ଅହମ୍ମଦାବାଦ,୯।୨: ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଭାରତ ଏବଂ ୱେଷ୍ଟଇଣ୍ଡିଜ ମଧ୍ୟରେ ଦ୍ୱିତୀୟ ଦିନିକିଆ ଆରମ୍ଭ ହୋଇଛି। ଏହି ମ୍ୟାଚ୍ରେ ଓ୍ବେଷ୍ଟଇଣ୍ଡିଜ୍ ଟସ୍ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଛି। ରୋହିତ ଶର୍ମାଙ୍କ ନେତୃତ୍ୱରେ ଭାରତୀୟ ଦଳ ଏହି ମ୍ୟାଚ୍ ଜିତି ସିରିଜ ଉପରେ କବଜା କରିବା ଉଦ୍ଦେଶ୍ୟରେ ପଡ଼ିଆକୁ ଓହ୍ଲାଇବ। ଭାରତର ବିସ୍ଫୋରକ ବ୍ୟାଟ୍ସମ୍ୟାନ କେ.ଏଲ ରାହୁଲ ଏହି ମ୍ୟାଚକୁ ଫେରିଛନ୍ତି। ଫଳରେ ଭାରତୀୟ ବ୍ୟାଟିଂ ଅର୍ଡର ମଜବୁତ ହୋଇଛି। ପ୍ରଥମ ମ୍ୟାଚ ପରି ଭାରତୀୟ ବୋଲରମାନଙ୍କୁ ମଧ୍ୟ ନିଜର ଶକ୍ତି ପ୍ରଦର୍ଶନ କରିବାକୁ ପଡିବ।
ସମସ୍ତଙ୍କ ନଜର ଭାରତର ସୁପରଷ୍ଟାର ବ୍ୟାଟ୍ସମ୍ୟାନ ବିରାଟ କୋହଲିଙ୍କ ଉପରେ ରହିବ, ସେ ମ୍ୟାଚ୍ରେ ପ୍ରବେଶ କରିବା ମାତ୍ରେ ଏକ ରେକର୍ଡ ସୃଷ୍ଟି କରିବେ। ସେ ଭାରତୀୟ ମାଟିରେ ୧୦୦ ଟି ମ୍ୟାଚ ଖେଳିଥିବା ପଞ୍ଚମ ଭାରତୀୟ କ୍ରିକେଟର ହେବେ। ଏଥି ସହିତ, ଭାରତୀୟ ପ୍ରଶଂସକମାନେ ତାଙ୍କଠାରୁ ଏକ ବ୍ୟାଟିଂ ଇନିଂସ ଆଶା କରିବେ। ସେ ଗତ ଦୁଇ ବର୍ଷ ଧରି ଏକ ଶତକ ସ୍କୋର କରିବାରେ ସକ୍ଷମ ହୋଇନାହାଁନ୍ତି।
ଉଭୟ ଦେଶର ଏକାଦଶ
ଭାରତ- ରୋହିତ ଶର୍ମା (ଅଧିନାୟକ), କେଏଲ୍ ରାହୁଲ, ବିରାଟ କୋହଲି, ସୂର୍ଯ୍ୟକୁମାର ଯାଦବ, ରିଷଭ ପନ୍ତ (ଉଇକେଟ କିପର), ଦୀପକ ହୁଡା, ଶାର୍ଦ୍ଦୁଲ ଠାକୁର, ମହମ୍ମଦ ସିରାଜ, ୟୁଜବେନ୍ଦ୍ର ଚହଲ, ପ୍ରସିଦ୍ଧ କ୍ରିଷ୍ଣା, ୱାଶିଂଟନ ସୁନ୍ଦର।
ୱେଷ୍ଟଇଣ୍ଡିଜ – ବ୍ରେଣ୍ଡନ କିଙ୍ଗ, ଶାଇ ହୋପ (ଉଇକେଟ କିପର), ଶାମର ବ୍ରୁକ୍ସ, ଡାରେନ ବ୍ରାଭୋ, ନିକୋଲାସ ପୁରନ (ଅଧିନାୟକ), ଜେସନ ହୋଲ୍ଡର, ଫାବିଆନ ଆଲେନ, ଆଲଜାରି ଜୋସେଫ, କେମର ରୋଚ, ଆକିଲ ହୋସେନ, ଓଡେନ ସ୍ମିଥ୍।