ମୁଲାନପୁର,୧୧ା୧୨: ମୁଲାନପୁରରେ ଖେଳାଯାଇଥିବା ଦ୍ୱିତୀୟ T20 ଅନ୍ତର୍ଜାତୀୟ ମ୍ୟାଚରେ ଦକ୍ଷିଣ ଆଫ୍ରିକାଠାରୁ ଭାରତ ୫୧ ରନରେ ଶୋଚନୀୟ ଭାବେ ପରାସ୍ତ ହୋଇଛି। ପ୍ରଥମେ ବୋଲର ଏବଂ ପରେ ବ୍ୟାଟରଙ୍କ ଖରାପ ପ୍ରଦର୍ଶନ ଯୋଗୁଁ ଭାରତୀୟ ଦଳକୁ ଏହି ବଡ଼ ବ୍ୟବଧାନରେ ହାରିବାକୁ ପଡ଼ିଛି। ଏହି ବିଜୟ ସହ ଆଡେନ୍ ମାର୍କରମ୍ଙ୍କ ନେତୃତ୍ୱାଧୀନ ଦକ୍ଷିଣ ଆଫ୍ରିକା ୫ ମ୍ୟାଚ୍ ବିଶିଷ୍ଟ ସିରିଜ୍କୁ ୧-୧ରେ ବରାବର କରିଛି।
ପ୍ରଥମେ ବ୍ୟାଟିଂ କରି ଦକ୍ଷିଣ ଆଫ୍ରିକା ନିର୍ଦ୍ଧାରିତ ୨୦ ଓଭରରେ ୪ ୱିକେଟ୍ ହରାଇ ୨୧୩ ରନ୍ କରିଥିଲା। ଦଳ ପକ୍ଷରୁ ଓପନର କ୍ୱିଣ୍ଟନ ଡି କକ୍ ମାତ୍ର ୪୬ ବଲ୍ରେ ୭ଟି ଛକା ସହାୟତାରେ ୯୦ ରନ୍ର ଚମତ୍କାର ପାଳି ଖେଳିଥିଲେ। ଶେଷରେ ଡୋନାଭାନ୍ ଫେରେରା (୧୬ ବଲ୍ରେ ୩୦) ଏବଂ ଡେଭିଡ୍ ମିଲର୍ (୧୨ ବଲ୍ରେ ୨୦) ଦ୍ରୁତ ରନ୍ କରି ଦଳକୁ ବଡ଼ ସ୍କୋରରେ ପହଞ୍ଚାଇଥିଲେ।
ଭାରତର ପ୍ରମୁଖ ବୋଲର ଯଶପ୍ରୀତ ବୁମରା ଏବଂ ଅର୍ଶଦୀପ ସିଂହ ଅତ୍ୟନ୍ତ ମହଙ୍ଗା ସାବ୍ୟସ୍ତ ହୋଇଥିଲେ। ଅର୍ଶଦୀପ ସିଂହ ଗୋଟିଏ ଓଭରରେ ୭ଟି ୱାଇଡ୍ ବଲ୍ ପକାଇଥିଲେ।
୨୧୪ ରନ୍ର ବିଜୟ ଲକ୍ଷ୍ୟ ପିଛା କରି ଭାରତୀୟ ଦଳ ୧୯.୧ ଓଭରରେ ମାତ୍ର ୧୬୨ ରନ୍ କରି ଅଲ୍ ଆଉଟ୍ ହୋଇଯାଇଥିଲା। ଶୁବମନ ଗିଲ୍, ଅଭିଷେକ ଶର୍ମା ଏବଂ ଅଧିନାୟକ ସୂର୍ଯ୍ୟକୁମାର ଯାଦବଙ୍କ ୱିକେଟ୍ ପାୱାରପ୍ଲେ ଭିତରେ ହରାଇ ଭାରତୀୟ ରନ୍ ଚେସ୍ ଆରମ୍ଭରୁ ହିଁ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ତିଳକ ବର୍ମା ୩୪ ବଲ୍ରେ ୬୨ ରନ୍ର ଏକକ ଲଢ଼ୁଆ ପାଳି ଖେଳିଥିଲେ ମଧ୍ୟ କେବଳ ପରାଜୟର ବ୍ୟବଧାନକୁ କମାଇବାରେ ସଫଳ ହୋଇଥିଲେ।
ଦକ୍ଷିଣ ଆଫ୍ରିକା ପାଇଁ ଓଟନିଏଲ୍ ବାର୍ଟମ୍ୟାନ୍ ୪ ଓଭରରେ ମାତ୍ର ୨୪ ରନ୍ ଦେଇ ୪ଟି ୱିକେଟ୍ ନେଇଥିଲେ। ଏହା ବ୍ୟତୀତ ଲୁଙ୍ଗି ଏନଗିଡି, ମାର୍କୋ ୟାନସେନ୍ ଏବଂ ଲୁଥୋ ସିପାମଲା ପ୍ରତ୍ୟେକ ୨ଟି ଲେଖାଏଁ ୱିକେଟ୍ ନେଇ ଭାରତୀୟ ବ୍ୟାଟିଂ ଲାଇନ୍ଅପ୍କୁ ଭୁଶୁଡ଼ାଇ ଦେଇଥିଲେ।
