ନୂଆଦିଲ୍ଲୀ, ୩୦।୪(ପି.ଟି.)-ଭାରତୀୟ ମହିଳା କ୍ରିକେଟ ଦଳର ମୁଖ୍ୟ କୋଚ୍ ଦୌଡ଼ରେ ୫ ଜଣ ମହିଳା ସାମିଲ ହୋଇଛନ୍ତି। ୨୦୧୭ରୁ ଏହି ପଦରେ ପୁରୁଷ କୋଚ୍ ରହି ଆସୁଥିଲେ। ଏଥର ଆବେଦନ କରିଥିବା ମହିଳାଙ୍କ ମଧ୍ୟରେ ଅଛନ୍ତି ପୂର୍ବତନ ଚୟନ କମିଟି ମୁଖ୍ୟ ହେମଲତା କାଲା, ମମତା ମାବେନ, ଜୟା ଶର୍ମା, ସୁମନ ଶର୍ମା ଓ ନୋସିନ ଅଲ୍ କାଦିର। ପୁରୁଷଙ୍କ ମଧ୍ୟରେ ବର୍ତ୍ତମାନର କୋଚ୍ ଡବ୍ଲ୍ୟୁ.ଭି. ରମଣ ଗତ ମାର୍ଚ୍ଚରେ ଦକ୍ଷିଣ ଆଫ୍ରିକା ବିପକ୍ଷ ଘରୋଇ ସିରିଜ ପରେ ପୁଣି ଆବେଦନ କରିଛନ୍ତି। ପୂର୍ବରୁ କୋଚ୍ ଦାୟିତ୍ୱ ତୁଲାଇ ସାରିଥିବା ରମେଶ ପାଓ୍ବାର, ତୁଷାର ଆରୋଥେ ମଧ୍ୟ ପୁଣି ଏହି ଦୌଡ଼ରେ ସାମିଲ ହୋଇଛନ୍ତି। ସିନିୟର ଖେଳାଳିଙ୍କ ସହ ମତଭେଦ ଯୋଗୁ ଅପ୍ରୀତିକର ପରିସ୍ଥିତିରେ ପାଓ୍ବାର ଓ ଆରୋଥେଙ୍କୁ ପଦ ଛାଡ଼ିବାକୁ ପଡ଼ିଥିଲା। ଚଳିତ ମାସ ୨୬ ଆବେଦନର ଶେଷ ତାରିଖ। ଏହାପରେ ମଦନ ଲାଲଙ୍କ ନେତୃତ୍ୱାଧୀନ କ୍ରିକେଟ ପରାମର୍ଶଦାତା କମିଟି ମୁଖ୍ୟ କୋଚ୍ ଚୟନ କରିପାରନ୍ତି। ମହିଳା ଚୟନ କମିଟି ମୁଖ୍ୟ ନୀତୁ ଡେଭିଡ ଜଣେ ମହିଳା ଜାତୀୟ ଦଳର ମୁଖ୍ୟ କୋଚ୍ ହୁଅନ୍ତୁ ବୋଲି ଚାହୁଛନ୍ତି। ନ୍ୟୁଜିଲାଣ୍ଡରେ ଆସନ୍ତା ବର୍ଷ ହେବାକୁ ଥିବା ଏକଦିବସୀୟ ବିଶ୍ୱକପ ପାଇଁ ନୂଆ କୋଚ୍ ଦଳକୁ ପ୍ରସ୍ତୁତ କରିବେ।
”ବିସିସିଆଇ ଏ ପର୍ଯ୍ୟନ୍ତ ସାକ୍ଷାତକାର ତାରିଖ ସ୍ଥିର କରିନାହିଁ। ଏଥିପାଇଁ ଅନୁମତି ମିଳିଲେ ଆମେ ମହିଳା ହେଉ ବା ପୁରୁଷ ଜଣେ ଶ୍ରେଷ୍ଠ ପ୍ରାର୍ଥୀଙ୍କୁ ଚୟନ କରିବୁ“ ବୋଲି ବିଶ୍ୱକପ ବିଜେତା ମଦନ ଲାଲ କହିଛନ୍ତି। ପୂର୍ଣ୍ଣିମା ରାଓ ଭାରତୀୟ ମହିଳା କ୍ରିକେଟ ଦଳର ଶେଷ ମହିଳା ମୁଖ୍ୟ କୋଚ୍ ଥିଲେ। ୨୦୧୭ ଏପ୍ରିଲରେ ତାଙ୍କୁ ବିଦା କରାଯାଇଥିଲା। ତାଙ୍କ ସ୍ଥାନରେ ଆରୋଥେଙ୍କୁ ଦାୟିତ୍ୱ ମିଳିଥିଲା ଏବଂ ସେ ପରବର୍ଷ ଭାରତୀୟ ଦଳକୁ ଏକଦିବସୀୟ ବିଶ୍ୱକପର ଫାଇନାଲରେ ପହଞ୍ଚାଇବାରେ ଗୁରୁଦାୟିତ୍ୱ ବହନ କରିଥିଲେ। ମାତ୍ର ଆରୋଥେ ତାଙ୍କ କ୍ୟାରିୟର ଶେଷ କରିବାକୁ ଚେଷ୍ଟା କରୁଛନ୍ତି ବୋଲି ଭେଟେରାନ ମିତାଲି ରାଜ ଅଭିଯୋଗ ଆଣିବା ପରେ ପାଓ୍ବାର ମୁଖ୍ୟ କୋଚ୍ ହୋଇଥିଲେ। ପାଓ୍ବାରଙ୍କ ସ୍ଥାନରେ ମୁଖ୍ୟ କୋଚ୍ ଦାୟିତ୍ୱ ପାଇଥିବା ରମଣ ୨୦୨୦ରେ ଟି୨୦ ବିଶ୍ୱକପର ଫାଇନାଲରେ ଭାରତକୁ ପହଞ୍ଚାଇଥିଲେ। ମହିଳା ପ୍ରାର୍ଥୀଙ୍କ ମଧ୍ୟରେ ଚୟନ କମିଟି ମୁଖ୍ୟଭାବେ ଶେଫାଳି ବର୍ମାଙ୍କ ପରି ଖେଳାଳିଙ୍କୁ ଲୋକଲୋଚନକୁ ଆଣିଥିବା କାଲା ଏବେ ଉତ୍ତର ପ୍ରଦେଶ ସିନିୟର ଦଳର କୋଚ୍ ଅଛନ୍ତି। ସୁମନ ଭାରତୀୟ ଦଳର ସହକାରୀ କୋଚ୍ ରହି ସାରିଛନ୍ତି। ନୋସିନଙ୍କର କୋଚିଂରେ ଅନେକ ଅଭିଜ୍ଞତା ଅଛି।
