ନୂଆଦିଲ୍ଲୀ,୧୮।୭: ଆଗାମୀ ୭୨ ଘଣ୍ଟା ପାକିସ୍ତାନ ପାଇଁ ବହୁତ କଷ୍ଟସାଧ୍ୟ ହୋଇପାରେ। ୨୦୨୫ ଚାମ୍ପିଅନ୍ସ ଟ୍ରଫି ଆୟୋଜନରୁ ପାକିସ୍ତାନ ବଞ୍ଚିତ ହୋଇପାରେ। ୧୯ ରୁ ୨୨ ଜୁଲାଇ ମଧ୍ୟରେ ଶ୍ରୀଲଙ୍କାରେ ଆୟୋଜିତ ହେବାକୁ ଥିବା ଆଇସିସି ବୈଠକରେ ଏହା ଘୋଷଣା କରାଯାଇପାରେ।
ଭାରତ କୌଣସି ପରିସ୍ଥିତିରେ ପାକିସ୍ତାନ ଯିବାକୁ ପ୍ରସ୍ତୁତ ନୁହେଁ। ଯଦି ଟିମ ଇଣ୍ଡିଆ ଆଇସିସି ଚାମ୍ପିଅନ୍ସ ଟ୍ରଫିରୁ ଓହରିଯାଏ, ତେବେ ସମଗ୍ର ଟୁର୍ନାମେଣ୍ଟକୁ ଝଟ୍କା ଲାଗିପାରେ। ଏଭଳି ପରିସ୍ଥିତିରେ ଆଇସିସି ପାକିସ୍ତାନ ପରିବର୍ତ୍ତେ ଅନ୍ୟ କେତେକ ଦେଶରେ ଏହି ସମ୍ମାନଜନକ ଟୁର୍ନାମେଣ୍ଟ ଆୟୋଜନ କରିପାରିବ।
ସୂତ୍ର ଅନୁଯାୟୀ, ୨୦୨୫ ଚାମ୍ପିଅନ୍ସ ଟ୍ରଫି ବର୍ତ୍ତମାନ ଶ୍ରୀଲଙ୍କା କିମ୍ବା ଦୁବାଇରେ ଖେଳାଯାଇପାରିବ। ତେବେ ପୂର୍ବରୁ ଖବର ଆସିଥିଲା, ୨୦୨୫ ଚାମ୍ପିଅନ୍ସ ଟ୍ରଫି ହାଇବ୍ରିଡ ମଡେଲରେ ଖେଳାଯିବ। ହାଇବ୍ରିଡ ମଡେଲ ଅଧୀନରେ ଟିମ ଇଣ୍ଡିଆ ପାକିସ୍ତାନ ପରିବର୍ତ୍ତେ ଅନ୍ୟ କେତେକ ଦେଶରେ ଏହାର ମ୍ୟାଚ ଖେଳିଥାନ୍ତା। ଏହା ମଧ୍ୟ କୁହାଯାଇଥିଲା ଯେ, ଟିମ ଇଣ୍ଡିଆ ଶ୍ରୀଲଙ୍କା କିମ୍ବା ଦୁବାଇରେ ଚାମ୍ପିଅନ୍ସ ଟ୍ରଫିରେ ଏହାର ମ୍ୟାଚ ଖେଳିପାରେ। ତେବେ ବର୍ତ୍ତମାନ ଟୁର୍ନାମେଣ୍ଟ ଦୁବାଇ କିମ୍ବା ଶ୍ରୀଲଙ୍କାରେ ଅନୁଷ୍ଠିତ ହୋଇପାରିବ।
ଚାମ୍ପିଅନ୍ସ ଟ୍ରଫି ପାଇଁ ଟିମ ଇଣ୍ଡିଆ ପାକିସ୍ତାନ ଯିବ ନାହିଁ। ଇଂଲଣ୍ଡ ଏବଂ ଅଷ୍ଟ୍ରେଲିଆ ଭଳି ବଡ ଦେଶ ମଧ୍ୟ ଭାରତର ଏହି ନିଷ୍ପତ୍ତିକୁ ସମର୍ଥନ କରୁଛନ୍ତି। ଏଭଳି ପରିସ୍ଥିତିରେ ଆଇସିସି ବୈଠକରେ ଏହି ସମ୍ମାନଜନକ ଟୁର୍ନାମେଣ୍ଟର ସ୍ଥାନ ପରିବର୍ତ୍ତନ କରିବାକୁ ଭାରତର ଚାହିଦାକୁ ଅନ୍ୟ ଅନେକ ଦେଶ ମଧ୍ୟ ସମର୍ଥନ କରିପାରିବେ ବୋଲି କୁହାଯାଉଛି।
ଏହାପୂର୍ବରୁ ୨୦୨୩ ଏସିଆ କପ ଆୟୋଜନ ମଧ୍ୟ ପାକିସ୍ତାନ ହାତରେ ଥିଲା। ତେବେ ଏସିଆ କପ ପାଇଁ ପାକିସ୍ତାନ ଯିବାକୁ ସ୍ପଷ୍ଟ ଭାବେ ମନା କରିଦେଇଥିଲା ଟିମ ଇଣ୍ଡିଆ। ତା’ପରେ ଏହି ଟୁର୍ନାମେଣ୍ଟ ହାଇବ୍ରିଡ ମଡେଲରେ ଖେଳାଯାଇଥିଲା। ୨୦୨୩ ଏସିଆ କପରେ ଭାରତ ଶ୍ରୀଲଙ୍କାରେ ଏହାର ମ୍ୟାଚ ଖେଳିଥିଲା। ଭାରତ ଏବଂ ପାକିସ୍ତାନ ମଧ୍ୟରେ ମ୍ୟାଚ ମଧ୍ୟ ଶ୍ରୀଲଙ୍କାରେ ଖେଳାଯାଇଥିଲା।
