ଜେନେଭା,୪।୫ : ମିଳିତ ଜାତିସଂଘ ବୈଠକରେ ଭାରତ ପୁଣି ଥରେ ସୁରକ୍ଷା ପରିଷଦର ବ୍ୟବସ୍ଥା ଉପରେ ପ୍ରଶ୍ନ ଉଠାଇ ଏଥିରେ ପରିବର୍ତ୍ତନ ଆଣିବାକୁ ଦାବି କରିଛି। ମିଳିତ ଜାତିସଂଘରେ ଭାରତର ସ୍ଥାୟୀ ପ୍ରତିନିଧୀ ରୁଚିରା କାମ୍ବୋଜ କହିଛନ୍ତି, ସୁରକ୍ଷା ପରିଷଦର ପାଞ୍ଚଜଣ ସଦସ୍ୟଙ୍କୁ ଅନ୍ୟ ଦେଶ ସହ ସମାନ କରାଯିବା ଉଚିତ।
ମିଳିତ ଜାତିସଂଘର ସୁରକ୍ଷା ପରିଷଦରେ ବିଶ୍ୱରେ ଶାନ୍ତି ବଜାୟ ରଖିବା ପାଇଁ ବିଶ୍ୱାସକୁ ପ୍ରୋତ୍ସାହିତ କରିବା ବିଷୟ ଉପରେ ଆଲୋଚନା କରାଯାଉ ବୋଲି ସେ କହିଛନ୍ତି। ଏହି ଆଲୋଚନା ସମୟରେ ରୁଚିରା କାମ୍ବୋଜ କହିଛନ୍ତି, ଯଦି ପରିଷଦ ଭବିଷ୍ୟତରେ ଶାନ୍ତି ବଜାୟ ରଖିବାକୁ ଚାହୁଁଛି, ତେବେ ପ୍ରଥମେ ଆମକୁ ଇତିହାସରୁ ଶିଖିବାକୁ ପଡ଼ିବ।
ରୁଚିରା କାମ୍ବୋଜ କହିଛନ୍ତି, ସୁରକ୍ଷା ପରିଷଦର ବର୍ତ୍ତମାନର ବ୍ୟବସ୍ଥାରେ ସମଗ୍ର ଆଫ୍ରିକୀୟ ମହାଦ୍ୱୀପ, ଲାଟିନ ଆମେରିକା, ବିଶ୍ୱର ସର୍ବ ବୃହତ ଗଣତନ୍ତ୍ର ଭାରତର କୌଣସି ପ୍ରତିନିଧିତ୍ୱ ନାହିଁ। ଏଭଳି ପରିସ୍ଥିତିରେ ସୁରକ୍ଷା ପରିଷଦର ପାଞ୍ଚଜଣ ସଦସ୍ୟଙ୍କୁ ଅନ୍ୟମାନଙ୍କ ସହ ସମାନ କରି ଏଥିରେ ଅଧିକ ସଦସ୍ୟଙ୍କୁ ଅନ୍ତର୍ଭୁକ୍ତ କରାଯାଇପାରିବ।
ସୁରକ୍ଷା ପରିଷଦର ବର୍ତ୍ତମାନର ବ୍ୟବସ୍ଥା ଅସମାନତାକୁ ଦୂର କରୁଛି ନା ଏହାକୁ ପ୍ରୋତ୍ସାହିତ କରୁଛି? ଦୀର୍ଘ ଦଶନ୍ଧି ଧରି ଏହାର ଉନ୍ନତି ବିଷୟରେ ଆଲୋଚନା ହୋଇଆସୁଛି, କିନ୍ତୁ ସୁରକ୍ଷା ପରିଷଦର ବିଶ୍ୱାସନୀୟତା ଉପରେ ଉଠୁଥିବା ପ୍ରଶ୍ନର ଉତ୍ତର ନ ପାଇବା ପର୍ଯ୍ୟନ୍ତ ଆମେ ବିଶ୍ୱାସ ଏବଂ ଶାନ୍ତି ଆଣି ପାରିବୁ ନାହିଁ। ପରିଷଦ ସଦସ୍ୟମାନଙ୍କୁ ଅଧିକ ଉତ୍ତରଦାୟୀ କରିବାର ଆବଶ୍ୟକତା ରହିଛି ବୋଲି କାମ୍ବୋଜ କହିଛନ୍ତି। ଏହି ଅନୁଷ୍ଠାନ ଅଧିକ ଖୋଲା ରହିବା ଉଚିତ, ବିବିଧତାକୁ ଅନ୍ତର୍ଭୁକ୍ତ କରି ଏବଂ ଏଥିରେ ବିଶେଷ ଭାବରେ ଦକ୍ଷିଣକୁ ପ୍ରତିନିଧିତ୍ୱ କରିବା ଆବଶ୍ୟକ।
ବିକାଶଶୀଳ ଦେଶଗୁଡ଼ିକୁ ସୁରକ୍ଷା ପରିଷଦରେ ଅନ୍ତର୍ଭୁକ୍ତ କରାଯିବା ଉଚିତ ଏବଂ ଏଥିରେ ସୱରହୀନ ଲୋକଙ୍କୁ ସ୍ବର ଦେବାର ଶକ୍ତି ରହିବ, କେବଳ ସେତେବେଳେ ଏହା ବିଶ୍ୱାସକୁ ଆଗେଇ ନେବାକୁ ସକ୍ଷମ ହେବ। ସୁରକ୍ଷା ପରିଷଦ ମଧ୍ୟ ଆଞ୍ଚଳିକ ସମସ୍ୟାକୁ ପ୍ରାଥମିକତା ଦେବା ଏବଂ ଆହ୍ବାନଗୁଡିକର ସମାଧାନ ପାଇଁ ଏସବୁ ସଂଗଠନଗୁଡ଼ିକ ସହିତ କାର୍ଯ୍ୟ କରିବା ଉଚିିତ ବୋଲି ସେ କହିଛନ୍ତି।
