ଭୁବନେଶ୍ୱର,୧।୬: ଭାରତୀୟ ଷ୍ଟେଟ୍ ବ୍ୟାଙ୍କ (ଏସ୍ବିଆଇ)ର ଜଟଣୀ ଶାଖା ତଥା ଖୋର୍ଦ୍ଧା କ୍ଷେତ୍ରୀୟ କାର୍ଯ୍ୟାଳୟ ପକ୍ଷରୁ ଖୋର୍ଦ୍ଧା ଜିଲା ପଞ୍ଚୁପଲ୍ଲୀ ଗ୍ରାମପଞ୍ଚାୟତଠାରେ ଏକ ଜନ ସୁରକ୍ଷା ସମ୍ପୂତ୍ତି କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏଥିରେ ମୁଖ୍ୟ ଅତିଥି ଭାବେ ଏସ୍ବିଆଇର ମହାପ୍ରବନ୍ଧକ ପୋନ୍ନମବଲମ ଏମ୍ ସମ୍ମାନିତ ଅତିଥି ଭାବେ ଓଡ଼ିଶା ଜୀବିକା ମିଶନର ଖୋର୍ଦ୍ଧା ଜିଲାର ପ୍ରକଳ୍ପ ପ୍ରବନ୍ଧକ ବିବେକ ବେଉରିଆ, ସରପଞ୍ଚ ବନଜା ଜେନା, ସମିତି ସଭ୍ୟା ଇତିଶ୍ରୀ ଜେନା, ଏସ୍ବିଆଇ ଖୋର୍ଦ୍ଧା-ନୟାଗଡ଼ କ୍ଷେତ୍ରର କ୍ଷେତ୍ରୀୟ ପ୍ରବନ୍ଧକ ନରେନ୍ଦ୍ର କୁମାର ଜେନା, ଏସବ୍ିଆଇର ସହାୟକ ମହାପ୍ରବନ୍ଧକ ତପନ କୁମାର ସାହୁ ପ୍ରମୁଖ ଯୋଗଦେଇଥିଲେ। ଏହି ଅବସରରେ ପଞ୍ଚୁପଲ୍ଲୀ ଗ୍ରାମ ପଞ୍ଚାୟତର ୨ଶହରୁ ଅଧିକ ଗ୍ରାମବାସୀ, ଅନେକ ଋଣ ଗ୍ରାହକ, ସ୍ବୟଂ ସହାୟକ ଗୋଷ୍ଠୀର ସଦସ୍ୟା, ଅଗ୍ରଣୀ କୃଷକ, ବହୁ ସମାଜସେବୀ ଏବଂ ଏସ୍ବିଆଇର ବହୁ କର୍ମକର୍ତ୍ତା ତଥା ବହୁ ଉପରସ୍ଥି ଅଧିକାରୀ ଉପସ୍ଥିତ ଥିଲେ। କ୍ଷେତ୍ରୀୟ ପ୍ରବନ୍ଧକ ନରେନ୍ଦ୍ର କୁମାର ଜେନା ସ୍ବାଗତ ଅଭିଭାଷଣ ଦେଇଥିଲେ। ମହାପ୍ରବନ୍ଧକ ପୋନ୍ନମବଲମ ଏମ୍, ପ୍ରଧାନମନ୍ତ୍ରୀ ଜୀବନଜ୍ୟୋତି ବୀମା ଯୋଜନା ଏବଂ ପ୍ରଧାନମନ୍ତ୍ରୀ ସୁରକ୍ଷା ବୀମା ଯୋଜନା ଉପରେ ଆଲୋକପାତ କରିବା ସହ ବୀମା କିପରି ପ୍ରତ୍ୟେକ ନାଗରିକଙ୍କ ପାଇଁ ନିହାତି ଆବଶ୍ୟକ ସେ ସମ୍ପର୍କରେ ସଚେତନ କରାଇଥିଲେ। ଏହା ବ୍ୟତୀତ ସରକାରଙ୍କ ପ୍ରାୟୋଜିତ ବିଭିନ୍ନ ପ୍ରକାର ଋଣର ଅଭିବୃଦ୍ଧି ତଥା ଗୃହ, ଶିକ୍ଷା, କୃଷି ଏବଂ କ୍ଷୁଦ୍ରଶିଳ୍ପଗୁଡିକୁ ସହଜରେ ଋଣ ପ୍ରଦାନ କରିବା ପାଇଁ ଭାରତୀୟ ଷ୍ଟେଟ ବ୍ୟାଙ୍କ କିପରି ମୁଖ୍ୟ ଭୂମିକା ଗ୍ରହଣ କରିଛି, ତତ୍ସମ୍ପର୍କିତ ବିବରଣୀ ଦେଇଥିଲେ। ଉକ୍ତ କାର୍ଯ୍ୟକ୍ରମରେ ଶତାଧିକ କୃଷି ଋଣ ଏବଂ ସ୍ବୟଂ ସହାୟକ ଗୋଷ୍ଠୀ ଋଣର ନବୀକରଣ ଆବେଦନ ଗ୍ରହଣ କରାଯାଇଥିଲା। ସେହିଭଳି ପଞ୍ଚୁପଲ୍ଲୀ ଗ୍ରାମପଞ୍ଚାୟତର ଅଗ୍ରଣୀ କୃଷକ ଏବଂ ସମାଜସେବୀମାନଙ୍କୁ ସମ୍ବର୍ଦ୍ଧିତ କରାଯାଇଥିଲା। ଉକ୍ତ କାର୍ଯ୍ୟକ୍ରମକୁ ଏସବ୍ିଆଇ ଜଟଣୀ ଶାଖାର ମୁଖ୍ୟ ପ୍ରବନ୍ଧକ ସୁଜତି କୁମାର ବେହେରା ଏବଂ ମୁଖ୍ୟ ପ୍ରବନ୍ଧକ ଉମାକାନ୍ତ ପୂଜାରୀ ପରିଚାଳନା କରିଥିଲେ। ଭାରତୀୟ ଷ୍ଟେଟ ବ୍ୟାଙ୍କ ତତ୍ତ୍ୱାବଧାନରେ ଏଭଳି ଗ୍ରାମପଞ୍ଚାୟତ ସ୍ତରୀୟ ଆୟୋଜନକୁ ପଞ୍ଚାୟତ ତଥା ଜିଲାର ବିଭିନ୍ନ ମହଲରୁ ବହୁ ପ୍ରଶଂସା ମିଳିଛି।
