ପାଣି ପାଇଁ ହନ୍ତସନ୍ତ ଇନ୍ଦ୍ରାବତୀ ପ୍ରକଳ୍ପ କଲୋନିବାସୀ
1:15 pmApril 16, 2023April 16, 2023 / 05

ତେନ୍ତୁଳିଖୁଣ୍ଟି,୧୬ା୪(ଡି.ଏନ୍‌.ଏ.): ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକ ଖାତିଗୁଡ଼ାରେ ଇନ୍ଦ୍ରାବତୀ ପ୍ରକଳ୍ପ କଲୋନି ବାସୀ ପାଣି ପାଇଁ ହନ୍ତସନ୍ତ ହେଉଛନ୍ତି। ଗତ କିଛିଦିନ ହେବ କଲୋନି ବାସୀଙ୍କୁ ଇନ୍ଦ୍ରାବତୀ କଲୋନି ମରାମତି ତଥା ପାନୀୟ ଜଳ ଯୋଗାଣ ଉପ ବିଭାଗ ଦ୍ୱାରା ଦିଆଯାଉଥିବା ଜଳ ଯୋଗାଣ ବ୍ୟବସ୍ଥାରେ ବ୍ୟାପକ ତ୍ରୁଟି ଦେଖାଦେଇଛି। ପ୍ରଥମ ପର୍ଯ୍ୟାୟରେ ମୋଟର ପମ୍ପ ଖରାପ ହେବାରୁ ୨ ଦିନ ପାଣି ସମସ୍ୟା ଦେଖାଦେଲା। ତା’ ପରେ ୨ ଦିନ ଝଡ଼ ବର୍ଷା ଯୋଗୁ ବିଦ୍ୟୁତ୍‌ ସମସ୍ୟା ପାଇଁ ପାଣି ଯୋଗାଣ ବ୍ୟାହତ ହେଲା। ଏବେ କିଛି ଦିନ ହେବ ପାଣିଛଡ଼ା ଯାଉଥିବା ଭଲବରେ ତ୍ରୁଟି ଯୋଗୁ ପାଣି ସମସ୍ୟା ଦେଇ ଗତି କରୁଛନ୍ତି କଲୋନି ବାସୀ। ସମସ୍ୟା ସମାଧାନ କାହିଁକି ହୋଇ ପାରୁନି ବୋଲି ପାଣି ଛାଡ଼ୁଥିବା କର୍ମଚାରୀଙ୍କୁ ପଚାରିବାରୁ ସେ କହିଲେ, ସମସ୍ୟା ସମ୍ପର୍କରେ ଉପରିସ୍ଥ ଅଧିକାରୀଙ୍କୁ ଜଣାଇ ଦେଇଛୁ। ମୁଖ୍ୟଯନ୍ତ୍ରୀ ତଥା ବେସିନ ମ୍ୟାନେଜର ଇନ୍ଦ୍ରାବତୀ କୋଲାବବେସିନ ଶତ୍ରୁଘ୍ନ ମହାରଣାଙ୍କୁ ପଚାରିବାରୁ କହିଲେ, ଜଳଯୋଗାଣ ବ୍ୟବସ୍ଥା ଆମ ଅଫିସ ଅଧୀନରେ ନାହିଁ, କଲୋନୀ ରାସ୍ତା, ଜଳ ଯୋଗାଣ, କଲୋନି କ୍ୱାର୍ଟର ମରାମତି ତଥା ଦୁଇଟି ଯାକ ଅତିଥି ଭବନ, ବିଶ୍ରାମାଗାର, ମୁଖ୍ୟଯନ୍ତ୍ରୀ ଇନ୍ଦ୍ରାବତୀ ଓ କୋଲାବ ବେସିନ ଅଧୀନକୁ ଆଣିବାକୁ ଚିଠି କରାଯାଇଛି। ମୁଖ୍ୟ ନିର୍ମାଣ ଯନ୍ତ୍ରୀ ଅନିଲ ପାଣିଗ୍ରାହୀଙ୍କୁ ପଚାରିବାରୁ ସେ କହିଛନ୍ତି, ମୁଁ ଉକ୍ତ ବିଭାଗର ସହକାରୀ ଯନ୍ତ୍ରୀଙ୍କୁ କହିଦେବି ଖୁବ୍‌ ଶୀଘ୍ର ସମସ୍ୟା ସମାଧାନ କରିବାକୁ। ସହକାରୀ ଯନ୍ତ୍ରୀ ଶୁଭେନ୍ଦୁ ସାହୁଙ୍କୁ ପଚାରିବାରୁ ସେ କହିଲେ, ସେ କିଛିଦିନ କୁସୁମଖୁଣ୍ଟିରେ ଅନ୍ୟ ସରକାରୀ କାର୍ଯ୍ୟରେ ବ୍ୟସ୍ତ ଅଛନ୍ତି। ଦିନେ ଦୁଇ ଦିନ ମଧ୍ୟରେ ଖାତିଗୁଡ଼ା ଯାଇ ଜଳଯୋଗାଣ ତ୍ରୁଟି ସୁଧାରିବାର ବ୍ୟବସ୍ଥା କରିବେ। ଖାତିଗୁଡ଼ାରେ ବର୍ତ୍ତମାନ ୩ଟି ବ୍ୟବସ୍ଥାରେ ପ୍ରକଳ୍ପ ଚାଲିଛି। ଓଡ଼ିଶା ଜଳବିଦ୍ୟୁତ୍‌ ନିଗମ, ମୁଖ୍ୟଯନ୍ତ୍ରୀ ଇନ୍ଦ୍ରାବତୀ ଓ କୋଲାବବେସିନ, ଅନ୍ୟଟି ମୁଖ୍ୟନିର୍ମାଣ ଯନ୍ତ୍ରୀ ମୁଖୀଗୁଡ଼ା। ଏଭଳି ସ୍ଥିତିରେ କେଉଁ ସମସ୍ୟା କିଏ ସମାଧାନ କରିବ ତାହା ବୁଝା ପଡ଼ୁନି। ଏଥିପାଇଁ ଖାତିଗୁଡ଼ାରେ ଥିବା ପ୍ରକଳ୍ପ ଅଧିନସ୍ଥ ଶିକ୍ଷାନୁଷ୍ଠାନ ,ଚିକିତ୍ସାଳୟ ଏବଂ କଲୋନୀ ରାସ୍ତା ଦୂରାବସ୍ଥା ମଧ୍ୟରେ ରହିଛି।