ନୂଆଦିଲ୍ଲୀ,୧୧ା୨: ନିଶା ସାମଗ୍ରୀ କାରବାର ରୋକିବା ପାଇଁ ୧୯୮୫ ମସିହାରୁ ଭାରତରେ ନାର୍କୋଟିକ୍ ଡ୍ରଗ୍ସ ଆଣ୍ଡ ସାଇକୋଟ୍ରୋପିକ୍ ସବ୍ଷ୍ଟାନ୍ସେସ୍ (ଏନ୍ଡିପିଏସ୍) ଆଇନ ପ୍ରଚଳିତ। ଅନ୍ତର୍ଜାତୀୟ ଡ୍ରଗ୍ ସିଣ୍ଡିକେଟ୍ ସଦସ୍ୟମାନେ ଏହି ଆଇନକୁ ଫାଙ୍କି ଗଳିଯାଉଛନ୍ତି। ଏଭଳି ଗଞ୍ଜେଇ ଓ ଅଫିମ ଚାଲାଣକାରୀମାନଙ୍କୁ କେନ୍ଦ୍ର ସରକାର ଏବଂ ତଦନ୍ତକାରୀ ସଂସ୍ଥାଗୁଡ଼ିକ ଗିରଫ କରୁନାହାନ୍ତି। ଚାଷୀ ଓ ବସ୍ଷ୍ଟାଣ୍ଡରେ ଛିଡ଼ା ହୋଇଥିବା ଲୋକଙ୍କୁ ସେମାନେ ଧରୁଛନ୍ତି ବୋଲି ଶୁକ୍ରବାର ସୁପ୍ରିମକୋର୍ଟ ଅସନ୍ତୋଷ ବ୍ୟକ୍ତ କରିଛନ୍ତି।
ଜମିରେ ଅଫିମ ଚାଷ କରିବା ଅଭିଯୋଗରେ ସବିର ନାମକ ଜଣେ ବ୍ୟକ୍ତି ଗିରଫ ହୋଇଥିଲେ। ଅଭିଯୁକ୍ତ ୫ ବର୍ଷରୁ ଊର୍ଦ୍ଧ୍ୱ ସମୟ ଜେଲରେ ରହିସାରିବା ପରେ ସୁପ୍ରିମକୋର୍ଟରେ ଜାମିନ ଆବେଦନ କରିଥିଲେ। ଭାରତର ପ୍ରଧାନ ବିଚାରପତି (ସିଜେଆଇ) ଡି.ଓ୍ବାଇ. ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ତଥା ଜଷ୍ଟିସ୍ ପି.ଏସ୍. ନରସିଂହ ଏବଂ ଜେ.ବି. ପର୍ଡିଓ୍ବାଲାଙ୍କୁ ନେଇ ଗଠିତ ଖଣ୍ଡପୀଠ ତାଙ୍କ ଜାମିନ ଆବେଦନର ଶୁଣାଣି କରି କହିଛନ୍ତି, ଭାରତ ସରକାର ଓ ତଦନ୍ତକାରୀ ସଂସ୍ଥାଗୁଡ଼ିକ ବଡ଼ମାଛଙ୍କୁ ଗିରଫ କରୁନାହାନ୍ତି। ଅନ୍ତର୍ଜାତୀୟ ଡ୍ରଗ୍ ସିଣ୍ଡିକେଟ ପଛରେ କାହିଁକି ଗୋଡ଼ାଉନାହାନ୍ତି? ସେମାନଙ୍କୁ ଧରିବାକୁ ଚେଷ୍ଟା କରନ୍ତୁ। କେବଳ ଚାଷୀ ଏବଂ ବସ୍ଷ୍ଟାଣ୍ଡ ତଥା ଅନ୍ୟ କୌଣସି ସ୍ଥାନରେ ଛିଡ଼ା ହୋଇଥିବା ଚୂନାମାଛଙ୍କୁ ଧରିଲେ କ’ଣ ହେବ ବୋଲି ଖଣ୍ଡପୀଠ ପ୍ରଶ୍ନ କରିଥିଲେ।
ସରକାର ଓ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନ୍ସିବି) ପକ୍ଷରୁ ପ୍ରତିନିଧିତ୍ୱ କରୁଥିବା ଅତିରିକ୍ତ ସଲିସିଟର ଜେନେରାଲ ବିକ୍ରମଜିତ୍ ବାନାର୍ଜୀ ଅଭିଯୁକ୍ତ ସବିରଙ୍କ ଜାମିନ ଆବେଦନକୁ ବିରୋଧ କରିଥିଲେ। ବିକ୍ରମଜିତ୍ କହିଥିଲେ, ସବିରଙ୍କ ଚାଷଜମିରୁ ମିଳିଥିବା ଅଫିମର ପରିମାଣ କମ୍ ନୁହେଁ। ସେ ଏହା ପୂର୍ବରୁ ମଧ୍ୟ ୨ ଥର ଦୋଷୀ ସାବ୍ୟସ୍ତ ହୋଇଛନ୍ତି। ଖଣ୍ଡପୀଠ କହିଲେ, ଜବତ ହୋଇଥିବା ସାଇକୋଟ୍ରୋପିକ୍ ସବ୍ଷ୍ଟାନ୍ସ (ମନଃପ୍ରଭାବୀ ଦ୍ରବ୍ୟ)ର ପରିମାଣ ଅନୁସାରେ ସର୍ବାଧିକ ୧୦ ବର୍ଷ ଜେଲଦଣ୍ଡର ବ୍ୟବସ୍ଥା ରହିଛି। ଅଭିଯୁକ୍ତ ୫ ବର୍ଷରୁ ଅଧିକ ସମୟ ଜେଲରେ ଦଣ୍ଡ ଭୋଗିସାରିଲେଣି। ଏମାନେ ସ୍ବଳ୍ପକାଳୀନ ଚାଷୀ ହୋଇଥିବାରୁ ନିଜ ଅପରାଧ ପାଇଁ ଜାମିନ ପାଇପାରୁ ନାହାନ୍ତି। ଅଭିଯୁକ୍ତ ସବିର ଜାମିନ ପାଇବାକୁ ଯୋଗ୍ୟ କହି ଖଣ୍ଡପୀଠ ରାଜ୍ୟ ସରକାର ଏବଂ ଏନ୍ସିବିର ନିବେଦନକୁ ଅଗ୍ରାହ୍ୟ କରିଦେଇଛନ୍ତି।
