ଭାସ୍କୋ, ୨୫।୧୧- ସ୍ଥାନୀୟ ତିଳକ ମଇଦାନରେ ମଙ୍ଗଳବାର ଅନୁଷ୍ଠିତ ଇଣ୍ଡିଆନ ସୁପରଲିଗ୍(ଆଇଏସ୍ଏଲ୍) ମ୍ୟାଚରେ ଚେନ୍ନାଇନ୍ ଏଫ୍ସି ୨-୧ ଗୋଲରେ ଜାମସେଦପୁର ଏଫ୍ସିକୁ ପରାସ୍ତ କରିଛି। ଫଳରେ ଦୁଇଥର ଚାମ୍ପିୟନ ଚେନ୍ନାଇନ ଚଳିତ ସଂସ୍କରଣରେ ପୁରା ୩ ପଏଣ୍ଟ ସହ ଅଭିଯାନ ଆରମ୍ଭ କରିଛି।
ନୂଆ କୋଚ୍ କସାବା ଲାଜ୍ଲୋଙ୍କ ପ୍ରଶିକ୍ଷଣପ୍ରାପ୍ତ ଚେନ୍ନାଇନ୍ ରେଫରିଙ୍କ ହ୍ବିସିଲ ବାଜିବାମାତ୍ରେ ଆକ୍ରମଣାତ୍ମକ ଆରମ୍ଭ କରିଥିଲା। ଫଳ ସ୍ବରୂପ ମ୍ୟାଚର ୧ମ ମିନିଟରେ ଅନିରୁଦ୍ଧ ଥାପ୍ପା ଗୋଲ ଦେଇ ଦଳକୁ ଅଗ୍ରଣୀ କରାଇଥିଲେ। ଚଳିତ ସିଜନରେ ପ୍ରଥମ ଭାରତୀୟ ଭାବେ ଥାପା ଏହି ଗୋଲ ଦେଇଥିଲେ। ଅହା ବ୍ୟତୀତ ଚଳିତ ସିଜନର ଏହାଥିଲା ଦ୍ରୁତତମ ଗୋଲ। ଥାପା ଅତି ନିଖୁଣଭାବେ ବଲ୍କୁ ଆଗେଇ ନେଇ ଜାମସେଦପୁର ଗୋଲପୋଷ୍ଟରେ ପ୍ରବେଶ କରି ଗୋଲ ଦେଇଥିଲେ। ଡାହାଣ ପଟରୁ ଇସମାଇଲ ଗନକାଲ୍ଭସ ଚମତ୍କାରଭାବେ ତାଙ୍କୁ ସହାୟତା କରିଥିଲେ। ୨୫ତମ ମିନିଟରେ ଜାମସେଦପୁର ଏଫସିର ଇସାକ ବନମାଲାସ୍ବାମା ଛକଛୁଆକ ଚେନ୍ନାଇନ୍ ଖେଳାଳିଙ୍କୁ କହୁଣିରେ ଠେଲିଥିଲେ। ଏହା ରେଫରିଙ୍କ ନଜରକୁ ଆସିବାପରେ ଫାଉଲ୍ ଦେଇଥିଲେ ଏବଂ ଚେନ୍ନାଇନ୍କୁ ପେନାଲ୍ଟି ସୁଯୋଗ ମିଳିଥିଲା। ଏହାର ସଦ୍ବ୍ୟବହାର କରି ଇସମାଇଲ ୨୬ତମ ମିନିଟରେ ଚେନ୍ନାଇନ୍ ଅଗ୍ରଣୀକୁ ୨-୦ରେ ପହଞ୍ଚାଇଥିଲେ। ଜାମସେଦପୁର ଗୋଲକିପର ରେହେନେଶ ତୁମ୍ବିରୁମ୍ବୁ ପରମ୍ବାଙ୍କୁ ଚକ୍ମା ଦେଇ ଡାହାଣ କର୍ନରରେ ବଲକୁ ନେଟ୍ ସ୍ପର୍ଶ କରାଇଥିଲେ ଏହି ବିଦେଶୀ ଖେଳାଳି। ଗୋଲ ପରିଶୋଧ ପାଇଁ ଜାମସେଦପୁର ଆକ୍ରମଣକୁ ଜୋରଦାର କରିଥିଲା। ୩୭ତମ ମିନିଟରେ ଜାକିଚାନ୍ଦ ସିଂଙ୍କଠାରୁ ପାଇଥିବା ପାସ୍କୁ ହେଡ୍ ଜରିଆରେ ଗୋଲରେ ପରିଣତ କରିଥିଲେ ଗତ ସିଜନର ଗୋଲ୍ଡେନ ବୁଟ୍ ବିଜେତା ନେରିଜୁସ ଭାଲ୍ସକିସ୍। ଚେନ୍ନାଇନ୍ ରକ୍ଷଣଭାଗର ଦୁର୍ବଳତାରୁ ସେ ଫାଇଦା ଉଠାଇଥିଲେ। ଫଳରେ ଜାମସେଦପୁର ପ୍ରଥମାର୍ଦ୍ଧ ଶେଷରେ ଗୋଲ ବ୍ୟବଧାନକୁ ୧-୨କୁ ଆଣିବାକୁ ସକ୍ଷମ ହୋଇଥିଲା। ଦ୍ୱିତୀୟାର୍ଦ୍ଧରେ ମ୍ୟାଚକୁ ସମାନ ସ୍ତରକୁ ଆଣିବା ପାଇଁ ଜାମସେଦପୁର ଏକାଧିକ ସୁଯୋଗ ପାଇଥିଲେ ହେଁ ଏହାର ସଦୁପଯୋଗ କରିପାରି ନ ଥିଲା।
