ଠିକାସଂସ୍ଥାର ପାଇପ୍‌ ଚୋରି ବାହାନା

ଯାଜପୁର ଅଫିସ, ୨୩।୪: ଯାଜପୁର ଜିଲାର ଗ୍ରାମାଞ୍ଚଳରେ ସ୍ବଚ୍ଛ ପାନୀୟ ଜଳ ଯୋଗାଣ ପାଇଁ ଚାଲିଥିବା ମେଗା ପାଇପ୍‌ ଜଳଯୋଗାଣ ପ୍ରକଳ୍ପ ଲକ୍ଷ୍ୟଭ୍ରଷ୍ଟ ହୋଇଛି। ନିର୍ଦ୍ଧାରିତ ସମୟରେ ପ୍ରକଳ୍ପଗୁଡିକ କାର୍ଯ୍ୟକ୍ଷମ ହୋଇ ପାରି ନ ଥିବାରୁ ସମ୍ପୃକ୍ତ ଅଞ୍ଚଳବାସୀ ପ୍ରଚଣ୍ଡ ଗ୍ରୀଷ୍ମ ପ୍ରବାହ ବେଳେ ପାଣି ଗରାଏ ପାଇଁ ଡହଳବିକଳ ହେଉଛନ୍ତି। ଏପଟେ ପତ୍ର ମାଧ୍ୟମରେ କେବଳ ତାଗିଦା କରିବା ପର୍ଯ୍ୟନ୍ତ ବିଭାଗୀୟ ଅଧିକାରୀମାନଙ୍କ କ୍ଷମତା ଥିବା ମନେ ହେଉଛି। ନିଜର ଅସମର୍ଥତାକୁ ଲୁଚାଇବାକୁ ଯାଇ ନିୟୋଜିତ ଅଣଓଡ଼ିଆ ଠିକାସଂସ୍ଥା ପାଇପ୍‌ ଚୋରି ବାହାନା କରି ଖସି ଯିବାକୁ ଉଦ୍ୟମ କରୁଛି। କେଉଁଠାରେ, କେବେ ଓ କେତେବେଳେ ପାଇପ୍‌ ଚୋରି ହୋଇଛି ତାହାର ସଠିକ ବିବରଣୀ ନ ଦେଇ ଜିଲାର କୁଆଖିଆ, ଯାଜପୁର ରୋଡ ଓ ଟମକା ଥାନାରେ ବିଭାଗ ପକ୍ଷରୁ ଗତ ୨୮ା୩ା୨୦୨୩ରେ ହୋଇଥିବା ଅଭିଯୋଗରୁ ସାଧାରଣରେ ଏଭଳି ସନ୍ଦେହ ଉପୁଜିଛି। ଏହାବାଦ୍‌ ସମ୍ପୃକ୍ତ ଠିକାସଂସ୍ଥା ପକ୍ଷରୁ ଅଧିକ ଲାଭ ରଖିବା ଉଦ୍ଦେଶ୍ୟ ରଖି ନିର୍ଦ୍ଧାରିତ ଗଭୀର ପର୍ଯ୍ୟନ୍ତ ଗର୍ତ୍ତ ନ ଖୋଲି ପାଇପ୍‌ ବିଛା ହେଉଥିବାରୁ ଚୋରି ବଢୁଥିବା ଚର୍ଚ୍ଚା ହେଉଛି। ଏହି କ୍ରମରେ ବିପୁଳ ଅର୍ଥ ଖର୍ଚ୍ଚ କରି ପ୍ରକଳ୍ପ ବଢୁଥିବା ସରକାରୀ ଭାବେ ତଥ୍ୟ ଦିଆଯାଉଥିବାବେଳେ ଜିଲାବାସୀଙ୍କୁ ସ୍ବଚ୍ଛ ପାଣି ଟୋପାଏ ନ ମିଳିବା ବିଡମ୍ବନା ଛଡା ଅନ୍ୟ କିଛି ନୁହେଁ ବୋଲି ସାଧାରଣରେ ମତପ୍ରକାଶ ପାଇଛି।
