ଡାଭୋସ୍, ୨୩ା୫: କରୋନା ମହାମାରୀ ଯୋଗୁ ପ୍ରାୟ ଅଢ଼େଇ ବର୍ଷର ବ୍ୟବଧାନ ପରେ ସୁଇଜରଲାଣ୍ଡର ଡାଭୋସ୍ ସହରରେ ବିଶ୍ୱ ଅର୍ଥନୈତିକ ଫୋରମ(ଡବ୍ଲ୍ୟୁଇଏଫ୍) ସମ୍ମିଳନୀ ରବିବାର ଆରମ୍ଭ ହୋଇଛି। ୫ ଦିନ ଧରି ଚାଲିବାକୁ ଥିବା ଏହି ବୈଠକର ଥିମ୍ ରହିଛି ‘ଓ୍ବାର୍କିଂ ଟୁଗେଦର, ରିଷ୍ଟୋରିଂ ଟ୍ରଷ୍ଟ’ (ଏକାଠି କାର୍ଯ୍ୟ କରିବା, ପୁନଃବିଶ୍ୱାସ ସ୍ଥାପନ)। ଗତ ଜାନୁୟାରୀରେ ଡବ୍ଲ୍ୟୁଇଏଫ୍ ସମ୍ମିଳନୀ ଆରମ୍ଭ ହେବାକୁ ସ୍ଥିର ହୋଇଥିଲେ ହେଁ ଓମିକ୍ରନ୍ ଭାରିଆଣ୍ଟ ଯୋଗୁ ତାହା ପୁଣି ଘୁଞ୍ଚିଥିଲା।
ଊର୍ଦ୍ଧ୍ୱ ବର୍ଷ ଧରି ଡାଭୋସ୍ରେ ଆୟୋଜିତ ହୋଇଆସୁଥିବା ଓ୍ବାଲର୍ଡ ଇକୋନୋମିକ୍ ଫୋରମ୍ର ଚଳିତ ବର୍ଷ ମୁଖ୍ୟ ଏଜେଣ୍ଡାରେ ରହିଛି ମହାମାରୀ ଯୋଗୁ ନିମ୍ନଗାମୀ ଅର୍ଥନୀତିରେ ସୁଧାର, ମୁଦ୍ରାସ୍ଫୀତି ନିୟନ୍ତ୍ରଣ, ଜଳବାୟୁ ପରିବର୍ତ୍ତନ, ୟୁକ୍ରେନ୍ ସମସ୍ୟା, ଭୂରାଜନୈତିକ ସଂଘର୍ଷରେ ବିରାମ, ଉନ୍ନତ ଭବିଷ୍ୟତ ଦିଗରେ କାର୍ଯ୍ୟ। ଏଥିରେ ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି ଉଦ୍ବୋଧନ ଦେବାର କାର୍ଯ୍ୟକ୍ରମ ରହିଛି। ୟୁରୋପୀୟ କମିଶନ୍ର ରାଷ୍ଟ୍ରପତି ଉର୍ସୁଲା ଭୋନ୍ ଡେନ୍ ଲେୟେନ୍ ଏବଂ ଜର୍ମାନ ଚାନ୍ସେଲର ଓଲାଫ୍ ସ୍କୋଲଜ୍ ପ୍ରମୁଖ ସାମିଲ ହୋଇଛନ୍ତି।
୩ କେନ୍ଦ୍ରମନ୍ତ୍ରୀ ପୀୟୂଷ ଗୋଏଲ, ମନସୁଖ ମାଣ୍ଡବ୍ୟ ଏବଂ ହରଦୀପ ସିଂ ପୁରୀଙ୍କ ସମେତ କର୍ନାଟକ ମୁଖ୍ୟମନ୍ତ୍ରୀ ବାସବରାଜ ବୋମାଇ, ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଓ୍ବାଇ. ଏସ୍. ଜଗନମୋହନ ରେଡ୍ଡୀ ଏହି କାର୍ଯ୍ୟକ୍ରମରେ ଯୋଗଦେଇଛନ୍ତି। ଡବ୍ଲ୍ୟୁଇଏଫ୍ ମଞ୍ଚରେ ସାମିଲ ହୋଇଥିବା ଅନ୍ୟ ରାଜ୍ୟର ନେତାଙ୍କ ମଧ୍ୟରେ ତେଲଙ୍ଗାନାର କେ. ଟି. ରାମାରାଓ, ମହାରାଷ୍ଟ୍ରର ଆଦିତ୍ୟ ଠାକ୍ରେ, ତାମିଲନାଡ଼ୁର ଥାଙ୍ଗମ୍ ଥେନ୍ନାରାସୁ ପ୍ରମୁଖ ରହିଛନ୍ତି। ଭାରତର ଶତାଧିକ ସିଇଓ, ବିଜ୍ନେସ୍ ମ୍ୟାନ୍ଙ୍କୁ ଏହି ୫ ଦିନିଆ ସମ୍ମିଳନୀକୁ ନିମନ୍ତ୍ରଣ କରାଯାଇଛି। ପ୍ରାୟ ୨୫ଶହ ବିଶ୍ୱସ୍ତରୀୟ ନେତା, ଅଧିକାରୀ, ବିଶେଷଜ୍ଞ ଗୋଟିଏ ମଞ୍ଚରେ ଏକାଠି ହୋଇ ବିଭିନ୍ନ ପ୍ରସଙ୍ଗରେ ସେମାନଙ୍କ ମତ ରଖିବେ।
