ନିଶ୍ଚିନ୍ତକୋଇଲି,୭।୭(ଅଶୋକ କୁମାର ମହାପାତ୍ର): କଟକ ଜିଲା ନିଶ୍ଚିନ୍ତକୋଇଲି ବ୍ଲକ ସମନ୍ବିତ ଶିଶୁ ବିକାଶ ପ୍ରକଳ୍ପ କାର୍ଯ୍ୟାଳୟରେ ବହୁ ପଦବୀ ଖାଲି ପଡିଛି। ଏଠାରେ କାର୍ଯ୍ୟରତ ପିଅନଙ୍କ ମୃତ୍ୟୁ ଘଟିଛି। ଏଥିସହ ୨ ସୁପରଭାଇଜର ପଦବୀ ମଧ୍ୟ ଖାଲି ପଡ଼ିଛି। ଫଳରେ ସରକାରଙ୍କ ଯୋଜନାକୁ ସଫଳ ରୂପାୟନ କରିବାରେ ସମସ୍ୟା ସୃଷ୍ଟି ହୋଇଛି। ସିଡିପିଓଠାରୁ ସୁପରଭାଇଜର ପର୍ଯ୍ୟନ୍ତ ସଭିଏଁ ଅଫିସ କାର୍ଯ୍ୟରେ ବ୍ୟସ୍ତ ରହୁଥିବାରୁ ଅଙ୍ଗନଓ୍ବାଡିକେନ୍ଦ୍ର ପରିଦର୍ଶନ ଠିକ୍ ଢଙ୍ଗରେ ହୋଇପାରୁନାହିଁ। ଏହାର ସୁଯୋଗ ନେଇ ଅଙ୍ଗନୱାଡି କେନ୍ଦ୍ରଗୁଡ଼ିକ ମନମୁଖିଭାବେ କାମ କରୁଛନ୍ତି।
ନିଶ୍ଚିନ୍ତକୋଇଲି ବ୍ଲକ ସମନ୍ବିତ ଶିଶୁ ବିକାଶ ପ୍ରକଳ୍ପ କାର୍ଯ୍ୟାଳୟ ଅଧୀନରେ କଟକ ସଦର ନିର୍ବାଚନ ମଣ୍ଡଳୀର ୧୪ ଓ ମାହାଙ୍ଗା ନିର୍ବାଚନ ମଣ୍ଡଳୀର ୨୭ ପଞ୍ଚାୟତ ରହିଛି। ଏହି ୪୧ ପଞ୍ଚାୟତ ଅଧିନରେ ୨୮୪ ଅଙ୍ଗନୱାଡି ଓ ୨୫ଟି ମିନି ଅଙ୍ଗନୱାଡି କେନ୍ଦ୍ର ରହିଛି। ଏହି କେନ୍ଦ୍ରଗୁଡିକୁ ପରିଚାଳନା କରିବା ନିମନ୍ତେ ୧୧ ଜଣ ପରିଦର୍ଶିକାଙ୍କ ଆବଶ୍ୟକ ଥିବା ବେଳେ ୨ ପଦବୀ ଖାଲି ପଡ଼ିଛି। ଫଳରେ ୯ ଜଣ ପରିଦର୍ଶିକାଙ୍କ ପକ୍ଷରେ ଏତେବଡ ଅଞ୍ଚଳକୁ ନେଇ କାର୍ଯ୍ୟ କରିବା କାଠିକର ହୋଇଯାଇଛି। ସେହିପରିଭାବେ କାର୍ଯ୍ୟାଳୟର ବରିଷ୍ଠ କିରାଣି ମେ ୩୧ରେ ନିଶ୍ଚିନ୍ତକୋଇଲି ତହସିଲକୁ ବଦଳି ହୋଇଯାଇଛନ୍ତି। ଏଠାରେ ଏପର୍ଯ୍ୟନ୍ତ କୌଣସି ବରିଷ୍ଠ କିରାଣିଙ୍କୁ ଦିଆଯାଇ ନ ଥିବାବେଳେ କାର୍ଯ୍ୟାଳୟର ଜୁନିୟର କିରାଣିଙ୍କ ବଦଳି ମାର୍ଚ୍ଚ ୨୭ରୁ ହୋଇଯାଇଛି। ପିଅନ କ୍ଷେତ୍ରବାସୀ ସ୍ବାଇଁଙ୍କ ଗତ ଏପ୍ରିଲ ୨୦ରେ ଅକାଳ ବିୟୋଗ ଘଟିଛି। ମାତ୍ର ଏର୍ପ୍ୟନ୍ତ କୌଣସି ନୂତନ ନିଯୁକ୍ତି ହୋଇନାହିଁ। ଏହି କାର୍ଯ୍ୟାଳୟ ଅଧୀନରେ ଥିବା ୨୮୪ ଅଙ୍ଗନୱାଡ଼ି କେନ୍ଦ୍ର ମଧ୍ୟରୁ ୨ଟି କେନ୍ଦ୍ରରେ ଅଙ୍ଗନୱାଡି କର୍ମୀ ପଦବୀ ଖାଲି ପଡିଛି। ଗୋଟିକରେ ସହାୟିକା ପଦବୀ ଖାଲି ପଡିଛି। ଅପରପକ୍ଷେ କାର୍ଯ୍ୟାଳୟରେ ଆବଶ୍ୟକ କର୍ମଚାରୀ ନ ଥିବାରୁ ଦୈନନ୍ଦିନ ଦୂର ଦୂରାନ୍ତରୁ ବହୁ ସଂଖ୍ୟାରେ ଗର୍ଭବତୀ, ମହିଳା ସେମାନଙ୍କ ଶିଶୁକୁ ନେଇ ବିଭିନ୍ନ କାମରେ କାର୍ଯ୍ୟାଳୟକୁ ଆସି ନିରାଶ ହେଉଛନ୍ତି। ପ୍ରଶାସନିକ ସ୍ତରରେ ତୁରନ୍ତ ଏହି ପଦବୀଗୁଡିକୁ ପୁରଣ କରାଯିବା ନିମନ୍ତେ ସାମାଜିକ କର୍ମର ରମେଶ ଚନ୍ଦ୍ର ସ୍ବାଇଁ, ଅମିୟ କୁମାର ବିଶ୍ୱାଳ,ପୂର୍ବତନ ସରପଞ୍ଚ ଦିଲୀପ କୁମାର ରାଉତ ପ୍ରମୁଖ ଦାବି କରିଛନ୍ତି। ଏସମ୍ପର୍କରେ ସିଡିପିଓ ସତ୍ୟଭାମା ବିଶୋଇ କୁହନ୍ତି, ସେ ନୂଆ କରି କାର୍ଯ୍ୟରେ ଯୋଗଦେଇଛନ୍ତି। ପଦବୀଖାଲି ପଡିଥିବା କାରଣରୁ ସମସ୍ତ କାର୍ଯ୍ୟ ଠିକ ଭାବେ କରିହେଉ ନାହିଁ। ଏସମ୍ପର୍କରେ ଉଚ୍ଚ କର୍ତ୍ତୃପକ୍ଷଙ୍କୁ ଅବଗତ କରାଯିବ ବୋଲି ସେ ପ୍ରକାଶ କରିଛନ୍ତି।
