ମସ୍କୋ,୨୯ା୧୦(ପି.ଟି.): ଭାରତ ସହ ରୁଷିଆର ସମ୍ପର୍କ ସ୍ବତନ୍ତ୍ର। ଦୁଇଦେଶ ସବୁବେଳେ ପରସ୍ପରକୁ ସମର୍ଥନ କରିଆସିଛନ୍ତି ଏବଂ ଭବିଷ୍ୟତରେ ମଧ୍ୟ ଏହା ଜାରି ରହିବ ବୋଲି ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ କହିଛନ୍ତି। ମସ୍କୋସ୍ଥିତ ଥିଙ୍କ୍ଟ୍ୟାଙ୍କ୍ ଭଲ୍ଡାଇ ଇଣ୍ଟରନ୍ୟାଶନାଲ ଡିସ୍କଶନ୍ କ୍ଲବ୍ର ବିସ୍ତୃତ ବୈଠକରେ ଗୁରୁବାର ପୁଟିନ୍ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପ୍ରଶଂସା କରିଛନ୍ତି। ପୁଟିନ୍ କହିଛନ୍ତି, ମୋଦି ନିଜ ଦେଶର ହିତ ଦୃଷ୍ଟିରୁ ଏକ ସ୍ବାଧୀନ ଓ ନିରପେକ୍ଷ ବହିର୍ବ୍ୟାପାର ନୀତି ଆପଣାଇଛନ୍ତି। ରୁଷିଆ ଓ ଭାରତ ମଧ୍ୟରେ ସାମରିକ ତଥା ବୈଷୟିକ ସହଯୋଗ ଜାରି ରହିବ। ଭାରତ ସହିତ ଆମର ବିଶେଷ ସମ୍ପର୍କ ରହିଛି, ଯାହାର ମୂଳଦୁଆ ଅନେକ ଦଶନ୍ଧି ତଳେ ପଡ଼ିଥିଲା। ଆମେ ସବୁବେଳେ ପରସ୍ପରକୁ ସମର୍ଥନ କରିଆସିଛୁ। ଭବିଷ୍ୟତରେ ମଧ୍ୟ ଏହା ଜାରି ରହିବ ବୋଲି ଆଶାବାଦୀ ଥିବା ପୁଟିନ୍ ପ୍ରକାଶ କରିଛନ୍ତି। ଉଜ୍ବେକିସ୍ତାନର ସମରକନ୍ଦରେ ସାଂଘାଇ ସହଯୋଗ ସଙ୍ଗଠନ (ଏସ୍ସିଓ) ସମ୍ମିଳନୀ ପରିପେକ୍ଷୀରେ ପ୍ରଧାନମନ୍ତ୍ରୀ ମୋଦି ବର୍ତ୍ତମାନ ଯୁଦ୍ଧର ଯୁଗ ନୁହେଁ ବୋଲି ପୁଟିନ୍ଙ୍କୁ ଚେତାଇଦେବା ପରିପ୍ରେକ୍ଷୀରେ ତାଙ୍କର ଏହି ମନ୍ତବ୍ୟ ବିଶେଷ ତାତ୍ପର୍ଯ୍ୟପୂର୍ଣ୍ଣ। କାରଣ ଗତ ଫେବୃୟାରୀ ୨୪ରେ ୟୁକ୍ରେନ୍ ଉପରେ ରୁଷିଆର ଆକ୍ରମଣ ପରଠାରୁ ମସ୍କୋ ପଦକ୍ଷେପକୁ ନୂଆଦିଲ୍ଲୀ ଖୋଲାଖୋଲି ଭାବେ ନିନ୍ଦା କରିନାହିଁ। କୂଟନୀତି ଓ ଆଲୋଚନା ଜରିଆରେ ଏହି ସଙ୍କଟର ସମାଧାନ ଜରୁରୀ ବୋଲି ଭାରତ କହିଆସିଛି। ପ୍ରକାଶ ଯେ, ଭାରତକୁ ସାମରିକ ଉପକରଣ ଯୋଗାଣ କ୍ଷେତ୍ରରେ ରୁଷିଆ ହେଉଛି ଏକ ଅଗ୍ରଣୀ ଦେଶ। ୨୦୧୮ ଅକ୍ଟୋବରରେ ଭାରତ ରୁଷିଆ ସହ ୫ ବିଲିୟନ୍ ଡଲାରର ପ୍ରତିରକ୍ଷା ଚୁକ୍ତି ସ୍ବାକ୍ଷର କରିଛି। ଏହି ରାଜିନାମା ଅଧୀନରେ ରୁଷିଆ ଭାରତକୁ ୫ଟି ଏସ୍-୪୦୦ ଏୟାର ଡିଫେନ୍ସ ମିଶାଇଲ୍ ସିଷ୍ଟମ ରପ୍ତାନି କରିବ।
