ଗଞ୍ଜାମ,୧।୯(ବିଦ୍ୟାଧର ସାହୁ): ଗଞ୍ଜାମ ଏନଏସି ଅନ୍ତର୍ଗତ ୱାର୍ଡ ନମ୍ବର ୩ ଆଖଡ଼ା ବନ୍ଧ ସାହି l ଉକ୍ତ ସାହିରେ ୩୫ରୁ ୪୦ ପରିବାରର ପ୍ରାୟ ତିନିଶହରୁ ଉର୍ଦ୍ଧ୍ୱ ଲୋକ ବାସ କରନ୍ତି। ୧୯୬୫ରେ ସ୍ଥାପିତ ବହୁ ପୁରାତନ ଏକ୍ସ ବୋର୍ଡ ପ୍ରାଥମିକ ବିଦ୍ୟାଳୟ ରହିଛି l ଉକ୍ତ ସ୍କୁଲ ସମୁଖରେ ଅନାବନା ଛୋଟ ଛୋଟ ବୃକ୍ଷ ଲତା ସହ ଅଳିଆ ଆବର୍ଜନାରେ ପରିପୂର୍ଣ୍ଣ l ସ୍କୁଲକୁ ଲାଗି ଏକ ଛୋଟିଆ ପୋଖରୀଟିଏ ଅଛି। କିନ୍ତୁ ଦଳ ଭର୍ତ୍ତି ହୋଇ ରହିଥିବା ଯୋଗୁ ଗାଧୋଇବାରେ ଅସୁବିଧା ହେଉଥିବା ସାହିର ଜୟକୃଷ୍ଣ ରେଡ୍ଡୀ ଏବଂ କେଞ୍ଚୁ ଗୌଡ଼ ପ୍ରମୁଖ ଅଭିଯୋଗ କରିଛନ୍ତି l ଏଥିସହ ପୋଖରୀ ତୁଠ ନିକଟରେ ଷ୍ଟ୍ରିଟ ଲାଇଟ ଥିଲେ ମଧ୍ୟ ତାହା ଜଳୁନାହିଁ l ସ୍କୁଲ ପାଚେରି ଦେଇ ବିଦ୍ୟୁତ ତାର ଗଛକୁ ଲାଗି ରହିଥିବା ଫଳରେ ବର୍ଷା ହେଲେ କରେଣ୍ଟ ମାରୁଥିବା ସେମାନେ ଅଭିଯୋଗ କରିଛନ୍ତି l
ଏଥିସହ ସାହିର ଡ୍ରେନ ଦୀର୍ଘ ଦିନ ଧରି ସଫେଇ ନହେବା କାରଣରୁ ତାହା ପୋତି ହୋଇ ଯାଇଥିବା ଦେଖିବାକୁ ମିଳିଛି l ଯାହା ଫଳରେ ବର୍ଷା ଜଳ ନିଷ୍କାସନ ନ ହୋଇ ସାହି ମଧ୍ୟରେ ପଶୁଛି ବୋଲି ଲୋକେ ଗଣମାଧ୍ୟମକୁ କହିଛନ୍ତି l ଉକ୍ତ ସାହିରେ ଅଙ୍ଗନବାଡି କେନ୍ଦ୍ର ଥିଲେ ମଧ୍ୟ କରେଣ୍ଟ ନ ଥିବା ଯୋଗୁ ୨୦ ରୁ ୨୫ କୋମଳମତି ଶିଶୁ ନାନା ହଇରାଣ ହେଉଥିବା ଅଙ୍ଗନୱାଡିକର୍ମୀ ବବିତା ସେଠୀ କହିଛନ୍ତି l ସାହିଠାରେ ମିଶନ ଶକ୍ତି ଗୃହ ନିର୍ମାଣ କାର୍ଯ୍ୟ ସରିଥିଲେ ସୁଦ୍ଧା ଏଯାବତ କାର୍ଯ୍ୟକ୍ଷମ ହୋଇନାହିଁ l ଠିକାଦାରଙ୍କ ବିଲ ନହେବା ଯୋଗୁ ସେ ତାଲା ପକାଇ ରଖିଛନ୍ତି ଏବଂ ଚାବି ହସ୍ତାନ୍ତର କରୁନାଁହାନ୍ତି ବୋଲି ସାହି ବାସିନ୍ଦା ଅଭିଯୋଗ କରିଛନ୍ତି l ଏସମ୍ପର୍କରେ ଏନଏସି ଇଓ ଅପର୍ଣ୍ଣା ଡାଙ୍ଗୁଆଙ୍କୁ ପଚାରିବାରେ ପରିଦର୍ଶନ କରି ପଦକ୍ଷେପ ନିଆଯିବ ବୋଲି ସେ କହିଛନ୍ତି l
