ନୂଆଦିଲ୍ଲୀ,୧୮।୭: ଦେଶର ପ୍ରତି ରାଜ୍ୟରେ ସୁନା ଦର ଭିନ୍ନ ଥାଏ। ରାଜ୍ୟର ଟିକସ ବ୍ୟତିତ ଅନେକ ଜିନିଷ ସୁନା ମୂଲ୍ୟରେ ସାମିଲ ଥାଏ। ହେଲେ ଏବେ ଦେଶରେ ଏକ ସମାନ ଦର ଲାଗୁ ହୋଇପାରେ। ଏହି ନୀତି ଲାଗୁ ହେବା ପରେ ପୁରା ଦେଶରେ ସୁନା ଦର ଏକସମାନ ହୋଇଯିବ। ଅର୍ଥାତ ତୁମେ ସୁନା ଦିଲ୍ଲୀରେ କିଣ ନଚେତ ଡେରାଡୁନରେ କିଣ, ସମାନ ମୂଲ୍ୟ ଦେବାକୁ ହେବ। ଏହି ପଲିସିକୁ ଜେମ୍ ଆଣ୍ଡ ଜୁଏଲାରୀ କାଉନସିଲ ସହମତି ଦେଇଛି। ଦେଶର ବଡ଼ ବଡ଼ ଜୁଏଲର୍ସ ଏହି ପଲିସି ଲାଗି ରାଜି ହୋଇଛନ୍ତି।
ମିଡିଆ ରିପୋର୍ଟ ମୁତାବକ, ବର୍ତ୍ତମାନ ଏହି ଉଦ୍ୟୋଗ ସହ ଜଡ଼ିତ ଅନ୍ୟ ହିତାଧାରୀଙ୍କ ସହ ଆଲୋଚନା ଜାରି ରହିଛି। ସେପ୍ଟେମ୍ବର ମାସରେ ଏହି ପଲିସି ଲାଗୁ କରାଯିବା ଆଶା ରହିଛି। ଏହା କେନ୍ଦ୍ର ସରକାରଙ୍କ ପ୍ରସ୍ତାବିତ ଯୋଜନା। ଏହାର ଲକ୍ଷ୍ୟ ପୁରା ଦେଶରେ ଏକ ସମାନ ସୁନା ଦର ଲାଗୁ କରିବା। ଏହି ପଲିସି ଦ୍ୱାରା ଦେଶର ପ୍ରତ୍ୟେକ ଅଞ୍ଚଳରେ ସୁନା ଦର ଏକ ସମାନ ହେବ। ସରକାର ଏଥିଲାଗି ‘ନ୍ୟାଶନାଲ ବୁଲିୟନ ଏକ୍ସଚେଞ୍ଜ’ ସ୍ଥାପନ କରିବେ। ଏହା ଜରିଆରେ ସୁନା ଦର ନିର୍ଦ୍ଧାରିତ କରାଯିବ। ଏହି ଦର ଉପରେ ସୁନା ବିକ୍ରି କରାଯିବ।
ସାରା ଦେଶରେ ଏକପ୍ରକାର ଦାମ ହେବା ଯୋଗୁ ସୁନା ବଜାରରେ ଉନ୍ନତି ପରିଲକ୍ଷିତ ହେବ। ଏଥିସହ ଗ୍ରାହକମାନେ ସମାନ ମୂଲ୍ୟରେ କ୍ରୟ କରିପାରିବେ।
