ଭାସ୍କୋ,୧୫।୨: ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍)ରେ ରବିବାର ଖେଳାଯାଇଥିବା ମ୍ୟାଚ୍ରେ ନର୍ଥଇଷ୍ଟ ୟୁନାଇଟେଡ ଏଫ୍ସିଠାରୁ ୩-୧ ଗୋଲରେ ଓଡ଼ିଶା ପରାସ୍ତ ହୋଇଛି। ସ୍ଥାନୀୟ ତିଳକ ମଇଦାନରେ ଅନୁଷ୍ଠିତ ଏହି ମ୍ୟାଚ୍ରେ ନର୍ଥଇଷ୍ଟ ପ୍ରଭାବ ବିସ୍ତାର କରି ଖେଳିଥିଲା। ବିଜୟୀ ଦଳ ତରଫରୁ ଲୁଇସ୍ ମାଚାଡୋ ଡବଲ୍ ଗୋଲ ସ୍କୋର କରିଥିଲେ। ସେ ୯ ଓ ୨୪ତମ ମିନିଟ୍ରେ ଦୁଇଟି ଗୋଲ ସ୍କୋର କରି ବିଜୟରେ ମୁଖ୍ୟ ଭୂମିକା ଗ୍ରହଣ କରିଥିଲେ। ସେହିପରି ଡେଶର୍ନ ବ୍ରାଉନ ୧୯ତମ ମିନିଟ୍ରେ ଗୋଲ ଦେଇ ନର୍ଥଇଷ୍ଟକୁ ୨-୦ରେ ଅଗ୍ରଣୀ କରାଇଥିଲେ। ପ୍ରଥମାର୍ଦ୍ଧର ଇଞ୍ଜୁରି ଟାଇମ୍ରେ ଓଡ଼ିଶା ତରଫରୁ ବ୍ରାଡ ଇନ୍ମ୍ୟାନ ଗୋଲ ଦେଇ ଦଳକୁ ମ୍ୟାଚ୍କୁ ଫେରାଇଥିଲେ ଓ ଦଳ ପାଇଁ ସାନ୍ତ୍ୱନାମୂଳକ ଗୋଲ ସ୍କୋର କରିଥିଲେ। ପ୍ରଥମାର୍ଦ୍ଧ ଶେଷ ସୁଦ୍ଧା ନର୍ଥଇଷ୍ଟ ମୋଟ ଉପରେ ୩-୧ ରେ ଅଗ୍ରଣୀ ହାସଲ କରିଥିଲା। ପ୍ରଥମାର୍ଦ୍ଧ ଘଟଣା ବହୁଳ ହୋଇଥିଲା ଓ ଏକାଧିକ ନାଟକୀୟ ମୋଡ ଦେଖିତ୍ବାକୁ ମିଳିଥିଲା। ତେବେ ଦ୍ୱିତୀୟାର୍ଦ୍ଧରେ ଉଭୟ ଦଳ ତରଫରୁ ଗୋଲ ଦେବାକୁ ପ୍ରୟାସ କରାଯାଇଥିଲା। ସୁଯୋଗ ହାସଲ କରିଥିଲେ ମଧ୍ୟ କୌଣସ ଦଳ ଗୋଲ ଦେଇପାରି ନ ଥିଲେ। ଫଳରେ ଶେଷରେ ନର୍ଥଇଷ୍ଟ ବିଜୟୀ ହୋଇଥିଲା। ୮୫ତମ ମିନିଟ୍ରେ ବିଜୟୀ ଦଳର ଗୁରୁଜିନ୍ଦର କୁମାରଙ୍କୁ ରେଫରି ରେଡ୍ କାର୍ଡ ଦେଖାଇଥିଲେ। ବଲ୍ ପଜେଶନ, ପାସ୍ ଓ ପାସ୍ ଆକ୍ୟୁରେସିରେ ଓଡ଼ିଶା ଆଗରେ ରହିଥିଲେ ମଧ୍ୟ ଏହାର ଫାଇଦା ଉଠାଇବାରେ ବିଫଳ ହୋଇଥିଲା। ଶେଷ ପର୍ଯ୍ୟନ୍ତ ଓଡ଼ିଶା ନର୍ଥଇଷ୍ଟ ଉପରେ ଚାପ ପ୍ରୟୋଗ କରିଥିଲେ ମଧ୍ୟ କିଛି ଫଳ ମିଳି ନ ଥିଲା।
ଏହି ବିଜୟ ସହ ନର୍ଥଇଷ୍ଟ ମୋଟ୍ ୧୭ଟି ମ୍ୟାଚ୍ ଖେଳି ୬ ବିଜୟ, ୮ ଡ୍ର ଓ ୩ ପରାଜୟ ସହ ୨୬ ପଏଣ୍ଟ ପାଇ ତାଲିକାର ତୃତୀୟ ସ୍ଥାନକୁ ଉଠି ପ୍ଲେ- ଅଫ୍ ଖେଳିବା ଆଶା ଦୃଢ କରିଛି। ଗୋଆ ଓ ହାଇଦ୍ରାବାଦଠାରୁ ନର୍ଥଇଷ୍ଟ ଅଧିକ ଦୁଇ ପଏଣ୍ଟ ପାଇ ଦୌଡ଼ରେ ଆଗରେ ରହିଛି। ଅନ୍ୟପଟେ ଓଡ଼ିଶା ଏପର୍ଯ୍ୟନ୍ତ ୧୭ଟି ମ୍ୟାଚ୍ ଖେଳି ୧ ବିଜୟ, ୬ ଡ୍ର ଓ ୧୦ ପରାଜୟ ସହ ୯ ପଏଣ୍ଟ ପାଇ ତାଲିକାର ୧୧ତମ ତଥା ନିମ୍ନତମ ସ୍ଥାନରେ ରହିଛି। ଓଡ଼ିଶାର ପ୍ଲେ- ଅଫ୍ ଆଶା ବହୁ ପୂର୍ବରୁ ଶେଷ ହୋଇସାରିଛି। ରବିବାର ଅନୁଷ୍ଠିତ ଦ୍ୱିତୀୟ ମ୍ୟାଚ୍ରେ ଏଟିକେ ମୋହନ ବାଗାନ ୧-୦ ଗୋଲରେ ଜାମଶେଦପୁଣ ଏଫ୍ସିକୁ ହାରଇ ପଏଣ୍ଟ ତାଲିକାର ଶୀର୍ଷକୁ ଉଠିଛି।
