ନୂଆଦିଲ୍ଲୀ, ୬।୪(ପି.ଟି.): କରୋନା ସଂକ୍ରମଣର ଦ୍ୱିତୀୟ ଲହର ପୂର୍ବାପେକ୍ଷା ଅଧିକ ଦ୍ରୁତ ବେଗରେ ମାଡ଼ିଚାଲିଛି। ଦୈନିକ ସଂକ୍ରମଣ ୨୦ହଜାରରୁ ୧ ଲକ୍ଷରେ ପହଞ୍ଚତ୍ବାକୁ ମାତ୍ର ୨୫ ଦିନ ସମୟ ଲାଗିଛି। ଗତବର୍ଷ ସେପ୍ଟେମ୍ବର ୧୭ରେ ସର୍ବାଧିକ ଦୈନିକ ସଂକ୍ରମଣ ୯୭,୮୯୪ରେ ପହଞ୍ଚତ୍ଥିଲା। ଏଥିପାଇଁ ୭୬ ଦିନ ସମୟ ଲାଗିଥିଲା। ଗୋଟିଏ ଦିନରେ ୧,୦୩,୫୫୮ ସଂକ୍ରମଣ ସହ ଦେଶରେ ମୋଟ ସଂକ୍ରମିତଙ୍କ ୧,୨୫,୮୯,୦୬୭ରେ ପହଞ୍ଚତ୍ଥିବା ସୋମବାର ସ୍ବାସ୍ଥ୍ୟ ମନ୍ତ୍ରଣାଳୟ ତଥ୍ୟରୁ ଜଣାପଡ଼ିଛି। ନୂଆ ସଂକ୍ରମଣର ୫୫.୧୧ ପ୍ରତିଶତ କେବଳ ମହାରାଷ୍ଟ୍ରରେ ରହିଛି। ସେଠାରେ ଦୈଦିକ ସଂକ୍ରମଣ ୫୭,୦୭୬ ହୋଇଥିବାବେଳେ ଛତିଶଗଡ଼ରେ ୫,୨୫୦ ଏବଂ କର୍ନାଟକରେ ୪,୫୫୩ ରହିଛି।
ଗତବର୍ଷ ଡିସେମ୍ବର ୧୪ ପରେ ଦୈନିକ ସଂକ୍ରମଣ ୩୦ ହଜାର ତଳକୁ ଖସିଥିଲା ଏବଂ ଗତ ଫେବୃୟାରୀ ୨ରେ ଏହା ହ୍ରାସ ପାଇ ୮,୬୩୫ରେ ପହଞ୍ଚତ୍ଥିଲା। ଏହା ପରେ ପୁଣିଥରେ ସଂକ୍ରମଣ ଉପରମୁହାଁ ହୋଇଥିଲା। ଏବେ ଦେଶରେ ସକ୍ରିୟ ମାମଲା ସଂଖ୍ୟା ୭,୪୧,୮୩୦କୁ ବୃଦ୍ଧି ପାଇଛି, ଯାହା ଫେବୃୟାରୀ ୧୨ରେ ସର୍ବନିମ୍ନ ୧,୩୫,୯୨୬ ଥିଲା। ଡିସେମ୍ବର ୧୯ରେ ଭାରତରେ ମୋଟ ସଂକ୍ରମିତଙ୍କ ସଂଖ୍ୟା ୧ କୋଟି ଟପିଥିଲା।
ମହାରାଷ୍ଟ୍ରରୁ ପ୍ରବାସୀ ଶ୍ରମିକ ଘରମୁହାଁ
ମହାରାଷ୍ଟ୍ରରେ କରୋନା ସଂକ୍ରମଣ ଦ୍ରୁତ ବେଗରେ ବଢ଼ିଚାଲିଥିବାବେଳେ ରାଜ୍ୟ ସରକାର ରାତ୍ରକାଳୀନ କର୍ଫ୍ୟୁ ଏବଂ ସପ୍ତାହାନ୍ତ ଲକ୍ଡାଉନ ଘୋଷଣା କରିଛନ୍ତି। ଗତବର୍ଷ ଲକ୍ଡାଉନ ଯୋଗୁ ପ୍ରବାସୀ ଶ୍ରମିକମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥିଲେ। କାମଧନ୍ଦା ହରାଇ ସେମାନଙ୍କୁ ଭୋକ ଉପାସରେ ରହିବାକୁ ପଡ଼ିଥିଲା। ଘରକୁ ଫେରିବା ପାଇଁ ସେମାନେ ଶହ ଶହ କିଲୋମିଟର ଚାଲିଥିଲେ। ତେଣୁ ଆଗାମୀ ଦିନରେ ସମ୍ପୂର୍ଣ୍ଣ ଲକ୍ଡାଉନ ହେବା ଆଶଙ୍କାରେ ମହାରାଷ୍ଟ୍ରରେ ଥିବା ପ୍ରବାସୀ ଶ୍ରମିକମାନେ ଘରମୁହାଁ ହୋଇଛନ୍ତି। ସୀମାରେ କଟକଣା ଲାଗୁ ହେବା ପୂର୍ବରୁ ନାସିକରୁ ଅନେକ ପ୍ରବାସୀ ଶ୍ରମିକ ସେମାନଙ୍କ ରାଜ୍ୟ ମଧ୍ୟପ୍ରଦେଶ, ଉତ୍ତରପ୍ରଦେଶ, ବିହାର ଏବଂ ପଶ୍ଚିମବଙ୍ଗ ଫେରିଗଲେଣି। ଏହି ଶ୍ରମିକମାନେ ବିଭିନ୍ନ ରେଷ୍ଟୁରାଣ୍ଟ, ଶିଳ୍ପସଂସ୍ଥା ଓ ନିର୍ମାଣ କାର୍ଯ୍ୟରେ ନିୟୋଜିତ ଥିଲେ। କେତେଜଣ ଶ୍ରମିକ ସେମାନଙ୍କ ରାଜ୍ୟକୁ ଯିବା ଲାଗି ବିଭିନ୍ନ ଷ୍ଟେଶନରେ ଟ୍ରେନ୍ ଅପେକ୍ଷାରେ ରହିଛନ୍ତି।
ନାସିକ ରେଷ୍ଟୁରାଣ୍ଟରେ କୁକ୍ ଭାବେ କାର୍ଯ୍ୟ କରୁଥିବା ରୋଷନ କୁମାର ସିଂ ତାଙ୍କର ସ୍ତ୍ରୀ, ତିନି ପିଲା ଓ ତାଙ୍କ ଭାଇଙ୍କ ପରିବାର ସଦସ୍ୟମାନଙ୍କୁ ସାଙ୍ଗରେ ଧରି ନିଜ ଘର ଉତ୍ତରପ୍ରଦେଶର କାନପୁର ଅଭିମୁଖେ ବାହାରିଛନ୍ତି। ଯଦି ଆଉଥରେ ଲକ୍ଡାଉନ ହୋଇଯାଏ ତେବେ ଆମେ ବହୁତ ଅସୁବିଧାରେ ପଡ଼ିଯିବୁ ବୋଲି ସେ କହିଛନ୍ତି। ନିର୍ମାଣ କାର୍ଯ୍ୟରେ ନିୟୋଜିତ ଥିବା ଅନୁରାଗ ସିଂ ତାଙ୍କ ନିଜ ରାଜ୍ୟ ଉତ୍ତରପ୍ରଦେଶକୁ ଫେରିଆସିଛନ୍ତି। ଏଠାରେ ସ୍ଥିତି ଭଲ ଅଛି ଓ ଯେକୌଣସି ପ୍ରକାରେ ଚଳିଯିବେ ବୋଲି ସେ କହିଛନ୍ତି। ଗତଥର ଲକ୍ଡାଉନ ବେଳେ ତାଙ୍କ ନିଯୁକ୍ତିଦାତା ଟ୍ରେନ୍ ଚାଲିବା ପର୍ଯ୍ୟନ୍ତ ଖାଦ୍ୟ ଓ ଆଶ୍ରୟ ଯୋଗାଇ ଦେଇଥିଲେ। ବର୍ତ୍ତମାନ କ୍ଷୁଦ୍ର ବ୍ୟବସାୟୀମାନେ ସେମାନଙ୍କ କର୍ମଚାରୀଙ୍କୁ ସହାୟତା କରିବା ସ୍ଥିତିରେ ନ ଥିବା ଅନୁରାଗ କହିଛନ୍ତି। ତେଣୁ ସମ୍ପୂର୍ଣ୍ଣ ଲକ୍ଡାଉନ ଲାଗୁ ହେବା ପୂର୍ବରୁ ପ୍ରବାସୀ ଶ୍ରମିକମାନେ ସେମାନଙ୍କ ନିଜ ରାଜ୍ୟକୁ ଫେରିଯିବାକୁ ଶ୍ରେୟ ମଣୁଛନ୍ତି।