ଚଳିତବର୍ଷ ଯାଜପୁର ଜିଲାରେ ବର୍ଷାଭାବରୁ ଦେଖାଦେଇଥିବା ଉତ୍କଟ ଜଳ ସମସ୍ୟାର ସମାଧାନ ପ୍ରତି ସରକାର ଆଖି ବୁଜି ଦେଇଛନ୍ତି। ଏନେଇ ବିଧାନସଭାରେ ଅଭିଯୋଗ ହେଲେ ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗ ଯେନତେନ ପ୍ରକାରେ ପତ୍ର ମାଧ୍ୟମରେ ତଥ୍ୟ ଦେଇ ଉଚ୍ଚ କର୍ତ୍ତୃପକ୍ଷଙ୍କୁ ସନ୍ତୁଷ୍ଟ କରୁଛନ୍ତି ା ସେହି ତଥ୍ୟ ଆଧାରରେ ବିଭାଗୀୟ ମନ୍ତ୍ରୀ ଉତ୍ତର ରଖି ପ୍ରତିପକ୍ଷଙ୍କୁ ଚୁପ କରି ଦେଉଛନ୍ତି। ବାସ୍ତବରେ ପାଇପ୍‌ ଜଳଯୋଗାଣ ପ୍ରକଳ୍ପ ଓ ନଳକୂପ ଦ୍ୱାରା ଲୋକେ ଉପକୃତ ହେଉଛନ୍ତି ନା ନାହିଁ ତା’ର ସତ୍ୟତା ଖୋଜିବାକୁ କାହାରି ପାଖରେ ଆନ୍ତରିକତା ନ ଥିବା ମନେ ହେଉଛି। ଯଦ୍ୱାରା ବାସ୍ତବ କ୍ଷେତ୍ରରେ ଉପୁଜୁଥିବା ପାଣି ସମସ୍ୟା ଦୂରୀଭୂତ ହୋଇ ପାରୁନାହିଁ। ଜିଲାର ସୁକିନ୍ଦା ବ୍ଲକ ଖଣି ପ୍ରଭାବିତ ୩୭ ଗ୍ରାମବାସୀଙ୍କ ପାଇଁ ୭୯.୮୫ କୋଟି ଟଙ୍କା ଅଟକଳରେ ମେଗା ଜଳ ଯୋଗାଣ ପ୍ରକଳ୍ପ ନିମାଣ ହୋଇଛି। ଠିକାସଂସ୍ଥା ଏନ୍‌ସିସି ଦ୍ୱାରା ୨୨ା୩ା୨୦୧୮ରୁ ଆରମ୍ଭ ହୋଇଥିବା ଉକ୍ତ ପ୍ରକଳ୍ପରୁ ଜଳଯୋଗାଣ ଆରମ୍ଭ ହୋଇ ସାରିଛି ବୋଲି ବିଭାଗୀୟ ରିପୋର୍ଟରେ ଦର୍ଶାଯାଇଛି। କିନ୍ତୁ ନିର୍ଦ୍ଧାରିତ ୩୭ରୁ ମାତ୍ର ୨୦ ଗ୍ରାମବାସୀ ପାଣି ପାଉଛନ୍ତି ବୋଲି ସୂଚନା ମିଳିଛି। ଏନ୍‌ସିସି ପ୍ରକଳ୍ପରେ ପୂର୍ବରୁ ବହୁ ଅନିୟମିତତା ହୋଇଥିବା ବିଭାଗୀୟ ଇଞ୍ଜିନିୟର୍ସ ଅଥରିଟି ପକ୍ଷରୁ ତଦନ୍ତରେ ଜଣାପଡିଥିଲା। ତଦନ୍ତ ରିପୋର୍ଟରେ ନିମ୍ନମାନର ଷ୍ଟିଲ ବ୍ୟବହାର, ମାଟି ଉପରେ ପାଇପ୍‌ ବିଛା, ତ୍ରୁଟିପୂର୍ଣ୍ଣ ଭର୍ଟିକାଲ ନିର୍ମାଣ ଆଦି ଅନିୟମିତା ହୋଇଥିଲା। ହେଲେ ପରବର୍ତ୍ତୀ ସମୟରେ କଳେବଳେ କୌଶଳେ ଏହି ଅନିୟମିତାତାକୁ ଚାପି ଦିଆଯାଇଥିଲା। ଏହାସହ ଜିଲାର ରସୁଲପୁର, ବଡ଼ଚଣା ଓ ଧର୍ମଶାଳା ବ୍ଲକବାସୀଙ୍କ ପାଇଁ ୩୫୧.