ନୂଆଦିଲ୍ଲୀ, ୯।୭ : ପ୍ରତିରକ୍ଷା କ୍ଷେତ୍ରରେ ଆତ୍ମନିର୍ଭରଶୀଳତା ଭାରତର ପ୍ରୟାସ କ୍ରମାଗତ ଭାବରେ ବୃଦ୍ଧି ପାଉଛି। ବିଶେଷ କରି ଘରୋଇ ଟେକ୍ନୋଲୋଜିର ବିକାଶ ଏବଂ ଏହାକୁ ବିଶ୍ୱସ୍ତରୀୟ କରିବା ଉଦ୍ୟମ ଅନ୍ତର୍ଗତ ଦେଶର ପ୍ରତିରକ୍ଷା କ୍ଷେତ୍ର କ୍ରମାଗତ ଭାବେ ଅଗ୍ରଗତି କରୁଛି। ୨୦୨୧-୨୨ ଆର୍ଥିକ ବର୍ଷ ପାଇଁ ପ୍ରତିରକ୍ଷା ରପ୍ତାନୀରେ ଭାରତ ରେକର୍ଡ କରିଛି। ଗୋଟିଏ ବର୍ଷ ମଧ୍ୟରେ ଭାରତ ପ୍ରତିରକ୍ଷା ରପ୍ତାନି କ୍ଷେତ୍ରରେ ୧୩ ହଜାର କୋଟି ଟଙ୍କା ଛୁଇଁଛି। ୨୦୨୦-୨୧ ଆର୍ଥିକ ବର୍ଷ ତୁଳନାରେ ଏହା ୫୪.୧ପ୍ରତିଶତ ବୃଦ୍ଧି ପାଇଛି।
ତେବେ ଏକ ଆଶ୍ଚର୍ଯ୍ୟଜନକ କଥା ହେଉଛି ମୋଟ ରପ୍ତାନୀର ୭୦ ପ୍ରତିଶତ ବେସରକାରୀ କ୍ଷେତ୍ର ହୋଇଥିବାବେଳେ ରପ୍ତାନୀର ମାତ୍ର ୩୦ ପ୍ରତିଶତ ସରକାରୀ କ୍ଷେତ୍ର ଦ୍ୱାରା ହୋଇପାରିଛି। ପ୍ରତିରକ୍ଷା ଉତ୍ପାଦନ ବିଭାଗର ଅତିରିକ୍ତ ସଚିବ ସଞ୍ଜୟ ଜାଜୁଙ୍କ ଅନୁଯାୟୀ ଦେଶର ପ୍ରତିରକ୍ଷା ରପ୍ତାନି ମୁଖ୍ୟତଃ ଆମେରିକା, ଫିଲିପାଇନ୍ସ, ଦକ୍ଷିଣ ପୂର୍ବ ଏସିଆ, ମଧ୍ୟ ପୂର୍ବ ଏବଂ ଆଫ୍ରିକା ଦେଶକୁ ଯାଇଥାଏ। ୨୦୨୦-୨୧ରେ ଭାରତର ପ୍ରତିରକ୍ଷା ରପ୍ତାନି ୮ ହଜାର ୪୩୪ କୋଟି ଟଙ୍କା ଥିବାବେଳେ ୨୦୧୯-୨୦ ରେ ଏହା ୯ ହଜାର ୧୧୫ କୋଟି ଥିଲା। ୨୦୧୫-୧୬ ଆର୍ଥିକ ବର୍ଷରେ ଭାରତର ପ୍ରତିରକ୍ଷା ରପ୍ତାନି ୨୦୫୯ କୋଟି ଟଙ୍କା ଥିଲା। ଅପରପକ୍ଷରେ, କୋଭିଡ କାରଣରୁ ଗତ ଦୁଇ ବର୍ଷ ଧରି ସ୍ଥିତିରେ ଉନ୍ନତି ସମ୍ଭବ ହୋଇ ପାରି ନ ଥିଲା। ୨୦୨୧-୨୨ ଆର୍ଥିକ ବର୍ଷରେ ପ୍ରତିରକ୍ଷା ରପ୍ତାନିକୁ ପୂର୍ବ ୫ ବର୍ଷ ତୁଳନାରେ ଆଠ ଗୁଣା ବୃଦ୍ଧି କରିଛି।
ସଞ୍ଜୟ ଜାଜୁ କହିଛନ୍ତି ଯେ ପ୍ରାୟ ୭୦ ପ୍ରତିଶତ ରପ୍ତାନି କରି ଘରୋଇ କମ୍ପାନୀଗୁଡିକ ଭଲ ପ୍ରଦର୍ଶନ କରିଛନ୍ତି। ସୂଚନାଯୋଗ୍ୟ ଯେ ଚଳିତ ବର୍ଷ ଜାନୁଆରୀରେ ଫିଲିପାଇନ୍ସ ସହିତ ଭାରତ ୩୭.୫ କୋଟି ଡଲାର (ପ୍ରାୟ ୨୭୭୦ କୋଟି ଟଙ୍କା) ଚୁକ୍ତି କରିଥିଲା। ଏହା ଅନ୍ତର୍ଗତ ଫିଲିପାଇନ୍ସକୁ ବ୍ରହ୍ମୋସ ସୁପରସୋନିକ କ୍ଷେପଣାସ୍ତ୍ର ଯୋଗାଇବା ପାଇଁ ଭାରତ ଏକ ଚୁକ୍ତିନାମା ସ୍ବାକ୍ଷର କରିଛି।
