ନୂଆଦିଲ୍ଲୀ,୯।୧୦ : ବିଶ୍ୱ ସ୍ବାସ୍ଥ୍ୟ ସଂଗଠନ ଚାରିଟି ଭାରତୀୟ ନିର୍ମିତ କଫ୍ ସିରପ ବିଷୟରେ ଭାରତ ସରକାରଙ୍କୁ ଚେତାବନୀ ଦେଇଛି। ଏହା ପରେ ଏହାକୁ ତିଆରି କରିଥିବା କମ୍ପାନୀରୁ ଏକ ସ୍ପଷ୍ଟୀକରଣ ଆସିଛି। ଏହି କଫ୍ ସିରପ ହରିୟାଣାର ସୋନିପାତରେ ଅବସ୍ଥିତ ଫାର୍ମା କମ୍ପାନୀ ମେଡେନ ଫାର୍ମାସ୍ୟୁଟିକାଲ୍ସ ଲିମିଟେଡ ଦ୍ୱାରା ପ୍ରସ୍ତୁତ। ଆଫ୍ରିକୀୟ ଦେଶ ଗାମ୍ବିଆରେ ୬୬ ପିଲାଙ୍କ ମୃତ୍ୟୁ ସହିତ ବିଶ୍ୱସ୍ବାସ୍ଥ୍ୟ ସଂଗଠନ ଏହି ଔଷଧଗୁଡ଼ିକୁ ଜଡ଼ିତ କରିଛି।
କମ୍ପାନୀ ପକ୍ଷରୁ କୁହାଯାଇଛି ଯେ ଏହା ପୂର୍ବରୁ ଗଣମାଧ୍ୟମ ଏବଂ ବିଶ୍ୱ ସ୍ବାସ୍ଥ୍ୟ ସଂଗଠନ ମାଧ୍ୟମରେ ପିଲାମାନଙ୍କ ମୃତ୍ୟୁ ଖବର ଶୁଣି ଆଶ୍ଚର୍ଯ୍ୟ ହୋଇଯାଇଛି। କମ୍ପାନୀ ପକ୍ଷରୁ ତିନି ଦଶନ୍ଧିରୁ ଅଧିକ ସମୟ ଧରି ଡାକ୍ତରୀ କ୍ଷେତ୍ରରେ କାର୍ଯ୍ୟ କରିବା ଏବଂ ଡ୍ରଗ୍ସ କଣ୍ଟ୍ରୋଲର ଅଫ ଇଣ୍ଡିଆ ଏବଂ ହରିୟାଣା ସରକାରଙ୍କ ଡ୍ରଗ୍ସ କଣ୍ଟ୍ରୋଲରର ପ୍ରୋଟୋକଲଗୁଡିକ ସମ୍ପୂର୍ଣ୍ଣ ଭାବରେ ପାଳନ କରାଯାଇଛି।
କଫ୍ ସିରପ ବିଷୟରେ ଭାରତକୁ ଚେତାବନୀ ଦେବାରେ ବିଶ୍ୱସ୍ବାସ୍ଥ୍ୟ ସଂଗଠନର ପ୍ରକ୍ରିୟା ଉପରେ ପ୍ରଶ୍ନ ମଧ୍ୟ ଉଠିଛି।
ବିଶ୍ୱ ସ୍ବାସ୍ଥ୍ୟ ସଂଗଠନର ସତର୍କ ସୂଚନା ପରେ ଭାରତ ସରକାର ମଧ୍ୟ ଏହି ଔଷଧ ସମ୍ପର୍କରେ ତଦନ୍ତ ଆରମ୍ଭ କରିଛନ୍ତି। ପରୀକ୍ଷା ପାଇଁ ମେଡେନ ଫାର୍ମାଙ୍କ ଡ୍ରଗ ନମୁନା ନିଆଯାଇଛି। ସରକାରୀ ଏଜେନ୍ସିଗୁଡିକ ୧ ଅକ୍ଟୋବର, ୩ ଅକ୍ଟୋବର, ୬ ଅକ୍ଟୋବର ଏବଂ ୭ ଅକ୍ଟୋବରରେ ନମୁନା ସଂଗ୍ରହ କରିଛନ୍ତି। ଦେଶର କେନ୍ଦ୍ରୀୟ ଏବଂ ଆଞ୍ଚଳିକ ଡ୍ରଗ୍ସ ଲ୍ୟାବରେ ଏହା ପରୀକ୍ଷା କରାଯିବ।
କମ୍ପାନୀ କହିଛି ଯେ ଉତ୍ପାଦ ରପ୍ତାନି ସମ୍ପୃକ୍ତ କର୍ତ୍ତୃପକ୍ଷଙ୍କ ଦ୍ୱାରା ଅନୁମୋଦିତ ଏବଂ ଭାରତରେ କୌଣସି ଉତ୍ପାଦ ବିନା ସ୍ବୀକୃତିେୀ ବିକ୍ରି ହୁଏ ନାହିଁ।
ଏଥିସହ କମ୍ପାନୀ କହିଛି ଯେ କେନ୍ଦ୍ରୀୟ ଡ୍ରଗ୍ସ ଷ୍ଟାଣ୍ଡାର୍ଡ କଣ୍ଟ୍ରୋଲ ଅର୍ଗାନାଇଜେଶନ ଦ୍ୱାରା ନମୁନା ନିଆଯାଇଛି। ଏହାର ଫଳାଫଳ ଏପର୍ଯ୍ୟନ୍ତ ଆସି ନାହିଁ। ନମୁନାର ଫଳାଫଳ ନ ଆସିବା ପର୍ଯ୍ୟନ୍ତ କିଛି ବି ସ୍ପଷ୍ଟୀକରଣ ଦେବା ଠିକ ନୁହେଁ ।
ପ୍ରୋମେଟାଜାଇନ ଓରାଲ ସଲ୍ୟୁଶନ, କୋଫେକ୍ସମାଲିନ ବେବି କଫ୍ ସିରପ, ମାକଫ ବେବି କଫ୍ ସିରପ ଏବଂ ମ୍ୟାଗ୍ରିପ ଏନ କୋଲ୍ଡ ସିରପ ଆଦି ଚାରୋଟି ଉତ୍ପାଦ ନେଇ ବିଶ୍ୱ ସ୍ବାସ୍ଥ୍ୟ ସଂଗଠନ ପକ୍ଷରୁ ଏକ ସତର୍କ ସୂଚନା ଜାରି କରାଯାଇଛି। ଏହି ଉତ୍ପାଦଗୁଡିକ ସମ୍ବନ୍ଧୀୟ ଅଧିକ ସୂଚନା ଦେବାକୁ ଭାରତ ସରକାର ବିଶ୍ୱସ୍ବାସ୍ଥ୍ୟ ସଂଗଠନକୁ କହିଛନ୍ତି।
ବିଶ୍ୱ ସ୍ବାସ୍ଥ୍ୟ ସଂଗଠନ ଏହାର ଏକ ଡାକ୍ତରୀ ଆଲର୍ଟରେ କହିଛି ଯେ ଲାବୋରେଟୋରୀରେ ବିଶ୍ଳେଷଣ କରାଯାଇଥିବା ଚାରୋଟି ଉତ୍ପାଦର ନମୁନା ନିଶ୍ଚିତ କରିଛି ଯେ ଏହି ଉତ୍ପାଦଗୁଡିକରେ ଥିବା ଡାଏଥାଇଲନ ଗ୍ଲାଇକଲ ଏବଂ ଏଥିଲିନ ଗ୍ଲାଇକଲର ମାତ୍ରା ଗ୍ରହଣୀୟ ନୁହେଁ।
