ଗଣିଆ,୪ା୧୨(ସନ୍ତୋଷ କୁମାର ପ୍ରଧାନ: ଶୀତଋତୁ ଆସିଲେ ସାତକୋଶିଆ ଗଣ୍ଡର ବଡ଼ମୂଳଠାରେ ବହୁ ଦେଶୀୟ ପକ୍ଷୀଙ୍କ ସହ ବିଭିନ୍ନ ପ୍ରଜାତିର ବିଦେଶାଗତ ପକ୍ଷୀଙ୍କ ଆଗମନ ଦେଖିବାକୁ ମିଳିଥାଏ। ଏହି ବିଦେଶାଗତ ଅତିଥି ପକ୍ଷୀମାନଙ୍କ ମଧ୍ୟରେ ସାଇବେରିଆ ଅଞ୍ଚଳରୁ ଆସୁଥିବା ଇଣ୍ଡିୟାନ ସ୍କିମର ପକ୍ଷୀ ପର୍ଯ୍ୟଟକଙ୍କୁ ବେଶ୍ ଆକୃଷ୍ଟ କରିଥାଏ। ସାତକୋଶିଆ ଗଣ୍ଡରେ ବୋଟିଂ କରୁଥିବା ବେଳେ ପର୍ଯ୍ୟଟ୍ଟକମାନେ ଦଳ ଦଳ ଇଣ୍ଡିୟାନ ସ୍କିମର ପକ୍ଷୀମାନଙ୍କୁ ଦେଖି ଭରପୁର ମଜ୍ଜା ଉଠାଉ ଥିଲେ। ହେଲେ ୨ବର୍ଷ ଧରି ଏହି ପକ୍ଷୀ ବଡ଼ମୂଳ ଅଞ୍ଚଳରୁ ମୁହଁ ଫେରାଇ ନେଇଥିବା ଦେଖିବାକୁ ମିଳିଛି। ମହାନଦୀର ବାଲୁକା ଶଯ୍ୟାରେ ଦଳ ଦଳ ହୋଇ ବିଚରଣ କରୁଥିବା ଏହି ପକ୍ଷୀ ଆଉ ଦେଖିବାକୁ ମିଳୁନାହାନ୍ତି। ଚଳିତବର୍ଷ ଅନ୍ୟ ବିଦେଶାଗତ ପକ୍ଷୀମାନେ ମଧ୍ୟ ଏଠାକୁ ଆସି ନ ଥିବା ଜଣାପଡିଛି। ପ୍ରତିବର୍ଷ ଶୀତଋତୁ ଆସିଲେ ସାଇବେରିଆ, ହିମାଳୟ ଓ ଲଦାଖ ଅଞ୍ଚଳରୁ ଆସୁଥିବା ଏହି ବିଦେଶୀ ପକ୍ଷୀମାନେ ନଭେମ୍ବରରୁ ମାର୍ଚ୍ଚ ପର୍ଯ୍ୟନ୍ତ ସାତକୋଶିଆ ଗଣ୍ଡର ବଡ଼ମୂଳ ଅଞ୍ଚଳରେ ରହି ପୁନର୍ବାର ଫେରିଯାଇଥାନ୍ତି। କେତେଗୋଟି ଇଣ୍ଡିୟାନ ସ୍କିମର ପକ୍ଷୀ କଟକ ଜିଲାର ମୁଣ୍ଡୁଳିଠାରେ ବର୍ଷସାରା ସହାବସ୍ଥାନ କରୁଥିବା ବନ୍ୟପ୍ରାଣୀ ବିଭାଗର ପକ୍ଷୀ ଗଣନା ବେଳେ ସୂଚନା ମିଳିଛି। ତେବେ ଖାଦ୍ୟାଭାବ, ପ୍ରତିକୂଳ ପରିବେଶ ଓ ଲୋକଙ୍କ ଅବାଧ ପ୍ରବେଶ ଯୋଗୁଁ ଏହି ପକ୍ଷୀମାନେ ବଡ଼ମୂଳ ଅଞ୍ଚଳକୁ ୨ ବର୍ଷ ଧରି ଆସୁ ନ ଥିବା ପରିବେଶବିତମାନେ ମତ ପ୍ରକାଶ କରୁଛନ୍ତି। ସୂଚନାଥାଉ କି, ଇଣ୍ଡିୟାନ ସ୍କିମର ପକ୍ଷୀ ପ୍ରତିବର୍ଷ ସାତକୋଶିଆ ଗଣ୍ଡକୁ ଆସୁଛନ୍ତି କି ନାହିଁ ଜାଣିବା ପାଇଁ ଗତ ୨୦୧୬-୧୭ରେ ନୟାଗଡ଼ ମହାନଦୀ ବନ୍ୟପ୍ରାଣୀ ବନଖଣ୍ଡ ଓ ପକ୍ଷୀ ବିଶେଷଜ୍ଞଙ୍କ ଦ୍ୱାରା ବାର୍ଡ ରିଙ୍ଗିଙ୍ଗ୍ କରାଯାଇଥିଲା। ଇଣ୍ଡିୟାନ ସ୍କିମର ପକ୍ଷୀମାନଙ୍କ ଗୋଡରେ ନମ୍ବର ଲେଖାଯାଇଥିବା ଚିପ୍ ର ରିଙ୍ଗ୍ ଲଗାଯାଇଥିଲା। ଚିହ୍ନିତ ହୋଇଥିବା ଏହି ପକ୍ଷୀ ୨ବର୍ଷ ଧରି ଏଠାକୁ ପୁନଃର୍ବାର ଆସିଥିଲେ। ପରେ ଆଉ ଏଠାକୁ ନ ଆସି କଟକ ଜିଲାର ମୁଣ୍ଡୁଳି ଅଞ୍ଚଳରେ ରହୁଥିବା ପକ୍ଷୀ ଗଣନା ବେଳେ ଦେଖିବାକୁ ମିଳିଥିଲ। ୨ବର୍ଷ ଧରି ବିଦେଶାଗତ ପକ୍ଷୀ ବଡ଼ମୂଳ ଅଞ୍ଚଳରୁ ମୁହଁ ଫେରାଇ ନେଉଥିବା ଯୋଗୁ ପର୍ଯ୍ୟଟକ ଓ ପ୍ରକୃତିପ୍ରେମୀମାନଙ୍କ ମଧ୍ୟରେ ନିରାଶା ଭାବ ସୃଷ୍ଟି କରିଛି। ଚଳିତବର୍ଷ ଏହି ପକ୍ଷୀ ସାତକୋଶିଆ ଗଣ୍ଡର ଉପରମୁଣ୍ଡ ସୁନାଖଣିଆ ଓ ଟିକରପଡ଼ା ଅଞ୍ଚଳକୁ ଆସୁଛନ୍ତି କି ନାହିଁ ତାହା ପକ୍ଷୀ ଗଣନା ସମୟରେ ଜଣାପଡ଼ିବ ବୋଲି ବନ୍ୟପ୍ରାଣୀ ବିଭାଗ ପକ୍ଷରୁ ସୂଚନା ମିଳିଛି।
