ଜଗତ୍ସିଂହପୁର,୨୭ା୧୦ (ପ୍ରମୋଦ କୁମାର ନାୟକ): ଜଗତ୍ସିଂହପୁର ସହର ଉପକଣ୍ଠ ଯୋଗଧାରୀ ଛକରେ ପାନ ଦୋକାନ କରିଥିବା ଗୋପା (ପୋକପୁର) ଗ୍ରାମର ଚୈତନ୍ୟ ପୋଥାଳଙ୍କ ପୁଅ ଜ୍ଞାନ ରଞ୍ଜନ ପୋଥାଳ (୩୮)ଙ୍କୁ ୨୪ ତାରିଖ ରାତିରେ ଖଣ୍ଡାରେ ବୀଭତ୍ସ ଭାବେ ହାଣି ହତ୍ୟା କରାଯାଇଥିବା ଅଭିଯୋଗ ହୋଇଥିଲା। ଜ୍ଞାନଙ୍କ ଭିଣୋଇ ତଥା ଜଗତ୍ସିଂହପୁର ଥାନା କଲିଓଦା ଗ୍ରାମର ସୁରେନ୍ଦ୍ର ବିଶ୍ୱାଳଙ୍କ ଅଭିଯୋଗ ଆଧାରରେ ଜଗତ୍ସିଂହପୁର ଥାନାରେ ମାମଲା (ନଂ.୮୫୮/୨୫) ରୁଜୁ ହୋଇଥିଲା। ଏହି ମାମଲାରେ ପୋଲିସ ପ୍ରଥମେ ୨ ଜଣଙ୍କୁ ଅଟକ ରଖି ପଚରାଉଚରା କରୁଥିଲା। ରବିବାର ଏହି ହତ୍ୟାକାଣ୍ଡ ଉପରୁ ପରଦା ହଟିଛି। ପୋଲିସ ୨ ଜଣଙ୍କୁ ଗିରଫ କରିଥିବା ଦର୍ଶାଇଛି। ସେମାନେ ହେଲେ ନାଉଗାଁ ଥାନା ଚକୁଳିଆପଡ଼ାର ସବ୍ୟସାଚୀ ରାଉତରାୟ ଓରଫ ଚାଚା (୩୦) ଓ ଜଗତ୍ସିଂହପୁର ଥାନା ଅଭିଧିଆନନ୍ଦପୁର ଗ୍ରାମର କାର୍ତ୍ତିକ ନାୟକ (୩୦)। ଘଟଣାସ୍ଥଳରୁ ଉଦ୍ଧାର ହୋଇଥିବା ଖଣ୍ଡା ଓ ଅଭିଯୁକ୍ତ କାର୍ତ୍ତିକଙ୍କ ବୁଲେଟ୍ (ଓଡି- ୨୧ଟି -୦୫୬୦)କୁ ପୋଲିସ ଜବତ କରିଛି। ରବିବାର ଜିଲା ପୋଲିସ କାର୍ଯ୍ୟାଳୟରେ ଅନୁଷ୍ଠିତ ଖବରଦାତା ସମ୍ମିଳନୀରେ ଏସ୍ପି ଅଙ୍କିତ ବର୍ମା ଏନେଇ ସୂଚନା ଦେଇଛନ୍ତି।
ଏସ୍ପି କହିଛନ୍ତି ଯେ, ଅଭିଯୁକ୍ତ କାର୍ତ୍ତିକ ଏକ ୨ ଚକିଆ ଅଟୋ ମୋବାଇଲ କମ୍ପାନୀ ଓ ସବ୍ୟସାଚୀ ପ୍ରାଇଭେଟ୍ ଫାଇନାନ୍ସ କମ୍ପାନୀରେ କାମ କରନ୍ତି। ଉଭୟ ପ୍ରାୟତଃ ନିଶା ସେବନ କରୁଥିଲେ। ଯୋଗଧାରୀ ଛକ ସଫେଇ ନାଳ ପାର୍ଶ୍ୱରେ ଥିବା ଜ୍ଞାନଙ୍କ ପାନ ଦୋକାନ ନିକଟରେ ବିଭିନ୍ନ ସମୟରେ ସେମାନେ ମଦ ଓ ଅନ୍ୟାନ୍ୟ ନିଶା ସେବନ ପାଇଁ ଏକାଠି ହେଉଥିଲେ। ଜ୍ଞାନଙ୍କ ପାନ ଦୋକାନ ପାର୍ଶ୍ୱରେ ମହାରଣା ନିର୍ମାଣ ସଂଘ ଓ ଏକ ଗ୍ୟାରେଜ (ମହାବୀର