ଭୁବନେଶ୍ୱର, ୧୫।୧୨ (କ୍ରୀଡ଼ା ପ୍ରତିନିଧି): ବର୍ଷ ଶେଷରେ ଓଡ଼ିଶା ଚେସ୍ ପାଇଁ ଆସିଛି ଏକ ଖୁସି ଖବର। ରାଜ୍ୟର ପ୍ରତିଭାସମ୍ପନ୍ନ ଚେସ୍ ଖେଳାଳି ସମ୍ବିତ ପଣ୍ଡା ଅନ୍ତର୍ଜାତୀୟ ମାଷ୍ଟର (ଆଇଏମ୍) ଟାଇଟଲ ହାସଲ କରିଛନ୍ତି। ଅନ୍ତର୍ଜାତୀୟ ଚେସ୍ ମହାସଙ୍ଘ (ଫିଡେ) ପକ୍ଷରୁ ସମ୍ବିତଙ୍କୁ ଆଇଏମ୍ ଟାଇଟଲ ପ୍ରଦାନ କରାଯାଇଛି। ୧୮ ବର୍ଷୀୟ ସମ୍ବିତ ନିକଟରେ ଦିଲ୍ଲୀରେ ଆୟୋଜିତ ଏସିଆନ୍ କଣ୍ଟିନେଣ୍ଟାଲ ଚେସ୍ ଚାମ୍ପିୟନଶିପ୍ରେ ତୃତୀୟ ତଥା ଅନ୍ତିମ ଆଇଏମ୍ ନର୍ମ ପାଇଛନ୍ତି। ସେହିପରି ଟୁରିନଠାରେ ଅନୁଷ୍ଠିତ ଟୋରିନୋ ଅନ୍ତର୍ଜାତୀୟ ଓପନ୍ ଚେସ୍ ଚାମ୍ପିୟନଶିପ୍ରେ ସେ ଟାଇଟଲ ହାସଲ ପାଇଁ ଆବଶ୍ୟକ ଅନ୍ତର୍ଜାତୀୟ ରେଟିଂ ଅତିକ୍ରମ କରିଛନ୍ତି। ଚଳିତ ବର୍ଷ କାନପୁରଠାରେ ଆୟୋଜିତ ଜାତୀୟ ସିନିୟର ଚେସ୍ ପ୍ରତିଯୋଗିତାରେ ସେ ପ୍ରଥମ ଏବଂ ଗତ ସେପ୍ଟେମ୍ବରରେ ଦୁବାଇଠାରେ ଆୟୋଜିତ ଦୁବାଇ ଓପନ୍ ଚେସ୍ରେ ଦ୍ୱିତୀୟ ଆଇଏମ୍ ନର୍ମ ହାସଲ କରିଥିଲେ।
ସମ୍ବିତଙ୍କୁ ମିଶାଇ ଓଡ଼ିଶାର ଅନ୍ତର୍ଜାତୀୟ ମାଷ୍ଟର ଟାଇଟଲଧାରୀଙ୍କ ସଂଖ୍ୟା ୭ରେ ପହଞ୍ଚତ୍ଛି। ପୂର୍ବରୁ ଶେଖର ସାହୁ, ସ୍ବୟଂଶୁ ସତ୍ୟପ୍ରଜ୍ଞ, ଅନ୍ବେଷ ଉପାଧ୍ୟାୟ, ସିଦ୍ଧାନ୍ତ ମହାପାତ୍ର, ରାକେଶ ଜେନା, ପଦ୍ମିନୀ ରାଉତ ଏହି କ୍ଲବର ସଦସ୍ୟ ଅଛନ୍ତି। ଦେବାଶିଷ ଦାସ ଓ ସ୍ବୟମ୍ସ ମିଶ୍ର ଗ୍ରାଣ୍ଡମାଷ୍ଟର ଟାଇଟଲ ହାସଲ କରିଥିବାବେଳେ କିରଣ ମନୀଷା ମହାନ୍ତି ମହିଳା ଗ୍ରାଣ୍ଡମାଷ୍ଟର ଓ ସାଇନା ସାଲୋନିକା ମହିଳା ଅନ୍ତର୍ଜାତୀୟ ମାଷ୍ଟର ଟାଇଟଲଧାରୀ ଅଛନ୍ତି। ସମ୍ବିତ ସ୍ଥାନୀୟ ୟୁନିଟ୍-୮ସ୍ଥିତ ଡିଏଭି ପବ୍ଲିକ୍ ସ୍କୁଲର ଛାତ୍ର। ୧୨ ବର୍ଷ ପୂର୍ବେ ସେ ତାଙ୍କର ପ୍ରଥମ ପ୍ରଶିକ୍ଷକ ରାଜ ସନ୍ତୋଷ ପଣ୍ଡାଙ୍କଠାରୁ କୋଚିଂ ନେଇ ଚେସ୍ କ୍ୟାରିୟର ଆରମ୍ଭ କରିଥିଲେ। ଆଇଏମ୍ ଟାଇଟଲ ହାସଲ କରିଥିବାରୁ ସେ ତାଙ୍କ ମା’, ବାପା, ବର୍ତ୍ତମାନର ପ୍ରଶିକ୍ଷକ ଆଇଏମ୍ ସ୍ବୟଂଶୁ ସତ୍ୟପ୍ରଜ୍ଞ ଏବଂ ଏସ୍. କିଡାମ୍ବିଙ୍କୁ ଧନ୍ୟବାଦ ଜଣାଇଛନ୍ତି। ଓଡ଼ିଶାର ପ୍ରଥମ ଅନ୍ତର୍ଜାତୀୟ ମାଷ୍ଟର ତଥା ବର୍ତ୍ତମାନର କୋଚ୍ ସ୍ବୟଂଶୁ ଏହି ଟାଇଟଲ ପାଇଁ ସମ୍ବିତଙ୍କୁ ଅଭିନନ୍ଦନ ଜଣାଇଛନ୍ତି। ରାଜ୍ୟ ସରକାରଙ୍କ ସହଯୋଗ ଯୋଗୁ ସେ କମ୍ ବୟସରେ ଏହି ଟାଇଟଲ ହାସଲ କରିବାରେ ସକ୍ଷମ ହୋଇ ପାରିଛନ୍ତି। ଭବିଷ୍ୟତରେ ଗ୍ରାଣ୍ଡ୍ ମାଷ୍ଟର ଟାଇଟଲ ହାସଲ ଲକ୍ଷ୍ୟ ରହିଛି ବୋଲି ସମ୍ବିତ ନିଜ ପ୍ରତିକ୍ରିୟାରେ ପ୍ରକାଶ କରିଛନ୍ତି। ଅଲ୍ ଓଡ଼ିଶା ଚେସ୍ ଆସୋସିଏଶନ ସଭାପତି ଜି. ସି. ମହାପାତ୍ର, ସମ୍ପାଦକ ଦେବବ୍ରତ ଭଟ୍ଟ, ସର୍ବଭାରତୀୟ ଚେସ୍ ମହାସଙ୍ଘର ଯୁଗ୍ମ ସମ୍ପାଦକ ରଞ୍ଜନ ମହାନ୍ତି, ଏସ୍.ଆର. ଚେସ୍ ସେଣ୍ଟର ସମ୍ପାଦକ ତଥା ପ୍ରତିଷ୍ଠିତ ପ୍ରଶିକ୍ଷକ ସତ୍ୟରଞ୍ଜନ ପଟ୍ଟନାୟକ ମଧ୍ୟ ସମ୍ବିତଙ୍କୁ ଅଭିନନ୍ଦନ ଜଣାଇଛନ୍ତି।