କଟକ ଅଫିସ, ୪ା୮:ଓଡ଼ିଶା ହ୍ୟୁମାନ ରାଇଟ୍ସ କମିଶନ (ଓଏଚ୍ଆର୍ସି)ରେ ଖାଲି ପଡିଥିବା ସଦସ୍ୟ ପଦବୀ ଆସନ୍ତା ୨ ମାସ ମଧ୍ୟରେ ପୂରଣ କରିବାକୁ ହାଇକୋର୍ଟ ଗୁରୁବାର ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ହାଇକୋର୍ଟ ବିଚାରପତି ଶୁଭାଶିଷ ତାଳପତ୍ର ଓ ବିଚାରପତି ସାବିତ୍ରୀ ରଥଙ୍କୁ ନେଇ ଗଠିତ ଖଣ୍ଡପୀଠ ମାମଲାର ଶୁଣାଣି କରି ଏହି ନିର୍ଦ୍ଦେଶ ଦେବା ସହ ମାମଲାର ଅନ୍ତ ଘଟାଇଛନ୍ତି।
ସୂଚନା ଅନୁଯାୟୀ, ଓଏଚ୍ଆର୍ସିରେ ସଦସ୍ୟ ପଦବୀ ଖାଲି ପଡ଼ିବା ନେଇ ଆଇନଜୀବୀ ପ୍ରବୀର ଦାସ ହାଇକୋର୍ଟରେ ଗତ ମେ’ ୫ ତାରିଖରେ ଜନସ୍ବାର୍ଥ ମାମଲା ଦାଏର କରିଥିଲେ। ହାଇକୋର୍ଟ ଏହାର ଶୁଣାଣି କରି ଅଗଷ୍ଟ ୩ ତାରିଖ ସୁଦ୍ଧା ଖାଲି ପଦବୀ ପୂରଣ ପାଇଁ ନିର୍ଦ୍ଦେଶ ଦେଇଥିଲେ। ହେଲେ ନିର୍ଦ୍ଧାରିତ ସମୟ ସୁଦ୍ଧା ପଦବୀ ପୂରଣ ହୋଇ ନ ଥିବାବେଳେ ରାଜ୍ୟ ସରକାର ଏକ ସତ୍ୟପାଠ ଜରିଆରେ ତୁରନ୍ତ ପଦବୀ ପୂରଣ କରାଯିବା ସମ୍ପର୍କରେ ପଦକ୍ଷେପ ନିଆଯାଉଥିବା ଦର୍ଶାଇଛନ୍ତି। ଜୁଲାଇ ୩୧ ତାରିଖରେ ରାଜ୍ୟ ଆଇନ ବିଭାଗର ଅଣ୍ଡର ସେକ୍ରେଟାରି ରାଜକିଶୋର ରାଉତଙ୍କ ଚିଠି ଅନୁଯାୟୀ ଏହି ପଦବୀ ପୂରଣ ରାଜ୍ୟ ସରକାରଙ୍କ ସକ୍ରିୟ ବିଚାରାଧୀନ ରହିଥିବା ଦର୍ଶାଯାଇଛି। ସରକାରୀ ଓକିଲ ଦେବକାନ୍ତ ମହାନ୍ତିଙ୍କୁ ଆଇନ ବିଭାଗ ଏହି ଚିଠି ଲେଖିଥିବା ଜଣାପଡିଛି।
ଉଲ୍ଲେଖଯୋଗ୍ୟ, ଜଷ୍ଟିସ୍ ରଘୁବୀର ଦାସ ତାଙ୍କ ପଦବୀରୁ ଗତ ଫେବୃୟାରୀ ୯ରେ ଇସ୍ତଫା ଦେଇଥିଲେ। ଏହାପରଠାରୁ ଉକ୍ତ ସଦସ୍ୟ ପଦବୀ ଖାଲିପଡିଛି। ଉକ୍ତ ସଦସ୍ୟ ପଦବୀ ପୂରଣ ପାଇଁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେବାକୁ ଆଇନଜୀବୀ ପ୍ରବୀର ଦାସ ହାଇକୋର୍ଟରେ ଜନସ୍ବାର୍ଥ ମାମଲା ରୁଜୁ କରିଥିଲେ। ରାଜ୍ୟ ସରକାରଙ୍କ ମୁଖ୍ୟ ଶାସନ ସଚିବ, ଆଇନ ବିଭାଗର ପ୍ରମୁଖ ଶାସନ ସଚିବ ଏବଂ ଓଏଚ୍ଆର୍ସି ସଚିବଙ୍କୁ ମାମଲାରେ ପକ୍ଷଭୁକ୍ତ କରାଯାଇଥିଲା।