ଅଟୋ) ରହିଛି। ପ୍ରତ୍ୟେକେ ପରସ୍ପରକୁ ଜାଣିଛନ୍ତି। କିଛି ଦିନ ପୂର୍ବରୁ କାର୍ତ୍ତିକ ଏକ ବୁଲେଟ ଗାଡ଼ି କିଣିଥିଲେ। ଏହାକୁ ନେଇ ଜ୍ଞାନ ଏକ ପାର୍ଟି ଦେବାକୁ ଦାବି କରି ଆସୁଥିଲେ। କିନ୍ତୁ ଅର୍ଥ ନ ଥିବା ଦର୍ଶାଇ କାର୍ତ୍ତିକ ସମୟ ଗଡ଼ାଇ ଚାଲିଥିଲେ। ଗତ ୨୪ ତାରିଖ ରାତିରେ କାର୍ତ୍ତିକ ଫୋନ କରି ଟଙ୍କା ଯୋଗାଡ ହୋଇଗଲା, ପାର୍ଟି ଆୟୋଜନ କରିବାକୁ ଜ୍ଞାନଙ୍କୁ କହିଥିଲେ। ଜ୍ଞାନଙ୍କ ନିଷ୍ପତ୍ତିକ୍ରମେ ତାଙ୍କ ପାନ ଦୋକାନ ପାଖରେ ଭୋଜିର ଆୟୋଜନ ହୋଇଥିଲା। କାର୍ତ୍ତିକ ତାଙ୍କ ବନ୍ଧୁ ସବ୍ୟସାଚୀଙ୍କୁ ଧରି ଜଗତ୍ସିଂହପୁରର ଏକ ମଦ ଦୋକାନରୁ ମଦ କିଣି ଯୋଗଧାରୀରେ ପହଞ୍ଚିଥିଲେ। ଏହାପରେ ସଭିଏଁ ମଦ୍ୟପାନ କରିଥିଲେ। ରାତି ପ୍ରାୟ ୯ରୁ ୧୦ଟା ଭିତରେ କେତେଜଣ ସିଗାରେଟ୍ ପାଇଁ ସେଠାରେ ପହଞ୍ଚି ମାଗିବାରୁ ଜ୍ଞାନ ମନାକରି ଦେଇଥିଲେ। ଏହି ସମୟରେ କାହିଁକି ସିଗାରେଟ୍ ଦେଲ ନାହିଁ ବୋଲି ସବ୍ୟସାଚୀ ପଚାରିବାରୁ ଜ୍ଞାନଙ୍କ ସହ ତାଙ୍କର ପ୍ରଥମେ ଯୁକ୍ତିତର୍କ ଓ ପରେ ହାତାହାତି ଯାଏ କଥା ଯାଇଥିଲା। ଅନ୍ୟ ଲୋକଙ୍କୁ ସିଗାରେଟ୍ ନ ଦେବା କଥାକୁ ନେଇ ଗଣ୍ଡଗୋଳ ହେବା ପଛରେ ପୂର୍ବଶତ୍ରୁତା ଥିବା ବାରି ହୋଇପଡିଛି। ସବ୍ୟସାଚୀ ଓ ଜ୍ଞାନଙ୍କ ଭିତରେ ଅତୀତରେ ମାରପିଟ୍ ହୋଇଥିଲା। ଏହି ରାଗ ଶୁଝାଇବା ପାଇଁ ସିଗାରେଟ୍ କଥାକୁ ନେଇ ସବ୍ୟସାଚୀ ଗଣ୍ଡଗୋଳ ଆରମ୍ଭ କରିଥିଲେ। ଏହା ଭିତରେ କ୍ରୋଧାନ୍ବିତ ହୋଇ ଜ୍ଞାନ ଘାସ କାଟିବା ପାଇଁ ତାଙ୍କ ଦୋକାନରେ ରଖିଥିବା ଖଣ୍ଡା ଆଣି ଡରାଇବାକୁ ଚେଷ୍ଟା କରିଥିଲେ। କିନ୍ତୁ ଏହି ଖଣ୍ଡା ତାଙ୍କ ପାଇଁ କାଳ ହୋଇଥିଲା। ସବ୍ୟସାଚୀ ବଳପ୍ରୟୋଗ କରି ତାଙ୍କ ଉପରେ ଭାରି ପଡିଥିଲେ। ଯେଉଁ କାରଣରୁ ଖଣ୍ଡା ଜ୍ଞାନଙ୍କ ଗୋଡରେ ବାଜି କ୍ଷତ ସୃଷ୍ଟି କରିଥିଲା। ହାତାହାତି