ଲଣ୍ଡନ,୨୭।୧୦: ବ୍ରିଟେନରେ ଜଣେ ଶିଖ ମହିଳାଙ୍କୁ ବଳାତ୍କାର କରିବାର ଗୋଟିଏ ମାସ ପରେ ଆଉ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଉତ୍ତର ଇଂଲଣ୍ଡରେ ଜଣେ ଭାରତୀୟ ବଂଶୋଦ୍ଭବ ମହିଳାଙ୍କୁ ବଳାତ୍କାର କରାଯାଇଥିବା ବ୍ରିଟିଶ ପୋଲିସ ରିପୋର୍ଟ କରିଛି।
ଏହି ମାମଲାରେ, ୱେଷ୍ଟ ମିଡଲ୍ୟାଣ୍ଡସ ପୋଲିସ ସିସିଟିଭି ଫୁଟେଜ ଜାରି କରିଛି ଏବଂ ଜଣେ ଅଜ୍ଞାତ ଯୁବକଙ୍କୁ ଖୋଜିବା ପାଇଁ ଜନସାଧାରଣଙ୍କୁ ନିବେଦନ କରିଛି। ପୋଲିସ କହିଛି ଯେ ଶନିବାର ସାରେ ୱାଲସଲର ପାର୍କ ହଲ ଅଞ୍ଚଳରେ ଜଣେ ମହିଳାଙ୍କଠାରୁ ସେମାନେ ଏକ ଫୋନ ପାଇଥିଲେ। ଏହି ଅପରାଧକୁ ‘ଜାତିଗତ ଆକ୍ରମଣ’ ଭାବରେ ଚିହ୍ନଟ କରି, ୱେଷ୍ଟ ମିଡଲ୍ୟାଣ୍ଡସ ପୋଲିସ ସନ୍ଦିଗ୍ଧ ବ୍ୟକ୍ତିଙ୍କ ସିସିଟିଭି ଫୁଟେଜ ଜାରି କରିଛି।
ୱେଷ୍ଟ ମିଡଲ୍ୟାଣ୍ଡସ ପୋଲିସ ପାଇଁ ତଦନ୍ତର ନେତୃତ୍ୱ ନେଉଥିବା ଡିଟେକ୍ଟିଭ ସୁପରିଣ୍ଟେଣ୍ଡେଣ୍ଟ (ଡିଏସ) ରୋନାନ ଟାଇର ରବିବାର କହିଛନ୍ତି ଯେ ଏହା ଜଣେ ମହିଳାଙ୍କ ଉପରେ ସବୁଠାରୁ ଭୟଙ୍କର ଆକ୍ରମଣ। ଆମେ ଅଭିଯୁକ୍ତଙ୍କୁ ଗିରଫ କରିବା ପାଇଁ ଯଥାସମ୍ଭବ ଚେଷ୍ଟା କରୁଛୁ।
ସେ ଏହା ମଧ୍ୟ କହିଛନ୍ତି, ‘ଆମ ପାଖରେ ପ୍ରମାଣ ସଂଗ୍ରହ କରୁଥିବା ଅଧିକାରୀମାନଙ୍କର ଦଳ ଅଛି। ଆକ୍ରମଣକାରୀଙ୍କ ପ୍ରୋଫାଇଲ ବର୍ତ୍ତମାନ ତିଆରି କରାଯାଉଛି ଯାହା ଦ୍ୱାରା ତାଙ୍କୁ ଯଥାଶୀଘ୍ର ଅଟକ ରଖାଯାଇପାରିବ।’ ତଥାପି, ସେ ଆହୁରି କହିଛନ୍ତି ଯେ ଅନେକ ତଦନ୍ତ ଚାଲିଥିବା ବେଳେ, ସେହି ସମୟରେ ସେହି ଅଞ୍ଚଳରେ ସନ୍ଦିଗ୍ଧ ବ୍ୟକ୍ତିଙ୍କୁ ଦେଖିଥିବା ଯେକୌଣସି ବ୍ୟକ୍ତିଙ୍କ ସହିତ କଥା ହେବା ଗୁରୁତ୍ୱପୂର୍ଣ୍ଣ। ୱେଷ୍ଟ ମିଡଲ୍ୟାଣ୍ଡସ ପୋଲିସ ଦ୍ୱାରା ପ୍ରକାଶିତ ସିସିଟିଭି ଫୁଟେଜରେ ଆକ୍ରମଣକାରୀଙ୍କୁ ଜଣେ ୩୦ ବର୍ଷୀୟ, ଛୋଟ କେଶ ଥିବା ଧଳା ବ୍ୟକ୍ତି ଭାବରେ ଚିହ୍ନଟ କରାଯାଇଛି।
Dharitri – The Largest & Most Trusted Odia Daily
