ନୂଆଦିଲ୍ଲୀ,୩।୯: ତାମିଲନାଡୁର ଯୁବ କଲ୍ୟାଣ ମନ୍ତ୍ରୀ ତଥା ଡିଏମକେ ନେତା ଉଦୟନିଧି ଷ୍ଟାଲିନଙ୍କ ମନ୍ତବ୍ୟ(ସନାତନ ଧର୍ମକୁ ରଦ୍ଦ କରାଯିବା ଉଚିତ)କୁ ନେଇ ଦେଶରେ ରାଜନୈତିକ ଝଡ ସୃଷ୍ଟି ହୋଇଛି। ଷ୍ଟାଲିନଙ୍କ ବିବୃତ୍ତିକୁ ବିରୋଧୀ ମେଣ୍ଟ ‘ଇଣ୍ଡିଆ’ ସହିତ ଯୋଡି ରବିବାର ଭାଜପାର ଜାତୀୟ ମୁଖପାତ୍ର ସୁଧାଂଶୁ ତ୍ରିବେଦୀ ବର୍ଷିଛନ୍ତି। ସେ କହିଛନ୍ତି, ସେମାନଙ୍କର ଏଜେଣ୍ଡା ସ୍ପଷ୍ଟ। ସେମାନେ ହିନ୍ଦୁ ଧର୍ମକୁ ସଂପୂର୍ଣ୍ଣ ଧ୍ୱଂସ କରିବାକୁ ଚାହୁଁଛନ୍ତି। ତେଣୁ ଏହା କେବଳ ଧର୍ମ ଓ ସଂସ୍କୃତିର ବିଷୟ ନୁହେଁ, ଏହା ଭାରତର ସଂପୂର୍ଣ୍ଣ ବିନାଶ ପାଇଁ ଆଧାର।
ତ୍ରିବେଦୀ କହିଛନ୍ତି, ଭାରତର ସେହି ଅଞ୍ଚଳରେ ନଜର ପକାନ୍ତୁ ଯେଉଁଠାରେ ସନାତନ ଧର୍ମର ବିନାଶ ଘଟିଥିଲା। ତାଜା ଇତିହାସ ପାକିସ୍ତାନର, ସେଠାରେ କ’ଣ ହେଲା? ଆଜି ବିନାଶର ଦୃଶ୍ୟ ଅଛି କି ନାହିଁ? ଏବଂ ଭାରତରେ, କଶ୍ମୀରରେ କ’ଣ ହେଲା? ଅଭିବୃଦ୍ଧି ହାର କ’ଣ, ରୋଜଗାର ହାର କ’ଣ, ୨୦୧୯ ପୂର୍ବରୁ ଶିକ୍ଷା ହାର କ’ଣ ଥିଲା। ତେଣୁ ମୁଁ ଦୃଢତାର ସହିତ କହିବାକୁ ଚାହେଁ, ସେମାନଙ୍କର ପ୍ରକୃତ ଉଦ୍ଦେଶ୍ୟ ସାମ୍ନାକୁ ଆସିଛି। ତାମିଲନାଡୁର ଡିଏମକେ ମନ୍ତ୍ରୀ ଉଦୟନିଧି ଷ୍ଟାଲିନ ଅହଂକାରୀ ବିରୋଧୀ ମେଣ୍ଟ ‘ଇଣ୍ଡିଆ’ର ଅଂଶ। ‘ଇଣ୍ଡିଆ’ ବୈଠକ ପରେ ସେ ଏହି ମନ୍ତବ୍ୟ ଦେଇଛନ୍ତି। ବର୍ତ୍ତମାନ ସେମାନଙ୍କର ପ୍ରକୃତ ଚରିତ୍ର ଉନ୍ମୋଚିତ ହୋଇଛି।
ସୂଚନାଯୋଗ୍ୟ, ସାନ୍ତାନମ୍ ଉନ୍ନୁଳମ୍ ସମ୍ମିଳନୀରେ ଆୟୋଜିତ ଏକ ସମ୍ମିଳନୀରେ ଷ୍ଟାଲିନ୍ କହିଥିଲେ, ସନାତନ ଧର୍ମ ମ୍ୟାଲେରିଆ ଏବଂ ଡେଙ୍ଗୁ ଭଳି। ଏହାକୁ ବିଲୋପ କରାଯିବା ଉଚିତ୍।
