ପାଟନା,୯ା୨: ଭାରତର ଅଭିବୃଦ୍ଧିଶୀଳ ଘରୋଇ ମହାକାଶ କ୍ଷେତ୍ରକୁ ଏକ ବଡ଼ ସଫଳତା ମିଳିଛି। ଅହମଦାବାଦର ଆଜିସ୍ତା ଇଣ୍ଡଷ୍ଟ୍ରିଜ୍ ପ୍ରା.ଲିଃ ଏହାର ଏରୋସ୍ପେସ୍ ବିଭାଗ ଜରିଆରେ ଏକ ନୂଆ ସାମର୍ଥ୍ୟର ପ୍ରଦର୍ଶନ କରିଛି। ଏହା କକ୍ଷପଥରେ ଅନ୍ୟ ସାଟେଲାଇଟ୍ରେ ଥିବା ବସ୍ତୁର ଫଟୋ ହାସଲ କରିବାର ନୂଆ ସ୍ବଦେଶୀ କ୍ଷମତା ହାସଲ କରିଛି। ଭାରତର ଏକ ଘରୋଇ ସେକ୍ଟର ପାଇଁ ଏହା ପ୍ରଥମ ହୋଇଥିବାବେଳେ ଭାରତୀୟ ମହାକାଶ ସ୍ଥିତି ସଚେତନତାକୁ ସୁଦୃଢ଼ କରିବା ଦିଗରେ ଏକ ବଡ଼ ପଦକ୍ଷେପ। ଏହାକୁ କକ୍ଷପଥ ଗୁପ୍ତଚରଗିରି କୁହାଯାଏ।
୮୦ କିଲୋଗ୍ରାମ ଭୂପର୍ଯ୍ୟବେକ୍ଷଣ ସାଟେଲାଇଟ୍ ଏଏଫ୍ଆର୍ ବ୍ୟବହାର କରି ଆଜିସ୍ତା ଅନ୍ତର୍ଜାତୀୟ ମହାକାଶ କେନ୍ଦ୍ର (ଆଇଏସ୍ଏସ୍)ର ଫଟୋକୁ ସଫଳତାର ସହ ଧରିପାରିଛି। ଫେବୃଆରୀ ୩ରେ ଏହା ଉପରେ ୨ ଥର ଯୋଜନାବଦ୍ଧ ପରୀକ୍ଷା କରାଯାଇଥିଲା। ନିମ୍ନ ଆର୍ଥ ଅର୍ବିଟ୍ରୁ ଆଇଏସ୍ଏସ୍ ଅନ୍ୟତମ ଅଧିକ ଦୃଶ୍ୟମାନ ଏବଂ ସହଯୋଗୀ ଟାର୍ଗେଟ ହୋଇଥିବାବେଳେ ଉକ୍ତ ସଫଳତା ଭାରତର ଘରୋଇ ସେକ୍ଟର ପାଇଁ ଏକ ଗୁରୁତ୍ୱପୂର୍ଣ୍ଣ ଆରମ୍ଭ ବୋଲି କୁହାଯାଉଛି। ଦିଗ୍ବଳୟ ନିକଟ ଏବଂ ସୂର୍ଯ୍ୟାଲୋକ ସ୍ଥିତିରେ ଆଜିସ୍ତା ୨ଟି ଫଟୋ ଉଠାଇବା ଉଦ୍ୟମ କରିଥିଲା। ପ୍ରଥମଟି ପ୍ରାୟ ୩୦୦ କିଲୋମିଟର ଦୂରରେ ହୋଇଥିବାବେଳେ ଦ୍ୱିତୀୟଟି ୨୪୫ କି.ମି. ଦୂରରେ ହୋଇଥିଲା। ଏଏଫ୍ଆର୍ ସାଟେଲାଇଟ୍ର ସେନ୍ସର ଉଭୟ ଉଦ୍ୟମରେ ଦ୍ରୁତ ଗତିଶୀଳ ଆଇଏସ୍ଏସ୍କୁ ଠିକ୍ ଭାବେ ଟ୍ରାକ୍ କରିଥିଲା ଓ ୨.୨ ମିଟର ଚିତ୍ର ନମୁନାର ମୋଟ ୧୫ଟି ପୃଥକ୍ ଫଟୋ ନେଇଥିଲା। ଉଭୟ ଉଦ୍ୟମ ୧୦୦ ପ୍ରତିଶତ ସଫଳ ହେବା ସହ ଏହାର ଟ୍ରାକିଂ ଆଲେଗୋରିଦିମ୍ ଏବଂ ଇଲେକ୍ଟ୍ୟୋ-ଅପ୍ଟିକାଲ ଇମେଜିଂ ପ୍ରିସିସନ୍କୁ ସ୍ପଷ୍ଟ କରୁଥିବା କମ୍ପାନୀ ଦାବି କରିଛି।
