ରାଜନଗର,୧୪ା୧୦(ଡି.ଏନ.ଏ.): କେନ୍ଦ୍ରାପଡ଼ା ଜିଲା ରାଜନଗର ବ୍ଲକ ଅଞ୍ଚଳ ଚାଷଜମିରେ କରାଯାଇଥିବା ଖରିଫ ଧାନ ଫସଲରେ ଏବେ ଗିରିଆ ପୋକ ଆତଙ୍କ ଦେଖାଦେଇଛି। ଅନିୟମିତ ବର୍ଷା କାରଣରୁ ବିଳମ୍ବରେ ଚାଷକାର୍ଯ୍ୟ ଆରମ୍ଭ ହେବା ଓ ମାସେରୁ ଊର୍ଦ୍ଧ୍ୱ ହେଲା ଲଘୁଚାପଜନିତ ବର୍ଷା ଲାଗି ରହିଛି। ଚାଷୀ ଶୀଘ୍ର ଅମଳ କରିବାକୁ ଅଧିକ ଓ ଶୀଘ୍ର ଅମଳକ୍ଷମ ହାଇଲିଂ ବିହନରେ ଖରିଫ ଧାନ ଚାଷ କରିଥିଲେ। ଏବେ ଧାନଗଛକୁ କଳା ରଙ୍ଗର ଗିରିଆ ପୋକ ଚରିଗଲାଣି। ଗିରିଆ ପୋକ ଲାଗିଥିବା ଗଛଟି ମରିଗଲା ପରେ ଯେପରି ଧଳା ଦେଖାଯାଏ ସେପରି ଦେଖାଯାଉଛି। ଧାନଗଛରେ ଗିରିଆ ପୋକ ଲାଗିବା ପରେ ଚାଷୀ ମୁଣ୍ଡରେ ଚଡ଼କ ପଡ଼ିଛି।
ରାଜନଗର ନଦୀ ନାଳ ଘେରା ଅଞ୍ଚଳ। ଜଳସେଚନର ସୁବିଧା ନ ଥିବାରୁ ରାଜନଗର ଅଞ୍ଚଳରେ କେବଳ ଖରିଫ ଧାନଚାଷ ହୋଇଥାଏ। କିଛିବର୍ଷ ହେଲା ଅନିୟମିତ ବର୍ଷା ଓ ଧାନ ପାଚି ଆସିବା ବେଳକୁ ବାତ୍ୟା ଚାଷୀଙ୍କ ମେରୁଦଣ୍ଡ ଦୋହଲାଇ ଦେଉଛି। ଚଳିତବର୍ଷ ଅକ୍ଷୟତୃତୀୟା ପରଠାରୁ ବର୍ଷା ଉଭାନ୍ ହୋଇଯାଇଥିଲା। ଅନିୟମିତ ବର୍ଷା କାରଣରୁ ଚାଷକାର୍ଯ୍ୟ ବିଳମ୍ବରେ ଆରମ୍ଭ ହେଲା। ଚାଷୀ ରୁଆ ବେଉଷଣ କରିବା ପରଠାରୁ ବର୍ଷା ଗତ ମାସେରୁ ଊର୍ଦ୍ଧ୍ୱ ହେଲା ଲାଗି ରହିଛି। ବିଳମ୍ବରେ ଚାଷକାର୍ଯ୍ୟ ଆରମ୍ଭ ହେଉଥିବାରୁ ଚାଷୀ ହାଇଲିଂ ୧୦୦୧, କନକ ପ୍ଲସ, ସ୍ବର୍ଣ୍ଣ, ସମ୍ପଦା, ଶାରଳା ପ୍ରଭୃତି ହାଇବ୍ରିଡ୍ ବିହନରେ ଚାଷ କରିଛନ୍ତି। ରାଜନଗର ବ୍ଲକ ହାତିନା ପଞ୍ଚାୟତର କଇଥା ଓ ବାଉଁଶଗଡ଼ରେ ଏବେ ଗିରିଆ ପୋକ ଆତଙ୍କ ଦେଖାଦେଇଛି। ଗତ ୨୫ଦିନ ହେଲା ଛୋଟ ଛୋଟ କଳାରଙ୍ଗର ଗିରିଆ ପୋକ ଧାନଗଛକୁ ମାରି ଦେଉଛି। ଏହି ପୋକ ଲାଗୁଥିବା ଗଛଗୁଡ଼ିକ ମରିଯିବା ପରି ହେବା ସହ ଧଳା ପଡ଼ିଯାଉଛି। ଏ ନେଇ ଚାଷୀମାନେ ଔଷଧ ସିଞ୍ଚନ କରିବା