ମଧ୍ୟପ୍ରଦେଶ,୧୧।୩: ଭାରତର ‘ପ୍ରୋଜେକ୍ଟ ଚିତା’ ଅଭିଯାନକୁ ଏକ ବଡ଼ ସଫଳତା ମିଳିଛି। ମଧ୍ୟପ୍ରଦେଶର କୁନୋ ନ୍ୟାସନାଲ ପାର୍କରେ ନାମିବ୍ୟାରୁ ଆସିଥିବା ମାଦା ଚିତା ‘ଜ୍ଵାଳା’ ୫ଟି ଶାବକଙ୍କୁ ଜନ୍ମ ଦେଇଛି। ଏହି ନୂଆ ଅତିଥିଙ୍କ ଆଗମନ ସହ ଭାରତରେ ଚିତା ସଂଖ୍ୟା ଏବେ ୫୩ରେ ପହଞ୍ଚିଛି।
କୁନୋରେ ଏହା ହେଉଛି ୧୦ମ ସଫଳ ଚିତା ଶାବକ ଜନ୍ମ। ଏହା ସହିତ ଭାରତୀୟ ମାଟିରେ ଜନ୍ମିତ ଶାବକଙ୍କ ସଂଖ୍ୟା ୩୩କୁ ବୃଦ୍ଧି ପାଇଛି। ମା’ ଚିତା ‘ଜ୍ଵାଳା’ ତୃତୀୟ ଥର ପାଇଁ ମା’ ହୋଇଛି, ଯାହା ସୂଚାଉଛି ଯେ ଭାରତୀୟ ପରିବେଶ ସହ ଚିତାମାନେ ନିଜକୁ ଖାପଖୁଆଇ ନେଲେଣି।
କେନ୍ଦ୍ର ପରିବେଶ ଓ ଜଳବାୟୁ ପରିବର୍ତ୍ତନ ମନ୍ତ୍ରୀ ଭୂପେନ୍ଦ୍ର ଯାଦବ ଏହି ଖୁସିର ଖବର ସେୟାର କରିବା ସହ ବନ୍ୟପ୍ରାଣୀ ବିଶେଷଜ୍ଞ ଓ ପଶୁ ଚିକିତ୍ସକଙ୍କ ଉଦ୍ୟମକୁ ପ୍ରଶଂସା କରିଛନ୍ତି।
ଦେଶରୁ ବିଲୁପ୍ତ ହୋଇଯାଇଥିବା ଏହି ଦ୍ରୁତତମ ପ୍ରାଣୀଙ୍କୁ ପୁନଃସ୍ଥାପିତ କରିବା ପାଇଁ ୨୦୨୨ ମସିହାରେ ନାମିବ୍ୟା ଓ ଦକ୍ଷିଣ ଆଫ୍ରିକାରୁ ଚିତା ଅଣାଯାଇଥିଲା। ବର୍ତ୍ତମାନର ଏହି ବଂଶବୃଦ୍ଧି ଭାରତର ଇକୋସିଷ୍ଟମ ପାଇଁ ଏକ ଶୁଭ ସଙ୍କେତ ବୋଲି ବିଶେଷଜ୍ଞମାନେ ମତ ଦେଇଛନ୍ତି।
