ଚେନ୍ନାଇ,୨୨ା୩(ପି.ଟି.): ଅଷ୍ଟ୍ରେଲିଆ ବିପକ୍ଷ ଦିନିକିଆ ସିରିଜର ନିର୍ଣ୍ଣାୟକ ମ୍ୟାଚ୍ ବୁଧବାର ଚେନ୍ନାଇର ଚେପକ୍ ଷ୍ଟାଡିୟମରେ ଖେଳାଯିବ। ଘରୋଇ ପରିବେଶରେ ଖେଳୁଥିବା ଭାରତ ଏହି ମ୍ୟାଚ୍ ଜିତିବା ସହିତ ସିରିଜ ବିଜୟୀ ହେବାକୁ ପ୍ରୟାସ କରିବ। ପୂର୍ବରୁ ମୁମ୍ବାଇରେ ଅନୁଷ୍ଠିତ ପ୍ରଥମ ମ୍ୟାଚ୍ ଭାରତ ଜିତିଥିବା ବେଳେ ବିଶାଖାପାଟଣାରେ ଅଷ୍ଟ୍ରେଲିଆ ୧୦ ଉଇକେଟରେ ବିଜୟୀ ହୋଇଥିଲା। ଅନ୍ତିମ ମ୍ୟାଚରେ ଭାରତକୁ ମିଚେଲ୍ ଚ୍ୟାଲେଞ୍ଜର ସାମ୍ନା କରିବାକୁ ପଡିବ। ବୋଲିଂରେ ମିଚେଲ୍ ଷ୍ଟାର୍କ ଓ ବ୍ୟାଟିଂରେ ମିଚେଲ୍ ମାର୍ଶ ଭାରତକୁ ଅସୁବିଧାରେ ପକାଇଛନ୍ତି। ପ୍ରଥମ ଦୁଇ ମ୍ୟାଚରେ ଷ୍ଟାର୍କ ୧୧ ଉଇକେଟ ନେଇଥିବା ବେଳେ ମାର୍ଶ ମାରିଛନ୍ତି ୧୧ ଛକା। ଭାରତକୁ ସିରିଜ୍ ବିଜୟୀ ହେବାକୁ ହେଲେ ରୋହିତ ଶର୍ମା, ବିରାଟ କୋହଲି, ଲୋକେଶ ରାହୁଲ ଓ ଶୁବମାନ ଗିଲ୍ଙ୍କ ପରି ଖେଳାଳିଙ୍କୁ ନିଜ ଶ୍ରେଷ୍ଠ ଫର୍ମର ଖେଳ ପ୍ରଦର୍ଶନ କରିବାକୁ ପଡିବ। ଷ୍ଟାର୍କଙ୍କ ବୋଲିଂ ସାଧାରଣ ରହିଥିବା ବେଳେ ଭାରତୀୟ ବ୍ୟାଟରମାନେ ଧୈର୍ଯ୍ୟ ଦେଖାଉ ନାହାନ୍ତି। ବାମହାତୀ ପେସର ଷ୍ଟାର୍କଙ୍କ ବଲ୍ ସାଧାରଣତଃ ଇନ ସୁଇଙ୍ଗର ରହିଥାଏ। ମାତ୍ର ଭାରତୀୟ ଖେଳାଳି ନିଜ ଡିଫେନ୍ସ ଉପରେ ଭରସା ନ ଦେଖାଇବା ବଡ ସମସ୍ୟା ପାଲଟିଛି। ଭାରତୀୟ ଖେଳାଳିଙ୍କ ଡିଫେନ୍ସରେ କିଛି ସମସ୍ୟା ନ ଥିବା ବେଳେ ସେମାନଙ୍କୁ ମାନସିକ ଭାବରେ ପ୍ରସ୍ତୁତ ରହିବାକୁ ପଡିବ। ଭାରତୀୟ ପିଚ୍ଗୁଡିକ ସାଧାରଣତଃ ଫ୍ଲାଟ ରହିଥାଏ। ଚେପକ୍ର ପିଚ୍ ସାଧାରଣତଃ ଧିମା ରହିଥାଏ ଓ ମିଡିଲ ଓଭରରେ ରନ୍ ସ୍କୋର କରିବା କଷ୍ଟ ହୋଇଥାଏ। ମାତ୍ର ଚଳିତ ବର୍ଷ ଚେପକ୍ରେ ପିଚ୍ ଆଉ ଥରେ ତିଆରି କରାଯାଇଥିବା ବେଳେ ଏହା ବ୍ୟାଟିଂ ସହାୟକ ହେବା ନେଇ ଆଶା କରାଯାଉଛି। ତେବେ ପ୍ରାରମ୍ଭିକ ଓଭରରେ ବୋଲରଙ୍କୁ ସାମାନ୍ୟ ସହାୟତା ମିଳିବାର ସମ୍ଭାବନା ରହିଛି। ଭାରତୀୟ ଦଳର ଟପ୍ ଅର୍ଡର ପ୍ରଥମ ଦୁଇ ମ୍ୟାଚରେ ବିଫଳ ହୋଇଛନ୍ତି। ଶୁବମାନ୍ ଗିଲ୍, ବିରାଟ କୋହଲି ଏକ ବଡ ସ୍କୋରର ଅପେକ୍ଷାରେ ରହିଥିବା ବେଳେ ଲଗାତର ଦୁଇଟି ମ୍ୟାଚରେ ଗୋଲ୍ଡେନ୍ ଡକ୍ରେ ଆଉଟ ହୋଇଛନ୍ତି ସୂର୍ଯ୍ୟକୁମାର ଯାଦବ। ଟି୨୦ରେ ବିଶ୍ୱର ଏକ ନମ୍ବର ବ୍ୟାଟର ସୂର୍ଯ୍ୟକୁମାର ଯାଦବ ପ୍ରଥମ ଦୁଇ ଦିନିକିଆରେ ମାତ୍ର ଦୁଇଟି ବଲ ଖେଳିବାରେ ସମର୍ଥ ହୋଇଛନ୍ତି। ଟି୨୦ରେ ସୂର୍ଯ୍ୟକୁମାର ବଲ୍କୁ ଅପେକ୍ଷା କରି ଖେଳୁଥିବା ବେଳେ ଦିନିକିଆରେ ଜଲ୍ଦି ଖେଳିବା ପ୍ରୟାସରେ ନିଜର ଉଇକେଟ ଫୋପାଡୁଛନ୍ତି। ଶ୍ରେୟସ୍ ଆୟରଙ୍କ ଅନୁପସ୍ଥିତିରେ ତାଙ୍କୁ ଆଉ କିଛି ସୁଯୋଗ ମିଳିବା ନିଶ୍ଚିତ। ଏହା ମଧ୍ୟରେ ସେ ଭାରତୀୟ ମଧ୍ୟକ୍ରମରେ ନିଜ ସ୍ଥାନ ସୁରକ୍ଷିତ କରିବା ଉଚିତ। ତେବେ ସୂର୍ଯ୍ୟକୁମାରଙ୍କ ଫର୍ମକୁ ଦେଖିଲେ ଭାରତ ଅନ୍ତିମ ଦିନିକିଆରେ ତାଙ୍କୁ ଦଳରୁ ବାହାରେ ରଖିପାରେ। ସ୍ଥାନୀୟ ଖେଳାଳି ଓ୍ବାଶିଂଟନ୍ ସୁନ୍ଦରଙ୍କୁ ଟପ୍ ଅର୍ଡରରେ ଏକ ସୁଯୋଗ ମିଳିପାରେ। ତାମିଲନାଡୁ ପକ୍ଷରୁ ଘରୋଇ କ୍ରିକେଟ ଖେଳୁଥିବା ଓ୍ବାଶିଂଟନ୍ ୪ ନମ୍ବରରେ ବ୍ୟାଟିଂ କରିବା ସହିତ ଉପଯୋଗୀ ବୋଲର ଦାୟିତ୍ୱ ମଧ୍ୟ ବହନ କରିପାରିବେ। ସେହିପରି ଆସନ୍ତା ଜୁନ-ଜୁଲାଇ ପର୍ଯ୍ୟନ୍ତ ଭାରତ ଆଉ ଦିନିକିଆ ମ୍ୟାଚ୍ ଖେଳୁ ନ ଥିବା କାରଣରୁ ଏହା ସୂର୍ଯ୍ୟକୁମାରଙ୍କ ପାଇଁ ଶେଷ ସୁଯୋଗ ବୋଲି ବିବେଚନା କରାଯାଇପାରେ। ଏହା ସହିତ ଭାରତ ନିଜର ବୋଲିଂ ଲାଇନ୍ ଅପ୍ ବା ଦଳ ଚୟନକୁ ନେଇ ଚିନ୍ତାରେ ରହିଛି। ଦୁଇଟି ଯାକ ମ୍ୟାଚରେ ଭାରତୀୟ ବୋଲର ମାତ୍ର ୪୭ ଓଭର ବୋଲିଂ କରିଛନ୍ତି। ଯଦି ଭାରତ ଟସ୍ ଜିତେ ତେବେ ମହମ୍ମଦ ଶାମି ଓ ମହମ୍ମଦ ସିରାଜଙ୍କ ଠାରୁ ଭଲ ପ୍ରଦର୍ଶନର ଆଶା ରହିବ। ଅନ୍ୟ ପକ୍ଷରେ ତୃତୀୟ ପେସ୍ ବୋଲର ଭାବରେ ଭାରତ ଶାର୍ଦ୍ଦୂଳ ଠାକୁର ବା ଜୟଦେବ ଉନାଡକଟଙ୍କୁ ଖେଳାଇପାରେ। ସେହିପରି ସ୍ପିନର ଭାବରେ ରବୀନ୍ଦ୍ର ଜାଡେଜା ପ୍ରଥମ ପସନ୍ଦ ରହିଥିବା ବେଳେ ଦ୍ୱିତୀୟ ସ୍ପିନର ଭାବରେ କୁଲଦୀପ ଯାଦବ -ଅକ୍ଷର ପଟେଲଙ୍କ ମଧ୍ୟରୁ ଜଣଙ୍କୁ ଅଥବା ଉଭୟଙ୍କୁ ଦଳରେ ସାମିଲ କରାଯାଇପାରେ।
