ନୂଆଦିଲ୍ଲୀ,୨୯।୧୨: ଇଣ୍ଡୋନେସିଆର ଏକ ନର୍ସିଂହୋମରେ ଏକ ବଡ଼ ଅଗ୍ନିକାଣ୍ଡ ଘଟିଛି, ଯେଉଁଥିରେ ୧୬ ଜଣଙ୍କର ମୃତ୍ୟୁ ହୋଇଛି। ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଛି । ଖବରପାଇ ତଦନ୍ତକାରୀ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ସୋମବାର ଦିନ, ସ୍ଥାନୀୟ କର୍ତ୍ତୃପକ୍ଷ ସୂଚନା ଦେଇଛନ୍ତି ଯେ ଇଣ୍ଡୋନେସିଆ ପୋଲିସ ଉତ୍ତର ସୁଲାୱେସି ପ୍ରଦେଶର ରାଜଧାନୀ ମାନାଡୋରେ ଏକ ନର୍ସିଂହୋମରେ ଅଗ୍ନିକାଣ୍ଡର ତଦନ୍ତ କରୁଛି । ଅଗ୍ନିକାଣ୍ଡରେ ମୃତ୍ୟୁବରଣ କରିଥିବା ୧୬ ଜଣଙ୍କୁ ଚିହ୍ନଟ କରିବା ପାଇଁ ପ୍ରୟାସ ଆରମ୍ଭ ହୋଇଛି । ପୋଲ୍ଡା ସୁଲୁଟର ଜନସମ୍ପର୍କ ମୁଖ୍ୟ ଆଲମସ୍ୟାହ ପି. ହାସିବୁଆନଙ୍କ ଅନୁଯାୟୀ, ଉତ୍ତର ସୁଲାୱେସି ଆଞ୍ଚଳିକ ପୋଲିସ ଭୟାଙ୍ଗକାରା ହସ୍ପିଟାଲରେ ପୀଡିତଙ୍କ ମୃତଦେହ ଚିହ୍ନଟ କରୁଛି ।
ଅଧିକାରୀଙ୍କ ଉଦ୍ଧୃତି ଦେଇ ଜିନହୁଆ ରିପୋର୍ଟ କରିଛି ଯେ ରବିବାର ସ୍ଥାନୀୟ ସମୟ ପ୍ରାୟ ୮ଟା୩୬ ସମୟରେ ମାନାଡୋର ପାଲ ଦୁଆ ଜିଲ୍ଲାର ପାନ୍ତି ୱେରାଧା ଦମାଇ ନର୍ସିଂ ହୋମରେ ଅଗ୍ନିକାଣ୍ଡ ଘଟିଥିଲା। ମାନାଡୋ ନଗର ସରକାରଙ୍କ ଦ୍ୱାରା ପଠାଯାଇଥିବା ତିନୋଟି ଦମକଳ ଗାଡ଼ି ଘଟଣାସ୍ଥଳରେ ପହଞ୍ଚିବା ପରେ ରାତି ପ୍ରାୟ ୯ଟା୩୦ ସମୟରେ ନିଆଁ ଲିଭାଇବାରେ ସମ୍ଭବ ହୋଇପାରିଥିଲା ।
ଅଗ୍ନିକାଣ୍ଡର ଖବର ପାଇବା ପରେ, ପୋଲିସ ଅଧିକାରୀମାନେ ଘଟଣାସ୍ଥଳକୁ ପହଞ୍ଚିଥିଲେ। ସେମାନେ ଅଞ୍ଚଳକୁ ସୁରକ୍ଷିତ ରଖିବା ଏବଂ ଉଦ୍ଧାର କାର୍ଯ୍ୟରେ ସହାୟତା କରିବା କାର୍ଯ୍ୟ ଆରମ୍ଭ କରିଥିଲେ। ବଞ୍ଚିଥିବା ଲୋକଙ୍କୁ ମାନାଡୋ ସିଟି ଆଞ୍ଚଳିକ ହସ୍ପିଟାଲ ଏବଂ ପର୍ମାଟା ବୁଣ୍ଡା ହସ୍ପିଟାଲକୁ ନିଆଯାଇଥିଲା।
ହାସିବୁଆନ କହିଛନ୍ତି ଯେ ପୋଲିସ ଫୋରେନସିକ୍ ଦଳ ଘଟଣା କ୍ରମ ଏବଂ ଅଗ୍ନିକାଣ୍ଡର କାରଣ ଜାଣିବା ପାଇ ପ୍ରତ୍ୟକ୍ଷଦର୍ଶୀଙ୍କୁ ମଧ୍ୟ ପଚରାଉଚରା କରାଯାଉଛି।
