ଖଇରା,୧୨।୬(ଡି.ଏନ.ଏ.): ବାଲେଶ୍ୱର ଜିଲା ଖଇରା ବ୍ଲକ ଅଧୀନ ତାଳମହୁରୀଠାରେ ନିର୍ମାଣାଧୀନ ଆଦର୍ଶ ବିଦ୍ୟାଳୟ ଛାତ୍ରୀନିବାସକୁ ନେଇ ସାଧାରଣରେ ଅସନ୍ତୋଷ ବଢିବାରେ ଲାଗିଛି ା ବୋରିଂ କାର୍ଯ୍ୟ ସରିବା ପରେ ଏବେ ଗାତ ଫିଲିଂ ପାଇଁ ବାଲି ବଦଳରେ ପାହାଡ ମାଟି ଫିଲିଂ କରାଯିବାରେ ଘରର ସ୍ଥାୟିତ୍ୱକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ତୁରନ୍ତ ଉକ୍ତ ଅନିୟମିତତାର ଭିଜିଲାନ୍ସ ତଦନ୍ତ ଦାବି କରାଯାଇଛି ା
ଛାତ୍ରୀନିବାସ ଗୃହ ପାଇଁ ପୂର୍ତ୍ତ ବିଭାଗ ତରଫରୁ ପାଖାପାଖି ୩ କୋଟି ୩୪ଲକ୍ଷ ଟଙ୍କା ପ୍ରଦାନ କରାଯାଇଥିଲା। ମେ’ ୩ ତାରିଖରେ ଏହାର ଶିଳାନ୍ୟାସ କରାଯାଇଥିଲା। ଏବେ ଫାଉଣ୍ଡେଶନ କାମ ଶେଷ ହୋଇଥିବା ବେଳେ ଖୋଳାଯାଇଥିବା ପାଖାପାଖି ୭ଫୁଟର ଗାତ ଭର୍ତ୍ତି ପାଇଁ ଠିକାଦାର ପାହାଡ ମାଟି ବ୍ୟବହାର କରୁଛନ୍ତି ା ଫଳରେ ଅଳ୍ପ ଦିନ ମଧ୍ୟରେ ଘର ତଳି ଫାଟିବାର ଆଶଙ୍କା ଦେଖାଦେଇଛି ା ଏଷ୍ଟିମେଟରେ ଗାତଗୁଡିକ ବାଲି ଫିଲିଂ କରିବାର ନିୟମ ଥିବା ବେଳେ କାହା ନିର୍ଦ୍ଦେଶରେ ଏଭଳି ବେପରୁଆ କାର୍ଯ୍ୟ କରାଯାଉଛି ତାହା ସାଧାରଣ ଲୋକଙ୍କୁ ବିସ୍ମିତ କରିଛି ା ସେହିଭଳି ୯ମାସ ମଧ୍ୟରେ କାମ ସାରିବାର ନିୟମ ଥିବା ବେଳେ ୪ ମାସ ଅତିକ୍ରମ କରିଯାଇଥିଲେ ହେଁ ଏ ପର୍ଯ୍ୟନ୍ତ ୨୫ପ୍ରତିଶତ କାମ ସରିନାହିଁ ା ଏଣୁ ନିର୍ଦ୍ଧାରିତ ସମୟରେ କାମ ସରିବା ନେଇ ଅନିଶ୍ଚିତତା ଦେଖାଦେଇଛି। ଏ ସମ୍ପର୍କରେ ସହକାରୀ ନିର୍ବାହୀ ଯନ୍ତ୍ରୀ ଜ୍ୟୋତି ପ୍ରକାଶ ପଣ୍ଡାଙ୍କୁ ଯୋଗାଯୋଗ କରିବାରେ ଏଷ୍ଟିମେଟରେ ମାତ୍ର ୨ ଫୁଟ ବାଲି ଫିଲିଂ ଥିବାରୁ ପାହାଡ ମାଟି ବ୍ୟବହାର କରାଯାଉଥିବା କହିଛନ୍ତି।