ପରେ ବି ପୋକଙ୍କ ପ୍ରାର୍ଦୁଭାବ କମୁନାହିଁ। ସେହି ସମୟରେ କୃଷି ବିଭାଗର କର୍ମଚାରୀ ସ୍ଥାନୀୟ ଅଞ୍ଚଳରେ ପହଞ୍ଚତ୍ ଏକ ଔଷଧ ନଁା କହି ଚାଲି ଆସିଥିଲେ। କୃଷି ବିଭାଗର କୌଣସି ଅଧିକାରୀ କିମ୍ବା ବିଶେଷଜ୍ଞ ଚାଷୀଙ୍କ ପାଖରେ ପହଞ୍ଚତ୍ ନ ଥିଲେ। ବୁଧବାର ଚାଷୀ କ୍ଷତିଗ୍ରସ୍ତ ହେବାର ପ୍ରାୟ ୨୦ରୁ ଅଧିକ ଦିନ ପରେ ଜିଲା ମୁଖ୍ୟ କୃଷି ଅଧିକାରୀ ହିମାଂଶୁ ମୋହନ ମିଶ୍ର, ଅତିରିକ୍ତ ଜିଲା କୃଷି ଅଧିକାରୀ ତୁଷାରକାନ୍ତ ମହାନ୍ତି, ଜଜାଙ୍ଗସ୍ଥିତ କୃଷି ଗବେଷଣା କେନ୍ଦ୍ରର ବରିଷ୍ଠ ବୈଜ୍ଞାନିକ ସୂର୍ଯ୍ୟ ମିଶ୍ର ପ୍ରମୁଖ ହାତିନା, ଚିଞ୍ଚତ୍ରି, ନୂଆଗଁା, କଇଥା ଆଦି ଅଞ୍ଚଳ ପରିଦର୍ଶନ କରିଛନ୍ତି। ଖୁବ୍ଶୀଘ୍ର ଏହାର ନିରାକରଣ କରାଯିବ ବୋଲି ଚାଷୀମାନଙ୍କୁ ପ୍ରତିଶ୍ରୁତି ଦେଇଥିଲେ। କଇଥା ଗାଁର ଚାଷୀ କୈଳାସ ଚନ୍ଦ୍ର ବାରିକଙ୍କ କହିବା କଥା ହେଲା, ସେ ୩ ଏକର ଜମିରେ ୧୦୦୧ ଓ କନକ ପ୍ଲସ ଧାନ ଚାଷ କରିଛନ୍ତି। ଦେଢ଼ମାସ ତଳେ ଚାଷ କାର୍ଯ୍ୟ ସରିଥିଲା। ଗୁଣ୍ଠ ପିଛା ୫ କେଜି ଡିଏପି ଓ ୟୁରିଆ ସାର ପକାଇଥିଲି। ୨୫ଦିନ ତଳେ ଧାନଗଛରେ ଗିରିଆ ପୋକ ଲାଗି ଯାଇଥିଲା। ଧାନଗଛଗୁଡିକ ଧଳା ପଡି ଯାଇଥିଲା। ଦୁଇଥର କାନନ ଔଷଧ ସ୍ପ୍ରେ କରି ସାରିବା ପରେ ବି ପୋକ ମରି ନ ଥିଲେ। ଖବରପାଇ ଜଣେ କୃଷି କର୍ମଚାରୀ ପହଞ୍ଚତ୍ ଏକ ଔଷଧ ସିଞ୍ଚନ ପାଇଁ କହିଥିଲେ, ଯାହାକି କୌଣସି ସ୍ଥାନରେ ମିଳି ନ ଥିଲା। ଆମେ କାନନ ଔଷଧ ବାରମ୍ବାର ସିଞ୍ଚନ କରିବା ପରେ ଏବେ ଧାନଗଛ ପୁଣି ଧଳାରୁ ସବୁଜ ହେଉଛି। କିନ୍ତୁ ଯେଉଁ ପରିମାଣରେ ଧାନ ହେବା କଥା ତାହା ହୋଇନାହିଁ। ଏବେ ବି ଅଧିକାଂଶ ଜମିରେ ଏହି ପୋକ ଉପଦ୍ରବ ରହିଛି। କୃଷି ବିଭାଗର ଅଧିକାରୀ ପୂର୍ବରୁ ଆସି ପଦକ୍ଷେପ ନେଇଥିଲେ, ଆମେ ସୁଫଳ ପାଇଥା’ନ୍ତୁ ବୋଲି ସେ କହିଛନ୍ତି।
