ମୁମ୍ବାଇ,୧୪ା୭: ମହାରାଷ୍ଟ୍ରର ପୁଣେରେ ଜଣେ ମହିଳା ଡାକ୍ତରଙ୍କ ବାଥ୍ରୁମ ଠାରୁ ଆରମ୍ଭ କରି ବେଡ୍ରୁମ୍ ପର୍ଯ୍ୟନ୍ତ ସବୁଠି ଚୋରା କ୍ୟାମେରା ଲାଗିଥିଲା। ଯାହା ଜାଣି ନ ଥିଲେ ମହିଳା ଡାକ୍ତର। ତାଙ୍କ ଘରର ଲାଇଟ୍ ଖରାପ ହୋଇଯିବାରୁ ସେ ଇଲେକ୍ଟ୍ରିସିଆନଙ୍କୁ ସଜାଡ଼ିବା ପାଇଁ ଡାକିଥିଲେ। ସେତେବେଳେ ଘଟଣାର ସତ୍ୟତା ଉନ୍ମୋଚନ ହୋଇଥିଲା। ପୋଲିସ ଯାଞ୍ଚ କରି ଜଣେ ପୁରୁଷ ଡାକ୍ତରଙ୍କୁ ଗିରଫ କରିଛି।
ଭାରତୀୟ ବିଦ୍ୟାପୀଠ ହସ୍ପିଟାଲରେ କାର୍ଯ୍ୟରତ ମହିଳା ଡାକ୍ତରଙ୍କୁ ପୁଣେର ଏକ ହସ୍ପିଟାଲ ପରିସରରେ କ୍ୱାର୍ଟର ଆଲର୍ଟ କରାଯାଇଥିଲା। ଗତ ୬ ତାରିଖରେ ମହିଳା ଡାକ୍ତରଙ୍କ ଘରକୁ କେହି ଅଜଣା ବ୍ୟକ୍ତି ନକଲି ଚାବିରେ ତାଲା ଖୋଲି ଘର ଭିତରେ ପଶି ବାଥ୍ରୁମ ଏବଂ ବେଡ୍ରୁମରେ କ୍ୟାମେରା ଲଗାଇ ଦେଇଥିଲେ। ମହିଳା ଡାକ୍ତର ଜଣକ ଯେତେବେଳେ ଡ୍ୟୁଟିରୁ ଘରକୁ ଫେରିଲେ ସେତେବେଳେ ଲାଇଟ୍ ସୁଇଚ୍ ମାରିବାରୁ ତାହା ଜଳି ନ ଥିଲା। ଏହା ପରେ ସେ ଇଲେକ୍ଟ୍ରିସିଆନଙ୍କୁ ଡାକିଥିଲେ। ମରାମତି କରିବା ସମୟରେ ଘରେ ଲୁଚାରେ କ୍ୟାମେରା ଲାଗିଥିବା ଜଣାପଡ଼ିଥିଲା। ଯାହାକି ମହିଳା ଡାକ୍ତରଙ୍କ ଅଜାଣତରେ ହୋଇଥିଲା। ଏ ସମ୍ପର୍କରେ ମହିଳା ଡାକ୍ତର ଥାନାରେ ଅଭିଯୋଗ କରିଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ଯାଞ୍ଚ କରିବାରୁ ଏଥିରେ ଡାକ୍ତର ସୁଜିତ୍ ଜଗତାପଙ୍କ ସଂପୃକ୍ତି ଥିବା ଜଣାପଡ଼ିଥିଲା। ପୋଲିସ ତାଙ୍କୁ ପଚରାଉଚରା କରିବାରୁ ପ୍ରଥମେ ସୁଜିତ୍ ମନା କରୁଥିଲେ। ପରେ ସେ ସ୍ବୀକାର କରିଛନ୍ତି। ତେବେ ପ୍ରଶ୍ନ ଉଠୁଛି ଏହି ଡାକ୍ତରଙ୍କର ମହିଳା ଡାକ୍ତରଙ୍କ ସମ୍ପର୍କ କ’ଣ? ପୋଲିସ ଏନେଇ ଅଧିକ ତଦନ୍ତ ଜାରି ରଖିଛି। ପରେ ଘଟଣାର ସତ୍ୟତା ଲୋକଲୋଚନକୁ ଆସିବ।
