ଚେନ୍ନାଇ,୧୩।୨: ଭ୍ରମଣକାରୀ ଇଂଲଣ୍ଡ ବିପକ୍ଷ ଦ୍ୱିତୀୟ ଟେଷ୍ଟରେ ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିଲା ଭାରତ। ହେଲେ ପ୍ରାରମ୍ଭରୁ ଦଳର ବ୍ୟାଟିଂ ବିପର୍ଯ୍ୟୟ ଦେଖିବାକୁ ମିଳିଛି। ଦଳ ୩ ଗୁରୁତ୍ୱପୂର୍ଣ୍ଣ ଉଇକେଟ ହରାଇଥିବା ବେଳେ ଲଞ୍ଚ ବ୍ରେକ୍ ବେଳକୁ ଦଳ ୨୬ ଓଭରରେ ୧୦୬ରନ୍ କରିଛି। ରୋହିତ ଶର୍ମା(୮୦) ଏବଂ ଅଜିଙ୍କ୍ୟ ରାହାନେ(୫)ରନ୍ କରି ପଡ଼ିଆରେ ଅଛନ୍ତି।
ଶୁଭମିନ ଗିଲ ଖାତା ଖୋଲିପାରି ନ ଥିବା ବେଳେ ଏଲ୍ବିଡବ୍ଲୁ ହୋଇଥିଲେ। ଏହାପରେ ରୋହିତ ଶର୍ମା ଚେତେଶ୍ୱର ପୂଜାରାଙ୍କ ସହ ଦ୍ୱିତୀୟ ଉଇକେଟ ପାଇଁ ୮୫ରନ୍ର ଭାଗିଦାରି କରିଥିଲେ। ପରେ ପୂଜାରା କ୍ୟାଚ୍ ଆଉଟ୍ ହେବା ପରେ କୋହଲି ଆସି ଖାତା ନ ଖୋଲି ଫେରିଛନ୍ତି।
ପ୍ରକାଶ ଯେ, ଚାରି ମ୍ୟାଚ୍ ବିଶିଷ୍ଟ ଏହି ଟେଷ୍ଟ ସିରିଜ୍ର ପ୍ରଥମ ମ୍ୟାଚ୍ରେ ଭାରତୀୟ ଦଳ ଇଂଲଣ୍ଡଠାରୁ ୨୨୭ରନ୍ରେ ପରାସ୍ତ ହୋଇଥିଲା। ଇଂଲଣ୍ଡ ପ୍ରଥମ ଇନିଂସରେ ୫୭୮ରନ୍ କରିଥିଲା। ଭାରତ ପ୍ରଥମ ଇନିଂସରେ ୩୩୭ରନ୍ କରି ଅଲଆଉଟ୍ ହୋଇଯାଇଥିଲା। ସେହିଭଳି ଦ୍ୱିତୀୟ ଇନିଂସରେ ଇଂଲଣ୍ଡ ୧୭୮ରନ୍ କରିଥିଲା। ଶେଷରେ ୪୨୦ରନ୍ର ପିଛା କରି ଭାରତୀୟ ଦଳ ଦ୍ୱିତୀୟ ଇନିଂସରେ ମାତ୍ର ୧୯୨ରନ୍ରେ ଅଲ୍ଆଉଟ୍ ହୋଇଯାଇଥିଲା।