୪୪ କୋଟି ଟଙ୍କା ଏବଂ ବିଞ୍ଝାରପୁର ନିର୍ବାଚନ ମଣ୍ଡଳୀର ୧୫ ପଞ୍ଚାୟତ ଓ ଯାଜପୁର ନିର୍ବାଚନ ମଣ୍ଡଳୀର ୨୦ ପଞ୍ଚାୟତ ପାଇଁ ୧୯୧.୮୫ କୋଟି ଟଙ୍କାର ୨ଟି ମେଗା ଜଳ ଯୋଗାଣ ପ୍ରକଳ୍ପ ୩୦ା୧୨ା୨୦୧୯ରୁ ଆରମ୍ଭ ହୋଇଛି। ଏହି ୨ ପ୍ରକଳ୍ପରେ ଅଟକଳରୁ ପରିମାଣରୁ ପ୍ରାୟ ୮୦ ପ୍ରତିଶତ ଖର୍ଚ୍ଚ ହୋଇ ସାରିଛି, ହେଲେ ପ୍ରକଳ୍ପ ସମ୍ପୂର୍ଣ୍ଣ ହୋଇ ପାରୁନାହିଁ। ଅନ୍ୟପକ୍ଷେ ନିୟୋଜିତ ଠିକାସଂସ୍ଥା ମେଘା ଇଞ୍ଜିନିୟର୍ସ ଇନଫ୍ରାଷ୍ଟ୍ରକ୍ଚର ଲିଃ ବିଭିନ୍ନ ବାହାନା କରି ଅଟକଳ ପରିମାଣ ବଢେଇବାରେ ଲାଗିଛି। ମୋଟା ଅଙ୍କର ହାତଗୁଞ୍ଜା ନେଇ ଏହାକୁ ବିଭାଗୀୟ ଅଧିକାରୀମାନେ ମଧ୍ୟ ଆଖି ବୁଜି ସହଯୋଗ କରୁଛନ୍ତି ବୋଲି ଅଭିଯୋଗ ହେଉଛି। ଇତିମଧ୍ୟରେ ଠିକାସଂସ୍ଥା କର୍ତ୍ତୃପକ୍ଷ ପାଇପ୍‌ ଚୋରି ହେଉଥିବା ନେଇ ବିଭାଗୀୟ ଅଧିକାରୀଙ୍କ ନିକଟରେ ବାରମ୍ବାର ଅଭିଯୋଗ କରାଯାଉଛି। ଏହିମର୍ମରେ ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ(ଆରଡବ୍ଲ୍ୟୁଏସ୍‌ଏସ୍‌) ପକ୍ଷରୁ ୩ ଥାନାରେ ଅଭିଯୋଗ କରାଯାଇଛି। ଡକ୍‌ଟାଇଲରେ ଆଇରନରେ ନିର୍ମିତ ୫.୫ ମିଟର ଲେଖାଏଁ ପାଇପ କାଟି ଚୋରି ସଂକ୍ରାନ୍ତରେ ଥାନାରେ ହୋଇଥିବା ଅଭିଯୋଗରେ ଦର୍ଶାଯାଇଛି। ଏହାସହ ଉକ୍ତ ଅଭିଯୋଗରେ ଏଜେନ୍ସି ପକ୍ଷରୁ ପାଇପ୍‌ ଜଗିବା ସମ୍ଭବପର ନୁହେଁ ବୋଲି ଯୁକ୍ତି ବଢାଯାଇଛି। ତେବେ ସତରେ ଯଦି ପାଇପ୍‌ ଚୋରି ହୋଇଛି ତେବେ ନିର୍ଦ୍ଦିଷ୍ଟ ସ୍ଥାନ ଏବଂ ସମୟ ସଂକ୍ରାନ୍ତରେ ଅଭିଯୋଗରେ କୌଣସି ସୂଚନା ନାହିଁ। ଏ ସଂକ୍ରାନ୍ତରେ ଚଣ୍ଡିଖୋଲ ଆରଡ୍ଲ୍ୟୁଏସ୍‌ଏସ୍‌ର ଅଧୀକ୍ଷଣ ଯନ୍ତ୍ରୀ ସୁଶାନ୍ତ କୁମାର ଘଡେଇଙ୍କ ମତାମତ ନେବାକୁ ତାଙ୍କ ମୋବାଇଲକୁ ଗୁରୁବାର ସନ୍ଧ୍ୟାରେ ଯୋଗାଯୋଗ କରାଯାଇଥିଲେ ହେଁ ସେ ଫୋନ କଲ ଗ୍ରହଣ କରି ନ ଥିଲେ।


