ମସ୍କୋ,୭ା୩: ରୁଷିଆରେ ଜଣେ ଭାରତୀୟ ନାଗରିକଙ୍କ ମୃତ୍ୟୁ ଘଟିଥିବା ବୁଧବାର ସେଠାକାର ଅବସ୍ଥାପିତ ଜଣେ ଭାରତୀୟ ଅଧିକାରୀ ସୂଚନା ଦେଇଛନ୍ତି। ମୃତକଙ୍କ ନାମ ମହମ୍ମଦ ଅସଫାନ୍। ତାଙ୍କୁ ୟୁକ୍ରେନ୍ ବିରୋଧରେ ରୁଷିଆ ପକ୍ଷରୁ ଯୁଦ୍ଧ ଲଢ଼ିବା ପାଇଁ ବାଧ୍ୟ କରାଯାଇଥିବା ଅଧିକାରୀ ଜଣକ କହିଛନ୍ତି। ତେବେ ମୃତକଙ୍କ ସମ୍ପର୍କରେ ସେ ଅଧିକ ତଥ୍ୟ ଦେଇନାହାନ୍ତି। ଅସଫାନ୍ଙ୍କ ପରିବାର ଲୋକେ ଏନେଇ ହାଇଦ୍ରାବାଦ ଏମ୍ପି ତଥା ଏଆଇଏମ୍ଆଇଏମ୍ ଅଧ୍ୟକ୍ଷ ଅସାଦୁଦ୍ଦିନ ଓଓ୍ବାଇସିଙ୍କୁ ଜଣାଇଛନ୍ତି। ଓଓ୍ବାଇସି ମସ୍କୋରେ ଥିବା ଭାରତୀୟ ଦୂତାବାସ ସହ ଯୋଗାଯୋଗ କରିବା ପରେ ଅସଫାନ୍ ହାଇଦ୍ରାବାଦ ବାସିନ୍ଦା ବୋଲି ସ୍ପଷ୍ଟ କରିଛନ୍ତି। ତାଙ୍କ ମୃତଦେହକୁ ଭାରତକୁ ଫେରାଇ ଆଣିବା ପାଇଁ ଉଦ୍ୟମ ଚାଲିଛି। ପ୍ରକାଶ ଯେ, ୨୦ରୁ ଅଧିକ ଭାରତୀୟଙ୍କୁ ରୁଷିଆରେ ନିଯୁକ୍ତି ଦେବା ପ୍ରଲୋଭନ ଦେଖାଇ ସେଠାର ସେନାରେ ଭର୍ତ୍ତି କରାଯାଇଛି। ଏହି ଯୁବକମାନଙ୍କ ମଧ୍ୟରୁ ୭ ଜଣ ଉଦ୍ଧାର ପାଇଁ ମଙ୍ଗଳବାର କେନ୍ଦ୍ର ସରକାରଙ୍କ ଉଦ୍ଦେଶ୍ୟରେ ଏକ ଭିଡିଓ ଜାରି କରିଥିଲେ।
