ପାରାଦୀପ,୩୦ା୪(ସ୍ବ.ପ୍ର.): କେନ୍ଦ୍ର ମତ୍ସ୍ୟ ଓ ପ୍ରାଣୀ ସମ୍ପଦ ବିଭାଗ ସଚିବ ଯତିନ୍ଦ୍ରନାଥ ସ୍ବାଇଁ ଶୁକ୍ରବାର ପାରାଦୀପ ମାଛଧରା ବନ୍ଦର ଗସ୍ତରେ ଆସିଥିଲେ। ଏଠାରେ ପ୍ରଧାନମନ୍ତ୍ରୀ ମତ୍ସ୍ୟ ସମ୍ପଦ ଯୋଜନାରେ ପ୍ରାୟ ୧୦୦ କୋଟି ଟଙ୍କା ଖର୍ଚ୍ଚ ହେବ। ଏନେଇ ହେବାକୁ ଥିବା ନୂତନ ପ୍ରକଳ୍ପର ଭିତ୍ତିଭୂମି ଯାଞ୍ଚ ପାଇଁ ସ୍ବାଇଁ ଆସିଥିଲେ। ସେ ମାଛଧରାବନ୍ଦର ପରିସର ଓ ମହାନଦୀ ମୁହାଣ ଅଞ୍ଚଳ ବୁଲି ଦେଖିଥିଲେ। ଏଥିସହ ମତ୍ସ୍ୟ ଶିଳ୍ପ ସହ ଜଡ଼ିତ ଲୋକ ଓ ବିଭାଗୀୟ ଅଧିକାରୀଙ୍କ ସହିତ ଆଲୋଚନା କରିଥିଲେ। ଏହି ଅବସରରେ ଓଡିଶା ସାମୁଦ୍ରିକ ମତ୍ସ୍ୟ ଉତ୍ପାଦକ ସଂଘ (ଓମ୍ଫା) ପକ୍ଷରୁ ସଚିବ ସ୍ବାଇଁଙ୍କୁ ଏକ ଦାବିପତ୍ର ଦିଆଯାଇଛି। ଏଥିରେ ଦର୍ଶାଯାଇଛି, ଏହି ମାଛଧରା ବନ୍ଦର ଓ ଏହା ଉପରେ ପ୍ରାୟ ୫୦ ହଜାର ଲୋକଙ୍କ ଜୀବନଜୀବିକା ନିର୍ଭରଶୀଳ। ଏହାକୁ ଦୃଷ୍ଟିରେ ରଖି ତୁରନ୍ତ ତୈଳ ମୂଲ୍ୟ ଉପରେ ସ୍ବତନ୍ତ୍ର ସବ୍ସିଡି ଦେବାକୁ ଦାବି କରାଯାଇଛି। ସଂଘ ସଭାପତି ଶ୍ରୀକାନ୍ତ ପରିଡା ଏଥିରେ ଉଲ୍ଲେଖ କରିଛନ୍ତି, ରାଜ୍ୟର ଏହି ବୃହତ୍ ମାଛଧରା ବନ୍ଦରରେ ଏବେ ୬୩୦ ମାଛଧରା ଟ୍ରଲର ଓ ୪୦୦ରୁ ଅଧିକ ମୋଟର ବୋଟ ରହିଛି। ତୈଳ ମୂଲ୍ୟ ବୃଦ୍ଧି ଯୋଗୁ ସମସ୍ତେ କ୍ଷତି ସହୁଛନ୍ତି। ଏପରିକି କେତେକ ଟ୍ରଲର ଓ ବୋଟ ମାଲିକ ମାଛ ଧରିବା ପାଇଁ ସମୁଦ୍ରକୁ ଯାଉନାହାଁନ୍ତି। ସେଥିପାଇଁ ସଂଘ ଦୀର୍ଘ ୫ ବର୍ଷ ହେଲା ରାଜ୍ୟ ଓ କେନ୍ଦ୍ର ସରକାରଙ୍କ ପାଖରେ ଏକାଧିକ ଦାବି କରିଛି। ଏହା ଉପରେ ବିଚାର କରିବାକୁ ସଚିବ ସମ୍ମତି ପ୍ରକାଶ କରିଛନ୍ତି। ଅନ୍ୟ ଦାବି ମଧ୍ୟରେ, ମହାନଦୀ ମୁହାଣ ପୋତି ହୋଇଯିବାରୁ ଅନେକ ସମୟରେ ଟ୍ରଲର ଓ ବୋଟ ଦୁର୍ଘଟଣାର ସମ୍ମୁଖୀନ ହେଉଛନ୍ତି। ଅନେକ ଧନଜୀବନ ଗଲାଣି। ମୁହାଣ ଅଞ୍ଚଳରେ ସବୁବେଳେ ବାଲି ଚଢ଼ି ଯାଉଥିବାରୁ ପ୍ରତିବର୍ଷ ୫୦ ମିଟର ପ୍ରସ୍ତରେ ୧୦ ମିଟର ଗଭୀର ଖନନ କାର୍ଯ୍ୟ କରାଯାଉ। ଏହାବାଦ୍ ମାଛଧରା ପୋତାଶ୍ରୟକୁ ଲାଗି ଥିବା ୨୦୦ ମିଟର ବର୍ଥ ନଦୀ ସ୍ରୋତରେ ଲୀନ ହୋଇଯାଇଛି। ଏବେ ସେହି ସ୍ଥାନରେ ପୁଣି ନଦୀ ଅତଡା ଖାଉଛି। ତା’ର ସୁରକ୍ଷା ପାଇଁ ପ୍ରାଥମିକତା ଆଧାରରେ ପଥର ବନ୍ଧ କରାଯାଉ। ସୂଚନାଯୋଗ୍ୟ, ପ୍ରଧାନମନ୍ତ୍ରୀ ମତ୍ସ୍ୟ ସମ୍ପଦ ଯୋଜନାରେ ୯୯.୬୪ କୋଟି ଟଙ୍କା ପାରାଦୀପ ମାଛଧରା ବନ୍ଦର ପାଇଁ ଖର୍ଚ୍ଚ ହେବ। ଏହାକୁ ପାରାଦୀପ ବନ୍ଦର କରିବ। ସେଥିରେ ଅନେକ ନୂତନ ପ୍ରକଳ୍ପ ଓ ନବୀକରଣ କାମ ହେବ। କେନ୍ଦ୍ର ଜାହାଜ ଚଳାଚଳ ମନ୍ତ୍ରୀ ସର୍ବାନନ୍ଦ ସୋନଓ୍ବାଲଙ୍କ ଗସ୍ତ ବେଳେ ଏହା ଘୋଷଣା କରାଯାଇଥିଲା। ସେହି ନୂତନ କାମ କରିବା ବେଳେ ଓମ୍ଫା କର୍ମକର୍ତ୍ତାଙ୍କ ମତାମତ ନେବାକୁ ଦାବି କରାଯାଇଥିଲା। ଯାହାକୁ ସରକାରୀ ଭାବେ ସ୍ବୀକୃତି ମିଳିଛି। ବୋଲି ସଂଘ ସଭାପତି ପରିଡ଼ା କହିଛନ୍ତି।