Enter your email to get our daily news in your inbox.

All Right Reserved By Dharitri.Com

ଦିଲ୍ଲୀରେ ଚାଞ୍ଚଲ୍ୟ: ଟ୍ରାଏଲ୍‌ ରୁମ୍‌ରେ ମହିଳା କର୍ମଚାରୀଙ୍କୁ ଗଳାକାଟି ହତ୍ୟା

ନୂଆଦିଲ୍ଲୀ,୧୫ା୧୧: ଦିଲ୍ଲୀର ଏକ ପୋଷାକ ଶୋ’ରୁମ୍‌ରେ କାମ କରୁଥିବା ଜଣେ ୧୮ ବର୍ଷୀୟା କର୍ମଚାରୀଙ୍କୁ ଟ୍ରାଏଲ୍‌ ରୁମ୍‌ରେ ଗଳାକାଟି ହତ୍ୟା କରାଯାଇଛି। ବ୍ୟକ୍ତିଗତ ସମ୍ପର୍କରେ ଫାଟ ଏବଂ…

ଏହି ୪ଟି ରାଶି ପାଇଁ ଆଗକୁ ରହିଛି କଠିନ ସମୟ, ସତର୍କ ନ ରହିଲେ ବଡ଼ ବିପଦ…

୧୬ ନଭେମ୍ବର ୨୦୨୬ରେ ସୂର୍ଯ୍ୟଦେବ ବିଛା ରାଶିକୁ ପ୍ରବେଶ କରିବେ। ଜ୍ୟୋତିଷ ଶାସ୍ତ୍ର ଅନୁସାରେ, ଏହି ଗୋଚରର ପ୍ରଭାବ କିଛି ରାଶିର ଜାତକଙ୍କ ଜୀବନରେ ପଡ଼ିପାରେ। ବିଶେଷକରି…

ଅତି ଖରାପ ସ୍ଥିତିରେ ଦିଲ୍ଲୀ ବାୟୁ ଗୁଣବତ୍ତା, ଘେରି ରହୁଛି ଧୂଳି, ଧୂଆଁର ଘନ ଆସ୍ତରଣ

ନୂଆଦିଲ୍ଲୀ,୧୫ା୧୧: ଦିଲ୍ଲୀର ବାୟୁ ଗୁଣବତ୍ତା ସୂଚକାଙ୍କ (ଏକ୍ୟୁଆଇ) ରବିବାର ସକାଳେ ଅଧିକାଂଶ ପର୍ଯ୍ୟବେକ୍ଷଣ କେନ୍ଦ୍ରରେ ଅତି ଖରାପ ଦର୍ଶାଇଥିବା ବେଳେ ୭ଟିରେ ଗମ୍ଭୀର ସ୍ଥିତି ଦର୍ଶାଇଛି। ମୋଟାମୋଟି…

ବିର୍ସା ମୁଣ୍ଡାଙ୍କ ୧୫୧ତମ ଜନ୍ମ ଜୟନ୍ତୀ: ଏକାଠି ହେଲେ କନ୍ଧମାଳ,ଗଜପତିର ଆଦିବାସୀ ସମାଜ

ବ୍ରାହ୍ମଣୀଗାଁ,୧୫।୧୧(ମନୋରଞ୍ଜନ ରଣା): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ଅନ୍ତର୍ଗତ ବ୍ରାହ୍ମଣୀଗାଁ ଶିବ ମନ୍ଦିର ପଡ଼ିଆରେ ରବିବାର ଭଗବାନ ବିର୍ସା ମୁଣ୍ଡାଙ୍କ ୧୫୧ତମ ଜନ୍ମ ଜୟନ୍ତୀ ପାଳିତ ହୋଇଯାଇଛି।…

