ନୂଆଦିଲ୍ଲୀ,୨୧।୧୦: ଜମ୍ମୁ-କଶ୍ମୀର ପ୍ରସଙ୍ଗରେ ଭାରତ କୂଟନୈତିକ ସ୍ତରରେ ପାକିସ୍ତାନକୁ ଘେରିବାକୁ ପ୍ରସ୍ତୁତ ହେଉଛି। ଜମ୍ମୁ-କଶ୍ମୀରରେ ପର୍ଯ୍ୟାୟକ୍ରମେ ପୁଞ୍ଜି ନିବେଶ ପାଇଁ ଭାରତ ଏକ ସ୍ବତନ୍ତ୍ର ରଣନୀତି ଉପରେ କାର୍ଯ୍ୟ କରୁଛି। ଏହା ଅନ୍ତର୍ଗତ ମୁସଲିମ୍ ରାଷ୍ଟ୍ରମାନଙ୍କରୁ କାଶ୍ମୀରରେ ବ୍ୟାପକ ବିନିଯୋଗ ପାଇଁ ଏକ ଅଭିଯାନ ଆରମ୍ଭ ହୋଇଛି । ଭାରତ ସହିତ ବନ୍ଧୁତ୍ୱପୂର୍ଣ୍ଣ ସମ୍ପର୍କ ଥିବା ପ୍ରାୟ ୬ଟି ମୁସଲିମ୍ ଦେଶ ସହିତ ଯୋଗାଯୋଗା ଆରମ୍ଭ ହୋଇଛି।
ନିକଟରେ ଭାରତ ୟୁଏଇ ସହିତ ଏସମ୍ପର୍କିତ ଏକ ଗୁରୁତ୍ୱପୂର୍ଣ୍ଣ ଚୁକ୍ତି ସ୍ବାକ୍ଷର କରିଛି। ଏଥିରେ ଦୁବାଇର ଏକ ଶୀର୍ଷ କମ୍ପାନୀ ଜମ୍ମୁ-କଶ୍ମୀରରେ ଭିତ୍ତିଭୂମି ନିର୍ମାଣ ପାଇଁ ବିନିଯୋଗ କରିବ ବୋଲି କୁହାଯାଉଛି। ଯଦିଓ ଭିତ୍ତିଭୂମି କ୍ଷେତ୍ରରେ ଭାରତ ବହୁତ ଉନ୍ନତ, କିନ୍ତୁ ଦୁବାଇରୁ ବିନିଯୋଗ କରାଯାଇ ଅନ୍ତର୍ଜାତୀୟସ୍ତରରେ ଏକ ନୂତନ ବାର୍ତ୍ତା ପ୍ରସାର କରାଯିବାକୁ ଚେଷ୍ଟା ହେବ।
ଇସଲାମିକ ସହଯୋଗ ସଂଗଠନ (ଓଆଇସି )ରେ ପାକିସ୍ତାନ କଶ୍ମୀର ବିଷୟରେ ଅନେକ ଥର ଆପତ୍ତିଜନକ ବିବୃତ୍ତି ଦେଇଛି। ତେଣୁ ଭାରତ ଚେଷ୍ଟା କରୁଛି ଯେ ଯଦି ଇସଲାମିକ୍ ଦେଶ କଶ୍ମୀରରେ ନିବେଶ କରନ୍ତି, ତା’ହେଲେ ଏହାର ବଡ ବାର୍ତ୍ତା ଯିବ ଏବଂ ପାକିସ୍ତାନର ଅଭିଯୋଗ ଆପେ ଆପେ ଶେଷ ହେବାର ବାଟ ଖୋଲିବ। ଯଦି ଭାରତର ଏହି ଉଦ୍ୟମ ଫଳପ୍ରଦ ହୁଏ, ତେବେ କୂଟନୈତିକସ୍ତରରେ ଏହା ଏକ ବଡ଼ ବିଜୟ ବୋଲି ବିବେଚନା କରାଯାଉଛି।
ୟୁଏଇ ସହିତ ଭାରତର ସମ୍ପର୍କ ବହୁତ ଭଲ ରହିଛି। ବିଶେଷ କଥା ହେଉଛି ଯେତେବେଳେ ଭାରତ ଜମ୍ମୁ-କଶ୍ମୀରରୁ ଅନୁଚ୍ଛେଦ ୩୭୦ ଉଚ୍ଛେଦ ହେଲା, ସେତେବେଳେ ୟୁଏଇ ମଧ୍ୟ କିଛି ଦେଶ ମଧ୍ୟରୁ ଗୋଟିଏ ଥିଲା ଯେଉଁମାନେ ଏହି ବିଷୟରେ ମନ୍ତବ୍ୟ ଦେବାକୁ ମନା କରିଦେଇଥିଲେ। ୟୁଏଇ ତଥା ଇରାନ ସମେତ ଅର୍ଦ୍ଧ ଡଜନ ମୁସଲିମ୍ ଦେଶ ସହ ଭାରତ ଯୋଗାଯୋଗରେ ଅଛି, ଯେଉଁମାନେ ଜମ୍ମୁ-କଶ୍ମୀରରେ ନିବେଶ କରିବାକୁ ପ୍ରସ୍ତୁତ ଅଛନ୍ତି। ଏହି ବିନିଯୋଗ ପରେ କେବଳ ସ୍ଥାନୀୟ ଲୋକଙ୍କ ପାଇଁ ରୋଜଗାରର ସୁଯୋଗ ଉପଲବ୍ଧ ହେବ ନାହିଁ, ବରଂ ଜମ୍ମୁ-କଶ୍ମୀରରେ ଜାରି ରହିଥିବା ପାକିସ୍ତାନର ଆତଙ୍କବାଦୀ କାର୍ଯ୍ୟକଳାପ ପ୍ରସାର କରିବା ଆଉ ସହଜ ହେବ ନାହିଁ।
