ଭୁବନେଶ୍ୱର,୩।୨(ବ୍ୟୁରୋ):ନିଶା ସେବନରୁ ପୁଅକୁ ଦୂରେଇବା ପାଇଁ ପରିବାର ଲୋକେ ନିଶା ନିବାରଣ କେନ୍ଦ୍ରରେ ଛାଡ଼ିଥିଲେ। ହେଲେ କେନ୍ଦ୍ରର ମାଲିକ ଓ କର୍ମଚାରୀ ନିଶା ଛଡ଼ାଇବା ବଦଳରେ ଜୀବନ ନେଇଗଲେ। ମଞ୍ଚେଶ୍ୱର ଥାନା ଅନ୍ତର୍ଗତ ଭୋଟପଡ଼ାସ୍ଥିତ ସାଇକୃପା ନିଶା ନିବାରଣ କେନ୍ଦ୍ରରେ ନିର୍ଯାତନା ସହ ମରଣାନ୍ତକ ଆକ୍ରମଣର ଶିକାର ହୋଇ ହେଇଟେକ୍ ହସ୍ପିଟାଲରେ ଚିକିତ୍ସିତ ହେଉଥିବା ଅନ୍ତେବାସୀ ସର୍ବେଶ୍ୱର ବେହେରା ଶେଷରେ ଗୁରୁବାର ଆଖି ବୁଜିଛନ୍ତି। ତାଙ୍କର ମୃତ୍ୟୁ ହେବା ପରେ ଏହି ମାମଲା ଏବେ ଭିନ୍ନ ମୋଡ଼ ନେଇଛି। ମାମଲାରେ ସମ୍ପୃକ୍ତ ଥିବା ମାଲିକ ଅନିରୁଦ୍ଧ ରାଏ ଏବଂ ୨ ସହାୟକ ଅଙ୍କିତ ରାଉତ ଓ ଅନ୍ତର୍ଯ୍ୟାମୀ ମିଶ୍ର ବୁଧବାର ଗିରଫ ହୋଇ ଜେଲ ଯାଇଛନ୍ତି। ସର୍ବେଶ୍ୱରଙ୍କ ମୃତ୍ୟୁ ପରେ ପୋଲିସ ମାମଲାରେ ହତ୍ୟା ଦଫାକୁ ବଦଳାଇଛି। ଘଟଣାରେ ଅଧିକ ତଦନ୍ତ କରାଯାଉଥିବା ବେଳେ କ୍ୟାପିଟାଲ ହସ୍ପିଟାଲରେ ବ୍ୟବଚ୍ଛେଦ ପରେ ସର୍ବେଶ୍ୱରଙ୍କ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ତେବେ ତଦନ୍ତରେ ଆବଶ୍ୟକତା ପଡ଼ିଲେ ଅଭିଯୁକ୍ତଙ୍କୁ ରିମାଣ୍ଡରେ ଅଣାଯାଇ ଅଧିକ ପଚରାଉଚରା ସହ କ୍ରାଇମ ସିନ୍ ରିକ୍ରିଏଟ୍ ଆଦି କରାଯିବ ବୋଲି ଥାନାଧିକାରୀ ସୁଧୀର କୁମାର ସାହୁ କହିଛନ୍ତି।
ସୂଚନାଯୋଗ୍ୟ, ଶହୀଦନଗର ଥାନା ଅନ୍ତର୍ଗତ ପଥରବନ୍ଧ ସାହିରେ ରହୁଥିବା ନୟାଗଡ଼ ଜିଲାର ସର୍ବେଶ୍ୱର ବେହେରା ଡ୍ରାଇଭର ଭାବେ କାମ କରୁଥିଲେ। ତାଙ୍କର ଗୋଟିଏ ଛୋଟ ଝିଅ ଓ ୨ଟି ପୁଅ ଅଛନ୍ତି। କିଛିଦିନ ହେଲା ସେ ମଦ୍ୟପାନ କରୁଥିବାରୁ ପରିବାର ଲୋକେ ତାଙ୍କୁ ଜାନୁୟାରୀ ୨୭ରେ ଭୋଟପଡ଼ାସ୍ଥିତ ପ୍ଲଟ- ନଂ. ୨୧୩୬/୧୧୧୯୭/୪୫ରେ ଥିବା ଉକ୍ତ ନିଶା ନିବାରଣ କେନ୍ଦ୍ରରେ ଛାଡ଼ିଥିଲେ। ପ୍ରଥମ ପର୍ଯ୍ୟାୟରେ ପରିବାର ଲୋକ ୭ ହଜାର ଟଙ୍କା ଦେଇଥିଲେ। ହେଲେ ସେଠାରେ ମାଲିକ ଅନିରୁଦ୍ଧ ଓ ସହାୟକମାନେ ପ୍ରତିଦିନ ନିର୍ଯାତନା ଦେବା ସହ ନିସ୍ତୁକ ମାଡ଼ ମାରିଥିଲେ। ସର୍ବେଶ୍ୱର ଗୁରୁତର ହେବାରୁ ସୋମବାର ଅପରାହ୍ନରେ ପ୍ରଥମେ ତାଙ୍କୁ କ୍ୟାପିଟାଲ ଏବଂ ପରେ ହାଇଟେକ୍ ହସ୍ପିଟାଲରେ ଭର୍ତ୍ତି କରାଯାଇଥିଲା। ଏନେଇ ସର୍ବେଶ୍ୱରଙ୍କ ସ୍ତ୍ରୀ ଉର୍ମିଳା ବେହେରା ଥାନାରେ ଅଭିଯୋଗ କରିଥିଲେ। ପୋଲିସ ଏକ ମାମଲା (ନଂ.୩୭/୨୦୨୩) ରୁଜୁ କରି ତଦନ୍ତ ଆରମ୍ଭ କରି ଅଭିଯୁକ୍ତଙ୍କୁ ଅଟକ ରଖିଥିଲା। ବୁଧବାର ନିଶା ନିବାରଣ କେନ୍ଦ୍ରକୁ ସିଲ୍ କରିବା ସହ ମାଲିକ ଓ ୨ ସହାୟକଙ୍କୁ ଗିରଫ କରି ଜେଲ ପଠାଇଥିଲା।