ଗୁଣପୁରରେ ମହିଳାଙ୍କୁ ଧାରୁଆ ଅସ୍ତ୍ରରେ ମରଣାନ୍ତକ ଆକ୍ରମଣ

ଗୁଣପୁର,୧୫।୧୧(ସୁଜାତା ପାଢ଼ୀ): ରାୟଗଡ଼ା ଜିଲା ଗୁଣପୁର ଥାନା ଅନ୍ତର୍ଗତ ହାଉସିଂ ବୋର୍ଡ କଲୋନୀରେ ଜଣେ ମହିଳାଙ୍କୁ ମରଣାନ୍ତକ ଆକ୍ରମଣ ହୋଇଥିବା ଘଟଣା ସାମ୍ନାକୁ ଆସିଛି। ମିଳିଥିବା ସୂଚନା…

କେରଳ ହାଇକୋର୍ଟଙ୍କ ବଡ଼ ପ୍ରସ୍ତାବ, କିଶୋର ବୟସର ସୀମା ୧୮ରୁ ୧୬ ବର୍ଷକୁ ହ୍ରାସ….

କୋଚି,୧୫ା୧୧: ନାବାଳକ ବୟସ ସୀମାକୁ ନେଇ ବଡ଼ କଥା କହିଛନ୍ତି କେରଳ ହାଇକୋର୍ଟ । ଅପରାଧର ବଦଳୁଥିବା ସ୍ବରୂପ ଏବଂ ପିଲାମାନଙ୍କଠାରେ ଦେଖାଯାଉଥିବା ପରିପକ୍ୱତାକୁ ଦୃଷ୍ଟିରେ ରଖି…

ଠେଙ୍ଗାରେ ଆକ୍ରମଣ କରି ହତ୍ୟା ଉଦ୍ୟମ, ଜେଲ ଗଲେ ଅଭିଯୁକ୍ତ

ଦିଗପହଣ୍ଡି,୧୫।୧୧(ଅଶେଷ ନାଥ ମିଶ୍ର): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ଶ୍ରୀଚନ୍ଦନପୁର ଗ୍ରାମର ବିରୁପାକ୍ଷ ମହାପାତ୍ରଙ୍କୁ ଗ୍ରାମର ହିନ ଗଉଡ଼(୫୦) ଶନିବାର ଅପରାହ୍ନରେ ଏକ ଠେଙ୍ଗାରେ ଆକ୍ରମଣ କରି…

ମାଡ଼ି ଆସୁଛି ବାତ୍ୟା: ମୁକାବିଲା ପାଇଁ ଗଞ୍ଜାମ ପ୍ରଶାସନର ଆଗୁଆ ପ୍ରସ୍ତୁତି

ପୁରୁଷୋତ୍ତମପୁର,୧୫।୧୧(ସବିତା ମିଶ୍ର): ପୁଣି ଏକ ସାମ୍ଭାବ୍ୟ ବାତ୍ୟାର ମୁକାବିଲା ପାଇଁ ପୁରୁଷୋତ୍ତମପୁର ପ୍ରଶାସନ ପକ୍ଷରୁ ଆଗୁଆ ପ୍ରସ୍ତୁତି ସହ ବ୍ୟାପକ ସତର୍କତାମୂଳକ ପଦକ୍ଷେପ ଗ୍ରହଣ କରାଯାଇଛି। ଏନେଇ…

Advertisement

ଧରିତ୍ରୀ କାର୍ଟୁନ

Archives

 

Dharitri-Rashifala


ଛୁଟିଦିନ
ପିଲାଙ୍କ ଧରିତ୍ରୀ
Trending
Let's Pledge For A 'Plastic Free' Odisha Join The Movement Of 'Plastic Free' Odisha

Akash Das Nayak, supports a Plastic Free Odisha. Do you?