ଅହମଦାବାଦ୍,୭।୨: ତିନି ମ୍ୟାଚ ବିଶିଷ୍ଟ ସିରିଜର ପ୍ରଥମ ମ୍ୟାଚ୍ରେ ୱେଷ୍ଟଇଣ୍ଡିଜକୁ ୬ ଉଇକେଟରେ ପରାସ୍ତ କରିଛି ଭାରତ। ଏହା ସହିତ ଦଳ ସିରିଜରେ ୧-୦ ରେ ଆଗରେ ଅଛି। ରୋହିତ ଶର୍ମା ସ୍ଥାୟୀ ଅଧିନାୟକ ହେବା ପରେ ଏହା ଭାରତୀୟ ଦଳ ପ୍ରଥମ ବିଜୟ। କିମ୍ବଦନ୍ତୀ ବ୍ୟାଟ୍ସମ୍ୟାନ ବିରାଟ କୋହଲି ଅଧିନାୟକତ୍ୱ ଛାଡିଥାଇ ପାରନ୍ତି, କିନ୍ତୁ ପ୍ରଥମ ମ୍ୟାଚ୍ରେ ପଡ଼ିଆରେ ତାଙ୍କର ଆଭିମୁଖ୍ୟ ଦେଖି ଲାଗୁ ନ ଥିଲା ସେ ରୋହିତଙ୍କ ଅଧୀନରେ ଖେଲୁଛନ୍ତି। ଅନେକ ଥର ବିରାଟ କେବଳ ରୋହିତଙ୍କୁ ବୁଝାଉଥିବାର ଦେଖାଯାଇଥିଲା।
ସ୍ଥାୟୀ ଅଧିନାୟକ ହେବା ପରେ ରୋହିତ ଶର୍ମାଙ୍କର ଏହା ପ୍ରଥମ ମ୍ୟାଚ ହୋଇଥିବାବେଳେ ବିରାଟ ତାଙ୍କୁ ଅଧିନାୟକତ୍ୱରେ ସାହାଯ୍ୟ କରୁଥିବା ଦେଖାଯାଇଥିଲା। ମ୍ୟାଚରେ ଏକ ଘଟଣା କ୍ରମରେ ବିରାଟ ରୋହିତଙ୍କୁ ଡିଆର୍ଏସ୍ ନେବାକୁ ବାଧ୍ୟ କରୁଥିଲେ। ୱେଷ୍ଟଇଣ୍ଡିଜ ଇନିଂସର ୨୨ ତମ ଓଭରରେ ୟୁଜବେନ୍ଦ୍ର ଚହଲ ବୋଲିଂ କରିବାକୁ ଆସିଥିଲେ। ତା’ପରେ ଏକ ବଲ ଶାମର ବ୍ରୁକ୍ସଙ୍କ ବ୍ୟାଟିଂ ଧାରରେ ବାଜି ଉଇକେଟ୍ କିପର୍ ରିଷଭ ପନ୍ତଙ୍କ ହାତକୁ ଯାଇଥିଲା। ଖେଳାଳିମାନେ ଆଉଟ୍ ପାଇଁ ଅପିଲ୍ କରିବା ପରେ ଫିଲ୍ଡ ଅମ୍ପାୟାର ଆଉଟ ଦେଇ ନ ଥିଲେ। ଯାହା ପରେ ଚହଲ ରୋହିତଙ୍କୁ ଡିଆର୍ଏସ୍ ନେବାକୁ କହିଥିଲେ। ତେବେ ସେହି ସମୟରେ ରିଷଭ ପନ୍ତ ରୋହିତଙ୍କୁ ଡିଆର୍ଏସ୍ ନେବାକୁ ମନା କରିଦେଇଥିଲେ। ତା’ପରେ ବିରାଟ କୋହଲି ସେଠାରେ ପହଞ୍ଚି ରୋହିତଙ୍କୁ ଡିଆର୍ଏସ୍ ନେବାକୁ ବୁଝାଇଥିଲେ। ବିରାଟଙ୍କ ସହ ସହମତ ହୋଇ ରୋହିତ ଡିଆର୍ଏସ୍ ନେଇଥିଲେ। ପରେ ବ୍ରୁକ୍ସଙ୍କୁ ତୃତୀୟ ଅମ୍ପାୟାର୍ ଆଉଟ୍ ଦେଇଥିଲେ। ସୋସିଆଲ ମିଡିଆରେ ଏହି ଘଟଣାର ଏକ ଭିଡିଓ ଭାଇରାଲ ହେବାରେ ଲାଗିଛି।
