ଟରଙ୍କୁ ଖଣ୍ଡଗିରି ଥାନା ପୋଲିସ ଗିରଫ କରିଛି। ଅଭିଯୁକ୍ତ ହେଲେ ଭଦ୍ରକର ୫୫ବର୍ଷୀୟ ସୁବାସ ଚନ୍ଦ୍ର କହଁର। ତାଙ୍କଠାରୁ ନକଲି ଆଧାର କାର୍ଡ, ପୋଲିସ ପୋଷାକ ପିନ୍ଧା ଫଟୋ ଓ ବିବାହ ଫଟୋ ଜବତ କରାଯାଇଛି। ଅଭିଯୁକ୍ତ ମିଛ ପରିଚୟ ଦେଇ ୩ ଜଣଙ୍କୁ ବିବାହ କରିଥିବା ପୋଲିସ ତଦନ୍ତ ବେଳେ ଜାଣିବାକୁ ପାଇଛି। ତେବେ ଜଣେ ପୀଡ଼ିତା ଆଗକୁ ଆସି ଅଭିଯୁକ୍ତଙ୍କ ନାଁରେ ଥାନାରେ ଅଭିଯୋଗ କରିବାରୁ ଘଟଣା ସାମ୍ନାକୁ ଆସିଛି। ଅଭିଯୋଗକାରିଣୀ ଯୁବତୀ ଜଣଙ୍କୁ ବିବାହ ପରେ ଅଭିଯୁକ୍ତ ସୁବାସ ଟଙ୍କା ଠକି ନେଇଥିବାରୁ ସେ ଏଭଳି ଅନ୍ୟମାନଙ୍କୁ ବିବାହ କରିବା ପରେ ଠକେଇ କରିଥିବା ସନ୍ଦେହ କରାଯାଉଛି। ତେଣୁ ଏ ଦିଗରେ ପୋଲିସ ଅଧିକ ତଦନ୍ତ ଚଳାଇଛି।
ପୋଲିସ ସୂଚନାନୁସାରେ, ଅଭିଯୁକ୍ତ ସୁବାସ ନିଜକୁ ଇନ୍ସପେକ୍ଟର ମନୋଜ କୁମାର ମିଶ୍ର ଭାବେ ପରିଚୟ ଦେଉଥିଲେ। ଏପରିକି ଫେସ୍ବୁକରେ ନିଜକୁ ଇନ୍ସପେକ୍ଟର ଭାବେ ଉଲ୍ଲେଖ କରିଥିଲେ। ବୟସ ୫୫ ବର୍ଷ ହୋଇଥିଲେ ମଧ୍ୟ ଫଟୋ ଏଡିଟ୍ କରି ପ୍ରୋଫାଇଲରେ ରଖିଥିଲେ। ଏହି ଫେସ୍ବୁକ୍ ଆକାଉଣ୍ଟ ଜରିଆରେ ସେ ଅଭିଯୋଗକାରିଣୀଙ୍କ ପାଖକୁ ପ୍ରଥମେ ଫ୍ରେଣ୍ଡ୍ ରିକ୍ୟୁଏଷ୍ଟ ପଠାଇ କଥା ହୋଇଥିଲେ। ଧୀରେ ଧୀରେ କଥା ହେବା ପରେ ତାଙ୍କୁ ପ୍ରେମ ନିବେଦନ କରିଥିଲେ। ତାଙ୍କ ମନରେ ଯେପରି ସନ୍ଦେହ ନ ହେବ, ସେଥିପାଇଁ ପୋଲିସ ଡ୍ରେସ୍ରେ ଫଟୋ ଏଡିଟ କରି ତାଙ୍କ ପାଖକୁ ପଠାଇଥିଲେ। ଗାଡ଼ିରେ ଯାଉଥିବାବେଳେ ବା କୌଣସି କୋଠାରେ ପୋଲିସ ପୋଷାକରେ ବସି ଥିବାବେଳର ଫଟୋ ପଠାଇ ବିଶ୍ୱାସ ଜନ୍ମାଇଥିଲେ। ରାଉରକେଲା ସେକ୍ଟର ୧୫ ଥାନାରେ ଇନ୍ସପେକ୍ଟର ଥିବା କହିଥିଲେ। ଏହାପରେ ଅଭିଯୁକ୍ତ ସୁବାସ ଯୁବତୀଙ୍କୁ ବିବାହ ପ୍ରସ୍ତାବ ଦେବାରୁ ସେ ରାଜି ହୋଇ ପରବର୍ତ୍ତୀ ସମୟରେ ବିବାହ କରିଥିଲେ। ବିବାହ ପରେ ତାଙ୍କ ସହ ଶାରୀରିକ ସମ୍ପର୍କ ରଖିଥିଲେ। କିନ୍ତୁ ସତ ଧରାପଡ଼ିଯିବା ଭୟରେ ଅଭିଯୁକ୍ତ ବିଭିନ୍ନ ବାହାନ ଦେଖାଇ ତାଙ୍କୁ ଘରକୁ ନ ନେଇ ଖଣ୍ଡଗିରି ସରକନ୍ତରାସ୍ଥିତ ଏକ ଭଡାଘରେ ରଖିଥିଲେ। ଫଳରେ ଯୁବତୀ ଜଣଙ୍କର ସନ୍ଦେହ ହେବାରୁ ସେ ଅଭିଯୁକ୍ତ ସୁବାସଙ୍କ ଉପରେ ଟିକିନିଖି ନଜର ରଖିଥିଲେ। ଏହି ସମୟରେ ତାଙ୍କ କାର୍ଯ୍ୟକଳାପ ଉପରେ ସନ୍ଦେହ ବଢ଼ିବାରୁ ସେ ସୁବାସ ଚଢୁଥିବା ଏକ ସୁଇଫ୍ଟ ଡିଜାୟାର କାରର ରେଜିଷ୍ଟ୍ରେଶନ ନମ୍ବର ଜରିଆରେ ପ୍ରକୃତ ସତ ଜାଣିବାକୁ ପାଇଥିଲେ। ଏହାପରେ ପୀଡିତା ଜଣକ ଏ ନେଇ ଥାନାରେ ଏତଲା ପରେ ପୋଲିସ ଅଭିଯୁକ୍ତ ସୁବାସଙ୍କୁ ଗିରଫ କରିବା ସହ ତାଙ୍କ କେଳେଙ୍କାରୀର ପର୍ଦ୍ଦାଫାଶ କରିଛି।