ଭିତରେ ଜ୍ଞାନ ତଳେ ପଡି ଯାଇଥିଲେ ଓ ତାଙ୍କ ହାତରେ ଥିବା ଖଣ୍ଡା ମଧ୍ୟ ପଡିଯାଇଥିଲା। ଏହାର ସୁଯୋଗରେ ସବ୍ୟସାଚୀ ତତ୍କାଳ ଖଣ୍ଡା ଉଠାଇ ଜ୍ଞାନଙ୍କୁ ଆକ୍ରମଣ କରିବା ସହ ବାମ ଗୋଡ ଆଣ୍ଠୁ ତଳକୁ ଆଘାତ କରିଥିଲେ। ଫଳରେ ଗୋଡଟି ଅଧାରୁ ଅଧିକ କଟିଯିବା ସହ ବିଭିନ୍ନ ସ୍ଥାନରେ କ୍ଷତ ସୃଷ୍ଟି ହୋଇଥିଲା। ଏହି ସମୟରେ ପ୍ରବଳ ରକ୍ତସ୍ରାବ ହେବା ଯୋଗୁ ଜ୍ଞାନଙ୍କ ମୃତ୍ୟୁ ଘଟିଥିଲା। ଏହାପରେ କାର୍ତ୍ତିକ ଓ ସବ୍ୟସାଚୀ ସେଠାରୁ ଚାଲିଯାଇଥିଲେ। ୨ ଜଣ ପ୍ରତ୍ୟକ୍ଷଦର୍ଶୀଙ୍କ ବୟାନ ଆଧାରରେ ଏହି ଘଟଣାର ବାସ୍ତବ ଚିତ୍ର ସ୍ପଷ୍ଟ ହୋଇଛି। ଏସ୍ଡିପିଓଙ୍କ ନେତୃତ୍ୱରେ ପୃଥକ୍ ଦଳ ଗଠନ କରାଯାଇ ଅଭିଯୁକ୍ତମାନଙ୍କୁ ଗିରଫ ପାଇଁ ମୋବାଇଲ ଟ୍ରାକିଂ, ଇଣ୍ଟରନେଟ୍ ଓ ଡିଜିଟାଲ ତଦନ୍ତ କରାଯିବା ସହ ଟେଲିଫୋନ ଟ୍ୟାପିଂ ଓ ଆଧୁନିକ ଫୋରେନ୍ସିକ୍ ପ୍ରଣାଳୀ ମାଧ୍ୟମରେ ଉଦ୍ୟମ କରାଯାଇଥିଲା। ଫଳରେ ୨୪ ଘଣ୍ଟା ଭିତରେ ପୋଲିସକୁ ସଫଳତା ମିଳିପାରିଛି। ଏହି ମାମଲାରେ ଅଧିକ ତଥ୍ୟ ପାଇଁ ତଦନ୍ତ ଜାରି ରହିଛି ବୋଲି ଏସ୍ପି ବର୍ମା କହିଛନ୍ତି। ଖବରଦାତା ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ଏସ୍ଡିପିଓ ଆଜିଙ୍କ୍ୟ ମାଣେ, ଡିଏସ୍ପି ରଶ୍ମିରଞ୍ଜନ ଦାଶ ଓ ଜଗତ୍ସିଂହପୁର ଆଇଆଇସି ସରୋଜକାନ୍ତ ସାମଲ ଉପସ୍ଥିତ ଥିଲେ।
ସୂଚନା ଅନୁଯାୟୀ ଜ୍ଞାନ ବର୍ଷାଧିକ ହେବ ପାନ ଦୋକାନ କରିଥିଲେ। ସବୁଦିନ ପରି ଜ୍ଞାନ ଦୋକାନ ଯାଇ ରାତି ୧୦ଟା ୩୦ ସୁଦ୍ଧା ଘରକୁ ନ ଫେରିବାରୁ ସ୍ତ୍ରୀ ବ୍ୟସ୍ତ ହୋଇ ଗାଁର ଜଣେ ଯୁବକଙ୍କୁ ଧରି ଯୋଗଧାରୀରେ ପହଞ୍ଚିବା ପରେ ସ୍ବାମୀଙ୍କ ରକ୍ତ ଜୁଡୁବୁଡୁ ମୃତଦେହ ଦେଖିଥିଲେ। ପାଖରେ ଏକ ଖଣ୍ଡା ପଡିଥିଲା। ଏହାପରେ ସେଠାରେ ଲୋକାରଣ୍ୟ ହେବା ସହ ଥାନାକୁ ଖବର ହୋଇଥିଲା।
