ନୂଆଦିଲ୍ଲୀ, ୮।୯ : ଭାରତୀୟ ପ୍ରତିରକ୍ଷା କ୍ଷେତ୍ରରେ ବ୍ୟବହୃତ ହେଉଥିବା ଅସ୍ତ୍ରଶସ୍ତ୍ର ତଥା ଉପକରଣକୁ ମେକ୍ ଇନ୍ ଇଣ୍ଡିଆ ଅନ୍ତର୍ଗତ ଦେଶରେ ନିର୍ମାଣ କରିବା ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନୀତି ଯୋଗୁ ସଙ୍କଟ ସୃଷ୍ଟି ହୋଇଛି।
ଫଳରେ ଭାରତୀୟ ସେନା ଅସ୍ତ୍ରଶସ୍ତ୍ର ଦୃଷ୍ଟିରୁ ଚାଇନା ଏବଂ ପାକିସ୍ତାନ ସମ୍ମୁଖରେ ଦୁର୍ବଳ ହେବାରେ ଲାଗିଛି ବୋଲି ବ୍ଲୁମବର୍ଗ ଦ୍ୱାରା ପ୍ରକାଶିିତ ଏକ ରିପୋର୍ଟରେ ଉଲ୍ଲେଖ କରାଯାଇଛି। ସରକାରଙ୍କ ନିୀତି ଯୋଗୁ ସ୍ଥଳସେନା, ବାୟୁସେନା ଏବଂ ନୌସେନା ପୁରୁଣା ଅସ୍ତ୍ରଶସ୍ତ୍ର ନେଇ ବସିଛନ୍ତି।
ଯୁଦ୍ଧ ଲଢ଼ିବା ପାଇଁ ସେମାନଙ୍କ ପାଖରେ ଆଧୁନିକ ନୂଆ ଅସ୍ତ୍ରଶସ୍ତ୍ରର ଅଭାବ ରହିଛି। ଏହାକୁ ଆମଦାନୀ କରାଯାଇ ପାରୁନାହିଁ। ଏଭଳି ଜାରି ରହିଲେ ୨୦୨୬ ବେଳକୁ ଭାରତୀୟ ସେନା ପାଖରେ ହେଲିକପ୍ଟରର ଅଭାବ ପରିଲକ୍ଷିତ ହେବାର ଆଶଙ୍କା ରହିଛି। ସେହିପରି ୨୦୩୦ ବେଳକୁ ଶହେରୁ ଅଧିକ ଯୁଦ୍ଧ ବିମାନର ଅଭାବ ଦେଖାଯିବ।
ବ୍ଲୁମବର୍ଗ ପକ୍ଷରୁ ତିନି ସେନାର ଅଧିକାରୀଙ୍କ ସହିତ ଆଲୋଚନା କରିବା ପରେ ଏହି ରିପୋର୍ଟ ପ୍ରକାଶିତ ହୋଇଛି।
